УИХ ээлжит бус чуулганаараа Эрүүгийн өршөөл үзүүлэх тухай хууль баталсан. Одоогийн мөрдөгдөж буй Эрүүгийн хууль 305 зүйлтэй.

Үүний 78 нь ерөнхий ангид, 227 нь тусгай ангид хамаардаг. Үүнээс авлига албан тушаалтанд хариуцлага тооцох 10 зүйл заалт байдаг.

Тодруулбал, 148 дүгээр зүйл бусдын эд хөрөнгийг залилан мэхэлж авах, 150 дугаар зүйл бусдын эд хөрөнгийг завших, үрэгдүүлэх, 156 дугаар зүйл Банкны тухай хууль тогтоомж зөрчих, 263 дугаар зүйл төрийн албан тушаалтан албаны эрх мэдэл буюу албан тушаалын байдлаа урвуулах, 161 дүгээр зүйл мөнгө угаах, төрийн албан тушаалтан эрх мэдлээ хэтрүүлэх, 264 дугаар зүйл хээл хахууль авах, 268, 269 дүгээр зүйл хээл хахууль өгөх, 271 дүгээр зүйл хууль бусаар хөрөнгөжих, 273 дугаар зүйл төсвийн хөрөнгийг зориулалтын бусаар зарцуулах юм. Энэ бүх зүйл заалтууд өршөөлд хамрагдаж байна.

Авлига албан тушаалын хэргийг өршөөлд хамруулах ёсгүй гэж Монгол Улсын Ерөнхийлөгч үзэн хэсэгчлэн хориг тавиад байгаа юм. Хоригийг УИХ-ын ээлжит бус чуулган зарласнаас хойш ажлын 10 хоногт багтаан хэлэлцэх ёстой.

Ерөнхийлөгчийн хоригт УИХ дахь нам, эвслийн бүлгийн төлөөлөл хэрхэн хандаж, хүлээж авч буйг хүргэе.

Ц.Оюунгэрэл: Эмэгтэй гишүүний хувьд энэ албан тушаалын хэрэг дээр Ерөнхийлөгчөөс арай өөр байр суурьтай байгаа. Учир нь, албан тушаалын хэрэг гээд яг ял аваад явдаг хүмүүсийн ихэнх нь эмэгтэйчүүд байдаг. Тэр тусмаа нягтлан бодогч нар байх нь бий. Одоо албан тушаалын хэргээр хоригдож байгаа хүмүүс дунд 17 эмэгтэй бий. Тэд бүгд нягтлан бодогч нар. Мөн ямар нэг хохиролгүй, анхнаасаа шүүхийн шийдвэр нь ч ямар ч хохирол төл гэж гараагүй.

Хэрэв хохиролтой байсан бол өөрсдөө ч аль хэдийнэ төлөх байсан есөн хүн байна. Мөн хохирлоо бүрэн төлсөн гурав, дөрвөн хүн байдаг. Ер нь ийм байдалтай жагсаалт гардаг юм билээ. Ерөнхийлөгчид АТГ ч юм уу, Ерөнхийлөгчийн зөвлөхүүд нь арай сүржигнэсэн мэдээлэл өгсөн юм болов уу гэж бодож байгаа.

Бодит байдал дээр комисст нь орж ажиллаад, хоригдож байгаа хүмүүсийн жагсаалтыг аваад үзэхэд жирийн ардууд нэлээд их байна гэж би хэлэх гээд байгаа юм. Тэгэхээр хэтэрхий улс төрийн сүржин байдалд үүнийг битгий их дэвэргээсэй. Ховор олддог энэ өршөөлд олон эмэгтэйг хамруулах үүднээс хувьдаа Өршөөлийн хуулийг хэрэгжүүлчих юмсан гэж бодож байна.

С.Бямбацогт: МАН-ын бүлэг хуралдаж байр сууриа нэгтгээгүй байна. УИХ-ын чуулган завсарласны дараа хориг тавигдсан болохоор ээлжит болон ээлжит бус чуулган зарласан үед хоригийг хэлэлцэх хуультай. МАН анх удаа болон санамсар болгоомжгүйгээс гэмт хэрэг үйлдсэн хүмүүс, ахмадууд, эмэгтэйчүүд, хүүхдүүдийг өршөөхийг дэмжиж байгаа. Харамсалтай нь хэт хавтгайрч "гуя дагуу хүзүү" гэдэгтэй ижил хууль орж ирсэн. Хувь хүнийхээ байр суурийг илэрхийлэхэд Монгол Улсын Ерөнхийлөгчийн тавьсан хоригийг хүлээж авах нь зүйтэй гэж үзэж байна.

О.Баасанхүү: Ерөнхийлөгч Өршөөлийн хуульд хориг тавихаа мэдэгдсэн. Мэдээж Монгол Улсын Ерөнхийлөгчийн тавих хориг бол түүний эрх. Гэхдээ тэр хоригоо өөрөө улстөржүүлсэн. Ингэхдээ зөвхөн нэг хүн рүү дайраад байгаа. Төрийн тэргүүн иргэн рүүгээ дайрч болдоггүй. Тухайн иргэн өмнө нь ямар ажил хийж байсан, одоо ямар байгаа нь хамаагүй. Мөрдөн байцаалтад хөндлөнгөөс нөлөөлөх эрх хэнд ч байхгүй. УИХ-ын гишүүн тэр тусмаа Ерөнхийлөгчид ч байхгүй. Нөгөө талаас прокурорын байгууллагуудыг турхирч болохгүй шүү дээ.

Ерөнхийлөгч өөрөө хийсэн үйлдлээрээ намайг хориг хүлээж авах боломжгүй болгож байна. Уг нь Ерөнхийлөгч прокурорын байгууллагын хурал дээр ярихдаа авлигын индекс олон улсад ямар байна гэх маягаар үзэл бодлоо илэрхийлэх нь нээлттэй байсан. Хориг тавих эрх нь чөлөөтэй. Хамгийн гол нь өнөөдөр Төрийн тэргүүний хувийн ашиг сонирхлоор тэр дундаа хуулийн байгууллагуудыг турхирсан үйлдлийг өөгшүүлэх үү. Эсвэл үүнийг нь зогсоох уу гэсэн хоёр хувилбар дээр зогсч байна.

ИЗНН: Өршөөл үзүүлэх хууль нь шударга ёсыг хүсэгч нийгмийн бухимдлыг үл тоон төрийн мөнгийг хувьдаа зувчуулан ашигласан, албан тушаалын эрх мэдлийг албаны эрх ашгийн эсрэг буюу хувийн ашиг сонирхлоо гүйцэлдүүлэн баяжиж хөлжсөн хувь хүн, бүлэглэлийн хууль бус үйлдлийг өөгшүүлж байна. Энэ нь Үндэсний аюулгүй байдал, эрх зүйт төрийн үйл ажиллагаанд хор хохирол учруулж, дараа дараагийн Өршөөл үзүүлэх хуульд муу жишиг болохуйц хууль болсныг эсэргүүцэж байна.

Монголын хууль батлагчид Үндсэн хууль, нэгдэн орсон Авлигын эсрэг НҮБ-ын конвенцид нэгдэхдээ хүлээн зөвшөөрсөн “...авлигаар эд баялгийг хувьдаа хууль бусаар олж авах нь ардчилсан тогтолцоо, үндэсний эрх ашиг, хууль дээдлэх ёсонд нэн хохиролтой гэдэгт итгэж... тохиролцов” хэмээсэн үндсэн зорилгоосоо ухарч, авилгын гэмт хэргийг улс орны эсрэг гэмт хэрэг гэж үзэн эдийн засаг болоод нийгмийн хүрээнд хор хохирол учруулахуйц гэмт хэргийг хуулийн хүрээнд хариуцлага хүлээлгэх гэсэн амлалтаа умартаж буйг буруутгаж, олон улсын өмнө хүлээсэн гэрээ хэлэцээртээ үнэнч байхыг шаардаж байна. Тиймээс Монгол Улсын Ерөнхийлөгчийн хоригийг дэмжиж байна.

Ерөнхийлөгчийн хоригийг дэмжинэ, дэмжихгүй