Хүнс, хөдөө аж ахуй, хөнгөн үйлдвэрийн сайд Ч.Улаан 21 аймгийн Хүнс, хөдөө аж ахуйн газрын даргатай 2019 онд хамтарч ажиллах үр дүнгийн гэрээ байгуулав.

Салбарын удирдах ажилтны зөвлөгөөний үеэр байгуулсан уг гэрээг Монгол Улсын Засгийн газрын 2016-2020 оны үйл ажиллагааны хөтөлбөр болон 2019 онд хүнс, хөдөө аж ахуй, хөнгөн үйлдвэрийн салбарт дэвшүүлсэн зорилтыг орон нутагт хэрэгжүүлэх зорилгоор байгуулж байгаа юм.

Хүнс, хөдөө аж ахуй, хөнгөн үйлдвэрийн сайд нь гэрээнд тусгагдсан бүтээгдэхүүн, ажил, үйлчилгээ, манлайллын зорилтоо хэрэгжүүлэхэд нь аймгийн ХХААГ-ын даргад дэмжлэг туслалцаа үзүүлж, гэрээний биелэлтийг хангах боломж, нөхцөлийг бүрдүүлэх үүрэг хүлээж байна.

Хавсралтаар, тухайн аймгийн улсын төсвийн хөрөнгөөр 2019 онд санхүүжүүлэх төсөл, арга хэмжээний жагсаалт, мал аж ахуй, газар тариалан, хүнс, худалдаа, хоол, үйлдвэрлэл, хөнгөн, жижиг, дунд үйлдвэр, хоршоо, малын үржил, бүртгэлийн чиглэлээр хэрэгжүүлэх үйл ажиллагаа, суурь түвшин, хүрэх үр дүн, төсөв тус тус тусгасан байна. 

Ийнхүү гэрээний биелэлтийг энэ оны 12 дугаар сарын 25-ны дотор тайлагнаж, ирэх оны нэгдүгээр сарын 15-нд багтаан дүгнэх юм.   

Аймгуудын Хүнс, хөдөө аж ахуйн газрын дарга нартай үр дүнгийн гэрээ байгуулахын өмнө ХХААХҮ-ийн сайд Ч.Улаан орон нутгийн удирдлагуудад үүрэг чиглэл өгсөн. Тэрбээр, "2019 он бүтээлч ажлын жил байх учиртай гэж УИХ, Засгийн газар үзэж байна. УИХ, Засгийн газрын бүрэн эрхийн хугацаа дундаасаа өнгөрлөө. Эхлүүлсэн ажил, батлуулсан хууль дүрэм, хөтөлбөр, төслөө үр дүнд хүргэх, үнэлүүлж, дүгнүүлэх гараанд ойртож буй жил.

Юуны өмнө бид төр, засгийн бодлого, шийдвэр, хууль тогтоомжийн хэрэгжилтийг үр дүнтэй ажил болгох, Засгийн газрын үйл ажиллагааны хөтөлбөрийн зорилтуудыг бүрэн дүүрэн өгөөжтэй хэрэгжүүлж, ард иргэддээ үр шимийг нь хүртээх ажлыг бодитой зохион байгуулах ёстой. Энэ бүхэнд бидний хүч, анхаарал, үйл ажиллагаа чиглэгдэх болно" гээд 2018 онд салбарын хэмжээнд гарсан ололт, амжилтаас дурдаж, одоогийн хүрсэн түвшнээ улам ахиулахыг зорьж байгаагаа хэллээ.