2015 оны 03-р сарын 05-ны өдөр Хан-Уул дүүргийн гэр хорооллын орчинд цоо шинэ цэцэрлэг сүндэрлэсэн нь 209-р цэцэрлэг юм.

Хан-Уул дүүргийн 8-р хороо сургуулийн өмнөх насны нийт 937 хүүхэдтэйгээс тал нь буюу 470 хүүхэд цэцэрлэгт хамрагдаж чаддаггүй байсан юм.

209 дүгээр цэцэрлэг ашиглалтад орсноор 240 хүүхэд сургуулийн өмнөх боловсролд хамрагдаж тохилог орчинд мэргэжлийн багш нарын удирдлаган дор сурч хүмүүжих боломжтой болж байгаа юм. Тус цэцэрлэгийн газрын хувьд урьд нь хувь компаний эзэмшилд байсан бөгөөд дүүргийн удирдлагууд удаа дараа хүсэлт тавьсны дүнд газрыг чөлөөлүүлж чаджээ.

Цэцэрлэгийн нээлтэнд УИХ-ын гишүүн Л.Болд оролцох үеэрээ боловсролыг дэмжиж хүүхдүүдийн авъяас чадварыг хөгжүүлж, суралцах орчинг бүрдүүлэхэд анхаарч ном тохимлоор хангаж ажиллана гэдгээ мэдэгдэж байсан юм.

Тэгвэл тэрээр Ц.Оюунгэрэл гишүүний хамт удахгүй тохиох Дэлхийн номын өдрийг угтан 209-р цэцэрлэгийн хүүхэд багачуудад сэтгэхүй хөгжүүлэх тоглоом, ном бэлэглэлээ. Эцэг, эхчүүд, цэцэрлэгийн удирдлагууд бяцхан сурагчид аятай тухай орчинд хөгжиж, хүмүүжих болсонд баяртай байна.