Хөвсгөл аймагт болж буй Хамгийн сайн халамж хөдөлмөр эрхлэлт уриан дор хэрэгжиж буй хөгжлийн бэрхшээлтэй хүний хөдөлмөр эрхлэлтийг дэмжих цогц арга хэмжээнд УИХ-ын гишүүн Ж.Баясгалан оролцлоо. 

Тэрбээр "Бид Их хурлын индэр дээрээс уриалахаас илүү яг газар дээр нь иргэдтэйгээ уулзаж эрх нь зөрчигдсөн тэр асуудлыг шийдвэрлэх тал дээр ажиллах нь чухал. Хэрвээ ажилд орох шаардлагаа хангаад ажилд авахгүй байгаа бол надад бичгээр хандаарай. Хууль батлах амархан харин хуулиа хэрэгжүүлэх л хамгийн чухал юм" гэдгийг онцлон хэллээ.

Цогц арга хэмжээний чухал хэсэг нь Хөвсгөл аймгийн хөгжлийн бэрхшээлтэй иргэд, хөгжлийн бэрхшээлтэй хүүхдээ асран хамгаалдаг эцэг эхчүүдийн эрхэлж буй бизнесийг сурталчлах, дэмжих, төрийн үйлчилгээг иргэдэд нэг дороос хүргэх Ability expo байлаа.

Гэр бүл, хөдөлмөр, нийгмийн хамгааллын яамнаас хөгжлийн бэрхшээлтэй хүн үйлчилгээ авахад учирч байгаа саад бэрхшээлийг илрүүлэх, шийдвэрлэх арга замыг оновчтой тогтоох, хүний онцлог хэрэгцээнд тохирсон үйлчилгээг хүргэх НИЙГМИЙН ҮЙЛЧИЛГЭЭНИЙ ЗУРАГЛАЛ гаргахаар ажиллаж байна.

Цаашдаа уг зураглалаар хөгжлийн бэрхшээлтэй иргэдэд хөгжлийн цогц үйлчилгээ хүргэхэд чиглэсэн эрх зүйн орчныг бүрдүүлнэ.
Тус арга хэмжээг цаашид 6 аймагт бүсчилэн зохион байгуулахаар төлөвлөж байгаа аж.