"Оюу толгой" компанийн Төлөөлөн удирдах зөвлөл ирэх сарын 2-нд хуралдана. ТУЗ-ийн хуралдаанаар "Оюу толгой" компанийн Техник эдийн засгийн үндэслэл /ТЭЗҮ/-ийг хэлэлцүүлэх юм.

"Дараа нь шинжээч томилогдон дүгнэлтээ гаргаад, Эрдэс баялгийн мэргэжлийн зөвлөлөөр ТЭЗҮ-г хэлэлцүүлнэ. ТЭЗҮ-г аль болох хурдан хэлэлцэхийн тулд ажиллана" гэж Уул уурхайн сайд Д.Ганхуяг онцоллоо.

Дашрамд хэлэхэд Татварын маргаан таслах зөвлөлөөс шийдвэр гаргаж, "Оюутолгой" ХХК-ийн төлөх татвар, хүү, торгуулийн хэмжээ 127 сая ам.доллар байсныг 30 сая болгон дөрөв дахин бууруулсан юм.

Татварын маргаан таслах зөвлөл яагаад ийнхүү тогтоосон хэмжээг бууруулсан талаар Уул уурхайн сайдаас лавлахад "Хэдий Монгол Улс тус компанийн 34 хувийг эзэмшдэг ч компанийн дотоод асуудалд оролцох нь зохимжгүй. Төрийн өмчийнх ч бай, хувийн компани ч бай Уул уурхайн яам, Засгийн газар дотоод хэрэгт нь оролцохгүйг хичээдэг.

Татвартай холбоотой олон асуудал гардаг. Татварын маргаан таслах зөвлөлд маргалдагч хоёр талын төлөөллөөс гадна хараат бус гишүүд багтдаг"  гэсэн хариулт өгсөн юм.