2018.04.24

Нягтлан бодох бүртгэлийн улсын 21 дэх олимпиадыг зохион байгууллаа

Монголын мэргэшсэн нягтлан бодогчдын институтээс Нягтлан бодох бүртгэлийн 21 дэх олимпиадыг зохион байгуулжээ. 

Нягтлан бодох бүртгэлийн мэргэжилтэн бэлтгэдэг их дээд сургуулиудын шилдэг оюутнуудыг шалгаруулах, ирээдүйн мэргэжилтнүүдийн мэдлэгийн түвшинг дээшлүүлэх, оюутнуудын биеэ дайчлан суралцах идэвхийг өрнүүлэх, багш нарын туршлага арга барилыг харилцан баяжуулахад туслах, нягтлан бодох салбарт үнэтэй хувь нэмэр оруулсан ахмадуудаа алдаршуулах зорилгоор тус олимпиадыг Монголын мэргэшсэн нягтлан бодогчдын институтээс жил бүр уламжлал болгон зохион байгуулдаг. 

Энэ удаагийн олимпиадыг Монгол Улсын гавъяат эдийн засагч, Монголын мэргэшсэн нягтлан бодогчдын институтын 5 дахь ерөнхийлөгч, Монгол Улсын анхны гавьяат эдийн засагч аудитор Цэрэнгаваагийн Жигдэнгийн нэрэмжит болгон зохион байгуулжээ.

Олимпиадаас шилдэг сургууль, шилдэг багш, шилдэг 10 оюутныг шалгаруулдаг бөгөөд Нягтлан бодох бүртгэлийн улсын XXI олимпиадын аваргаар Н.Дамдиндорж багштай МУИС-ийн баг тодорч, 2-р байрт П.Доржпүрэв багштай СЭЗИС, 3-р байрт Г.Амарбаясгалан багштай Мандах ИС-ийн Дархан салбар сургууль, хувийн дүнгээр ТОП-10 оюутны 1-р байрт СЭЗИС-ийн 4-р курсын оюутан Э.Насантогтох шалгарлаа.

Монголын мэргэшсэн нягтлан бодогчдын институтын гүйцэтгэх захирал Л.Энх-Амгалан: Энэ удаагийн олимпиадыг Монгол Улсын гавьяат эдийн засагч Ц.Жигдэн захиралын нэрэмжит болгон зохион байгуулж байна. Оюутнууд зөвхөн мэргэжлийн чиглэлээр төдийгүй англи хэл, тодорхой бизнесийн шийдэл дээр  ажиллах, багаар ажиллах байдлаар өрсөлддөг. Өрсөлдөөн зөвхөн Улаанбаатар хотын их дээд сургуулиудын хооронд төдийгүй улсын хэмжээний олимпиад болгон зохион байгуулагдаж байна. Энэ удаагийн олимпиадад Дархан-Уул, Завхан, Ховд аймгаас оюутнууд ирж оролцсон.

Монгол Улсын гавьяат эдийн засагч Ц.Жигдэн: Монгол Улсын санхүү, нягтлан бодох бүртгэл, аудитын салбарт гавъяа байгуулсан хүндтэй эрхмүүдээ залуу үетэйгээ холбох арга хэмжээ болж байна. Энэ арга хэмжээгээр дамжуулан олимпиадад оролцож тэргүүлж байсан залуус өнөөдөр Монгорлынхоо нийгэм, эдийн засаг, боловсролынхоо салбарт тэргүүлэх зэрэгтэй, амжилттай ажиллаж байна.