Өнгөрсөн хугацаанд нийгмийн халамжийн чиглэлд гарч буй өөрчлөлт шинэчлэлтийг анхааралтай ажиглаж, өөрсдийн судалгаа шинжилгээ, бусад улс орны арга, туршлагад тулгуурлан үнэлэлт дүгнэлт гаргаад байгаагаа хатагтай Шоко Нода танилцуулаад эдгээр баримт бичгийг тус байнгын хороонд хүргүүлэхээ мэдэгдлээ.

Ядуурлыг тодорхой хэмжээгээр  бууруулах нь мянганы хөгжлийн нэг чухал зорилт болохыг тэрээр тэмдэглээд,нийгмийн халамжийг илүү үр дүнтэй болгож, улс орны өмнө тавигдаж байгаа хөгжлийн асуудалд чиглүүлэх нь чухлыг тэрээр онцлов. Мөн судалгаанаас харахад ядуурлын түвшин насанд хүрэгчид, хүүхдүүдийн хувьд ялгаатай  байгаа нь ажиглагдаж байгааг хэлээд, мөнгөн хэлбэрийн тусламж ядуурлыг бууруулах цорын ганц арга зам  биш боловч өнөөдөр энэ хэлбэр  өрх бүрт бодит тусламж болж чадсан гэж үзэж буйгаа тэмдэглэв.

Харин энэхүү тусламж дэмжлэгийг зөвхөн зорилтот бүлэгт хүргэх нь чухалыг тэрээр онцолж , өмнө нь хүүхдэд зориулан олгож байсан мөнгөн тусламжийг бүх нийтэд тараан олгох болсон нь бодит асуудлаас ухарч байна гэж үзэж буйгаа хэлсэн юм. Учир нь сар тутам, системтэй олгож байсан тэтгэлэгийг өөрчилж нэг удаа ийнүү олгох нь тийм сайн оновчтой арга биш бөгөөд хувийн  дансгүй, мэдлэг боловсрол дутмаг, хязгаарлагдмал ядуу, эмзэг бүлгийнхэн бүрэн хамрагдаж чадах эсэх, дараа дараагийн тэтгэлэг авах асуудлаа тэдгээр хүмүүс бүрэн шийдвэрлэх боломж хязгаарлагдмал  гэж үзэж байгаа аж.

Түүнчлэн НҮБ-ын Хөгжлийн хөтөлбөрөөс  2008 онд гаргасан “Хөдөлмөр эрхлэлт ба ядууралтай тэмцэх” зөвлөмжийг хэрэгжүүлэх үйл ажиллагаа зогсонги байдалд байгаад анхаарч энэ чиглэлд хамтран ажиллах сонирхолтой байгаагаа илэрхийлэв.            

Байнгын хорооны дарга Д.Арвин монголын хүүхэд, багачууд, цаашлаад хүний хөгжил сангийн үйл ажиллагаанд санаа тавьж, нийгмийн салбарын шинэчлэлийн асуудал ид яригдаж буй энэ үед  хүрэлцэн ирж санал солилцож байгаад талархалтай байгаагаа  илэрхийллээ.

Хүний хөгжил сангаас иргэн бүрт олгох мөнгөн тусламжийг сар бүр олгох уу, эсвэл бөөнөөр нь олгох уу гэдэг дээр   ард иргэдийн дунд судалгаа хийгдэж, энэхүү судалгаанд үндэслэн  хуваарилалт хийгдэхээр  болсныг мөн тэрээр тэмдэглэн хэлсэн.

Түүнчлэн ядуу, эмзэг бүлгийнхэн гэж хэнийг хэлэх, өнөөдөр энэ бүлгийн нийт хичнээн хүн байгаа болон эрдэм шинжилгээний байгууллага, эрдэмтэн, мэргэжлийн хүмүүстэй хамтран ядуу, эмзэг бүлгийн төлөөллийг  тусад нь авч  тодорхойлон  зөвхөн энэ бүлэгт чиглэсэн бодлогын үйл ажиллагаа явуулах, тогтвортой амьжиргаа болон бусад төсөл ,хөтөлбөрийн хүрээнд чиглэсэн тусламж, дэмжлэгийг зөвхөн эмзэг, ядуу бүлэгт хандуулах, нийслэл болон дагуул хотуудад ажлын байр бий болгох, ядууралтай тэмцэх ажлын арга хэлбэрийг өөрчилж үр дүнтэй арга хэмжээ авч хэрэгжүүлэхээр байнгын хороо төлөвлөж байгааг дуулгалаа.            

Мөн УИХ-ын хаврын чуулганаар Гэр бүлийн тухай хуулинд хүүхдийн эрхийн талаар өөрчлөлт оруулахаар байнгын хороо ажиллаж байгааг танилцуулж, хуулийн төслийн зарим зүйл заалт болон  нийгмийн салбарын тодорхой чиглэлд   зөвлөгөө авах, хамтран ажиллах сонирхолтой байгаагаа илэрхийлсэн юм.              

Эерэг өөрчлөлтийг бий болгож, юу нь болж , юу нь болохгүй байгааг хамтдаа олж харж харилцаа, хамтын ажиллагаагаа цаашид улам эрчимжүүлэн, харилцан мэдээлэл солилцож хамтран ажиллах нь ихээхэн үр дүнтэй болохыг тэрээр уулзалтын эцэст онцлон тэмдэглэв.