БОАЖЯ-ны захиалгаар Байгаль Хамгааллын “Туул ижий сан” ТББ-ын санхүүжилт, "JCI прогресс"-ын дэмжлэгтэйгээр ШУА-ийн Газарзүй-Геоэкологийн хүрээлэнгийн эрдэмтэн, судлаачдын хамтын ажиллагааны дүнд энэ онд амжилттай үржүүлсэн 90 мянган загасыг Туул голд тавилаа.

Орхоны Хөндийн БЦГ-ын хамгаалалтын захиргаатай хамтран үржилд тэнцэх 21 атуу, 20 атуухыг Орхон голоос барьж, эх сүрэг зөөвөрлөх зориулалтын саванд тээвэрлэн авчирч түрс, сунг авсны дараа Туул голд буцаан тавьжээ. Туршилт судалгаанд Ховдын Их сургууль, МУБИС-ийн оюутан залуусыг дадлагажуулан, мэргэжил аргазүйн зөвлөмж өгч хамтран ажиллажээ. Монгол Улсад загас үржүүлгийн мэргэжилтэн ховор учир боловсон хүчнийг чадавхжуулахад уг арга хэмжээ чухал үүрэгтэй гэнэ.

Уг төсөл хэрэгжсэнээр Туул гол болон цутгал голуудын загасны нөөц нэмэгдэж, хүн амыг амралт чөлөөт цагаа зөв зохистой өнгөрүүлэх, спорт загасчлал, эко аялал жуулчлалыг хөгжүүлэхэд чухал нөлөө үзүүлэх юм.

Мөн Монгол Улсын Засгийн газраас хэрэгжүүлж буй “Welcome to Mongolia” арга хэмжээний хүрээнд "Нэг жуулчин - Нэг загас" загас үржүүлгийн хөтөлбөрийг явуулах уг ажлыг үр дүнд хүргэхээр БОАЖ-ын Сайд Б.Бат-Эрдэнэ "JCI прогресс"-тэй хамтран ажиллах санамж бичигт гарын үсэг зурлаа.