Эрүүл мэндийн яамны зүгээс “төвлөрлийг сааруулах бодлого”-ыг чухалчлан ажиллаж байгаа талаараа салбарын сайд Т.Мөнхсайхан онцолж байсан. Нэг үгээр хэлбэл, тухайн иргэн аль болох амьдарч байгаа бүс нутагтаа ямар нэгэн төвөг чирэгдэлгүйгээр тусламж үйлчилгээг авах боломжийг хангах чиглэлд ажиллаж буй.

Өнгөрсөн хугацаанд Улсын 1, 2, 3 дугаар эмнэлэг ХСҮТ, ГССҮТ гээд төв эмнэлгүүд дээрээ бөөгнөрч, тусламж үйлчилгээ авч ирсний уршгаар өнөөдрийн хүндхэн нөхцөлд байдалд ирсэн нь нууц биш.

Тиймээс Засгийн газрын хэрэгжүүлж буй төвлөрлийг сааруулах бодлогын хүрээнд зайн оношилгооны төвийг өнгөрсөн оны 12-р сард нээсэн. Уг оношилгооны төв нээгдсэнээр Рентген, СТ, MRI, мамографик дүрс оношилгооны зургуудыг орон зай, цаг хугацаанаас үл хамааран хөдөө орон нутгийн эрүүл мэндийн байгууллагуудаас чанарын өндөр түвшинд, стандартын дагуу хүлээн авч дүгнэлтийг нарийн мэргэжлийн эмч нар гаргах боломж бүрдээд байгаа юм.

хот руу чиглэх иргэдийн хөдөлгөөн багасаж, тусламж үйлчилгээний хүртээмж сайжирна

Үүний үр дүнд хүний нөөцийн дутагдалтай эрүүл мэндийн байгууллагуудын тусламж үйлчилгээг мэдээллийн технологи ашиглан нөхөх, иргэд харьяа орон нутгаасаа дүрс оношилгооны дүгнэлтийг хүлээн авдаг болсноор хот руу чиглэх иргэдийн хөдөлгөөн багасаж эрүүл мэндийн тусламж үйлчилгээний хүртээмж сайжрах юм. Зайн оношилгооны төв нь нийслэлээс 21 аймагтай холбогдон компьютер томограф, MRI, мамографик болон бусад дүрс оношилгоо шинжилгээ эмчилгээг зайнаас төрөлжсөн мэргэжлийн эмч нараар хийлгэх боломж бүрдэж буй.

Өнөөдрийн байдлаар Монгол Улсын 21 аймаг факс системээр зай оношилгооны төвтэй бүрэн холбогдож дуусАВ.

жил бүр 3 төрлийн өвчлөлийг орон нутагт нь эмчилдэг болНО

Өнгөрсөн оноос эхлэн төвлөрлийг сааруулах ажлын хүрээнд эрүүл мэндийн сайдын тушаалаар үндэсний багуудыг байгуулсан. Үндэсний багууд 21 аймагт очиж ажилласнаар жил бүр 3 төрлийн өвчлөлийг аймаг орон нутагт нь эмчилдэг болох бодлогыг барьж байна. Өнгөрсөн 2024 оны хувьд хавдрын тусламж үйлчилгээ, ангиографийн тусламж үйлчилгээ, эмгэг судлалын тусламжийг хөгжүүлэх чиглэлд ажилласан бол 2025 онд хүүхдийн чиглэлийн бүхий л тусламж эмчилгээг хөгжүүлэхээр ажиллаж буйг салбарын сайд Т.Мөнхсайхан мэдээлсэн. Харин зайн оношилгоо, эмчилгээний төвд ажиллах, эмч ажилчдаа урамшуулах, даатгалд хамруулах. Цаашид энэ төвийн үйл ажиллагааг тогтолцоо болгон хөгжүүлэх төр хувийн хэвшлийн түншлэл менежментийн загвар болгоход анхаарч ажиллана гэдгээ ч салбарын сайд мөн онцолсон.

УИХ-ын гишүүн, Эрүүл мэндийн сайд Т.Мөнхсайхан:

"Энэ төв маань зөвхөн эхлэл. Тухайлбал, цахимаар тусламж үйлчилгээгээ үзүүлэх, оношлох, эмчлэх энэ зүйлийн маань эхлэл. Цаашдаа өшөө өргөжнө. Өргөжин тэлэхдээ асуудлыг зөвхөн төр шийддэг биш, хувийн хэвшлээ бид нар яаж нааш нь татан оролцуулж хамтдаа хөгжих вэ гэдэг дээр анхаарна" гэв.

Т.Мөнхсайхан: Төвлөрлийг сааруулах бодлогын хүрээнд зайн оношилгоо, эмчилгээний төвийг нээж, 21 аймагтай холбогдлоо