Дорноговь аймгийн Замын-Үүд сумын нэгдсэн эмнэлэгт тулгамдаж байгаа асуудлыг газар дээр нь судлаж, шийдвэрлэх ЭМЯ-ны ажлын хэсэг 2009 оны тавдугаар сарын 27-ноос тав хоногийн хугацаатай ажиллалаа.

Ажлын хэсэгт ЭМЯ-ны Эмнэлэгийн тусламжийн бодлогын хэрэгжилтийг зохицуулах газрын мэргэжилтэн Ч.Чулуунбаатар, Санхүү, хөрөнгө оруулалтын газрын мэргэжилтэн Д.Амар, Дорноговь аймгийн Эрүүл мэндийн газрын дарга Г.Энхцэцэг, Замын-Үүд сумын нэгдсэн эмнэлэгийн дарга Ц.Мөнхбаясгалан нар оржээ.

Замын –Үүд сум нь 11374 хүн амтай, өдөр бүр 3500 хүн байнга зорчдог, хил худалдаа, ганзагын наймаа эрхэлдэг болон хоол цай зардаг, ачаа бараа зөөдөг бүртгэлгүй хүн олонтой сум юм. Тус суманд 2004 онд сум дундын эмнэлэг байгуулагдаж, 2008 онд нэгдсэн эмнэлэг болж өргөжсөн. Жилдээ 281 сая төгрөгийн төсөвтэй, 35 ортой, 44 орон тоотойгоор үйл ажиллагаагаа явуулж байгаа ажээ. Түүнчлэн 1956 онд анх энэ суманд Төмөр замын эмнэлэг байгуулагдсан бөгөөд одоо 20 ортой, 34 орон тоотой, 220 орчим сая төгрөгийн төсөвтэй ажиллаж байгаа юм байна. Хөдөөгийн хүн амд үзүүлэх эмнэлэгийн тусламж, үйлчилгээний хүртээмж, чанарыг сайжруулах зорилгоор УБТЗ-ын эмнэлэг, Ариун цэврийн алба, Дорноговь аймгийн Эрүүл газар хамтран ажиллах гэрээ байгуулж, Замын-Үүд сумын нэгдсэн эмнэлэг, Төмөр замын эмнэлэгүүдийг нэг удирдлагатай хамтруулан ажиллуулж, дотор, мэс засал, төрөх, эмэгтэйчүүд, хүүхэд, дүрс оношлогоо, халдварт, лаборатори зэрэг нарийн мэргэжлийн тусламж үйлчилгээг үзүүлж байна.

Ажлын хэсгийнхэн орон нутгийн эмнэлэгийн байдалтай танилцаад хэд хэдэн асуудлыг шийдвэрлэх боломжтой гэж үзжээ. Тухайлбал:
ЭМЯ-ны түвшинд Төмөр замын эмнэлэгийг Сумын нэгдсэн эмнэлэгтэй нийлүүлэх асуудлыг 2010 оны Улсын төсөв батлагдахаас өмнө шийдвэрлэх,
Замын-Үүд суманд амбулатори, стационар бүхий зориулалтын нэгдсэн эмнэлэгийн болон халдвартын эмнэлэгийн барилгыг 2010 онд багтаан бариулах,
Рентген тоног төхөөрөмж болон халдвартын тасагт шаардлагатай нийт 17 нэр төрлийн 254,5 сая төгрөгийн багаж төхөөрөмж, хамгаалалтын хувцас хэрэглэлийг яаралтай олгох шаардлагатай гэж ажлын хэсэг үзсэн байна. Дээрх асуудлыг Эрүүл мэндийн сайдад танилцуулж холбогдох шийдвэр гаргуулахаар ЭМЯ-ны ажлын хэсэг шийдвэрлэв

Ажлын хэсэг Замын-Үүд суманд ажиллалаа