Энэ зарчмыг Швей­царийн парламент ягш­тал хэрэгжүүлдэг гэнэ лээ. Аливаа хууль, тогтоо­лыг батлахаар гишүүн саналаа өгөхдөө ширээ­ний­хээ дээр, доор байр­лах кнопыг зэрэг дардаг. Бусдын кноп руу яваад байдаг зүггүй хоёр гар нь завгүй учраас хажуудаа суух найзынхаа өмнөөс санал өгөх ямар ч боломж олддоггүй.  Үнэндээ түү­ний хоёр гар зөвхөн өөрийн­хөө саналыг өгө­хөд л зориулагддаг. Тийм учраас парламентынх нь санал хураалт шударга, элдэв маргаангүй болдог юм байна. Энэ зөв арга байгаа биз. Яг манай парламентад тохирно.

Уг нь манай УИХ-ын гишүүд бусдын өмнөөс санал өгдөг замбараагүй байдлаа хязгаарлахаар өөрсдөө хууль баталсан ч нэмэр алга. Кноп л ха­рагд­вал дараад авдаг муу зуршлаасаа салж ча­дах­гүй байгаа юм. Санал ху­раах мөчид хажуудах нь эзгүй бол кноп руу нь баяр­тай гэгч нь хуруугаа явуулна. Урд, хойд талын ши­рээнийхэн ирээгүй бол азны юм болно. Ал­ба­тай юм шиг ингэж са­нал өгчихөөд дараа нь "Ирц бүрдээгүй байхад са­нал хураалаа" гээд баа­хан хэрэлдэж суухыг нь яана.  Төгөлдөр хуурч шиг мэргэшсэн кнопчин гишүүдийг хуулиар хязгаарлаж чаддаггүй юм бол Швейцарь шиг ар­гаар хазаарлаад авбал яасан юм. УИХ Тамгын газ­раараа асуудлыг ший­­дүүлчихэд ядах юм­гүй гэдгийг ч зарим ги­шүүн хэлж байна билээ. Энэ парламентын хуга­цаа дуусахаас өмнө УИХ нэлээд хэдэн хууль ба­талж таараа. Гишүүдийн дийлэнх нь сонгуулийн сурталчилгаанд явж  мэд­нэ. Овоо тооны кноп да­рах нь гээд үлдсэн гишүү­дийн хуруу нь загатнаж суугаа байх.  Үүнээс урь­таад асуудлыг зохи­цуул­чих­вал гишүүд заавал өөрийн биеэр хуралдаа сууж санал өгнө, санал хураалт ч шударга болох биш үү.