Д.Хүрэлбаатар 2019.02.15 | Яамны хэвлэл мэдээллийн алба

Мах, ясны гурил болон амьтны гаралтай тосны үйлдвэр нээлтээ хийлээ

Мах, ясны гурил болон амьтны гаралтай тосны үйлдвэр нээлтээ хийлээ

"Протэйн" мах, ясны гурил болон амьтны гаралтай тосны үйлдвэр өнөөдөр (2019.02.15) нээлтээ хийж, нээлтийн арга хэмжээнд Монгол Улсын Ерөнхий сайд У.Хүрэлсүх, Хүнс, хөдөө аж ахуй, хөнгөн үйлдвэрийн дэд сайд Ж.Сауле болон холбогдох бусад албаныхан оролцлоо.

Ерөнхий сайд У.Хүрэлсүх үйлдвэрийн нээлтэд оролцож хэлсэн үгэндээ, мал аж ахуй, газар тариалан, хөнгөн, жижиг, дунд үйлдвэр бол улсын эдийн засгийн тэргүүлэх салбар гэдгийг онцлоод, хүн амыг эрүүл хүнсээр хангах, улмаар хүнс экспортлогч орон болох Засгийн газрын зорилтыг хангахад хувь нэмрээ оруулах үйлдвэр байгуулсанд Протэйн үйлдвэрийн удирдлага, ажилтнуудад баяр хүргэж, цаашдын ажилд нь амжилт хүссэн юм. Тэрбээр, хөнгөн, жижиг, дунд үйлдвэрлэгчдийнхээ үйл ажиллагааг Засгийн газар, холбогдох яамд, төрийн байгууллагууд бүх талаар дэмжин ажиллах болно гээд мах, ясны гурил, амьтны гаралтай тосыг хоёр хөрш рүү экспортлох өргөн боломжтой гэж үзэж байгаагаа үйлдвэрийнхэнд хандан хэлэв.

Монгол Улс жилдээ 15 сая орчим толгой малыг хүнсний хэрэгцээнд зориулан нядалдаг бөгөөд үүнээс 360 мянга гаруй тонн яс хаягдал болдог. Энэ нь тийм хэмжээний малын гаралтай дайвар бүтээгдэхүүний түүхий эдийн нөөцийг жил бүр ашиглах боломжтой гэсэн үг. Тэгвэл "Протэйн" үйлдвэр ашиглалтад орсноор уг нөөцөөс өдөрт 96 тонн түүхий эдийг боловсруулж, 24 тонн тэжээлийн уураг, 17 тонн малын гаралтай тос үйлдвэрлэх юм.

Ингэснээр Монгол Улсад үйл ажиллагаа явуулж буй гахай, тахианы эрчимжсэн аж ахуйн тэжээлийн уургийн 80 хувийг дангаараа нийлүүлэх боломжтой. Түүнчлэн энэ төрлийн бүтээгдэхүүнийг импортоор авахад жилдээ зарцуулдаг 18 тэрбум төгрөгийн тодорхой хувийг дотоодын зах зээлдээ шингээх бололцоо бүрдэж байна гэдгийг тус үйлдвэрийн удирдлагууд онцоллоо.

Түүнчлэн Малын гаралтай түүхий эдийн нян, бактери 2 барын даралттай 134 хэмд 3 минутад устгадаг бөгөөд Италийн "Impianti Carrera" үйлдвэрийн тоног төхөөрөмжийг нэвтрүүлснээр түүхий эдийг 10 барын даралттай 140 хэмд 60 минутад боловсруулан, олон улсын лабораторид шинжлүүлэх тул бүтээгдэхүүний чанар, эрүүл ахуй, аюулгүй байдалд итгэлтэй байж болно. Үйлдвэрээ Эмээлтэд байгуулсан нь түүхий эдээ татан авахад хялбар талыг бодолцон үзсэн гэв. 

Үйлдвэр Италийн техник технологи, төхөөрөмжөөр иж бүрэн тоноглогдсон бөгөөд европын стандартыг хангасан бүтээгдэхүүн үйлдвэрлэх учраас дэлхийн зах зээлд гарах нь зүйтэй. Монгол Улсын Засгийн газраас батлан хэрэгжүүлж буй "Үйлдвэржилт 21:100" хөтөлбөрт тусгагдсаны дагуу эдийн засаг, нийгмийн өндөр үр ашигтай энэ төрлийн үйлдвэрийг салбар яам бодлогоор дэмжин ажиллах болно гэдгээ ХХХААХҮЯ-ны удирдлага тэмдэглэв.

Мах, ясны гурил нь мал, амьтны ашиг шим, түүхий эдийн чанар, гарцыг нэмэгдүүлдэг байна. Бэлчээрийн мал аж ахуй эрхэлдэг манай орны малын гаралтай түүхий эдийг ашиглан гаргасан авсан энэ төрлийн бүтээгдэхүүн нь уураг, амин хүчил, кальци, омега, коллаген, фосфорын агууламж өндөр байгааг судалгаагаар тогтоосон учир дотоодод төдийгүй олон улсад эрэлттэй үйлдвэрлэл юм.

Ингээд Монголд анх удаад тооцогдох, Азидаа хоёр дахь том бүрэн автомат шинэ үйлдвэрийн үйл ажиллагаатай Монгол Улсын Ерөнхий сайд У.Хүрэлсүх тэргүүтэй албаныхан танилцлаа.