Одоогоос 200 гаруй жилийн өмнө буюу 1800-д онд Гандантэгчэнлин хийд байгуулагдаж өдгөө жуулчдыг хамгийн ихээр татдаг газруудын нэг болсон. Гэвч жуулчид зорин ирдэг Гандан орчимд одоог хүртэл нүхэн жорлон үнэртэж, ойр орчмын иргэд төвийн шугам сүлжээнд холбогдож чадалгүй өнөөдрийг хүрч байна. Социалист нийгмийн үед ч тэр ардчиллын 32 жилд ч тэр ажил болоогүй энэ асуудал олон жил яригдсаар ирсэн.  

Тэгвэл дээрх бүсийг шугам сүлжээнд холбох ажлыг 2021 оноос эхлүүлж өнөөдөр бодитоор биеллээ оллоо. Баянгол дүүргийн 16-р хороо, Гандантэгчэнлин хийдийн баруун урд хэсэг Орхоны 2, 3, 4, 5, 6, 7-р гудамж, тус хэсгийн айл өрх Төвийн шугам сүлжээнд холбогдож, дулаан, цэвэр усыг гэртээ хүлээн авч, Нийслэл хотын анхны хувийн орон сууц Хаус хороолол бий болох боломжтой болж байгааг УИХ-ын гишүүн Х.Ганхуяг онцолж байна.

Өнгөрсөн жил Засгийн газар Гандантэгчэнлин хийдийг аялал жуулчлалын бүс болгохоор зарлаж улсын төсөвт шаардлагатай хөрөнгө оруулалтыг тусгуулж чадсан гэдгийг ч хэлсэн юм.

Энэ хүрээнд Гандан орчмын айл өрхүүд хувийн байшиндаа цэвэр бохирын асуудлаа шийдэж, төвийн дулаанд холбогдоод зогсохгүй жижиг дунд үйлдвэрлэл, бизнес эрхлэх боломж нөхцөлийг ч нээж өгчээ. Тус бүсэд оршин сууж байгаа 1700 орчим айл өрхүүд бизнес эрхэлж амьдрах нөхцөлөө сайжруулах боломж бүрдлээ.