2012.06.11
Сонгуулиа бол өгөх хэрэгтэй шүү
УИХ-ын сонгуулийн сурталчилгааны ажил эхэлсэн болохоор хаа сайгүй нэр дэвшигчдийн сурталчилгаагаар дүүрч эхэллээ. Гудамжны самбарууд тэр чигээрээ шахуу гишүүнд горилогчдын зураг хөрөг, элдэв амлалтаар дүүрч, хэдэн телевизүүд ч ялгаагүй зөвхөн сонгууль л гаргаж байна даа. За энэ ч яахав. Харин олон нийтийн харилцааны томоохон хэрэгсэл болох фэйсбүүк, твиттер зэрэг сайтуудад идэр насны залуус намаараа талцаж бие биенээ гутаах гэж ёстой үзэж тарах юм. Манай нам тийм, танай нам ийм гэж хэрүүл хийх нь наад захын хэрэг бөгөөд "халаад" ирэхээрээ бусад эвгүй хараалыг "гамгүй" цацах нь их л муухай харагдана.
Мэдээж хэн хэнд нь улс төрийн үзэл баримтлал байлгүй л яахав. Дэмждэг нам эвслийнхээ талд зогсолгүй л яахав. Гэхдээ түүнийгээ хэт үзэл байдлаар илэрхийлэх нь нэг л тиймхэн. Үнэндээ залуус улс төрөөр хэт халж хэдэн биенээ доош хийхийг хичээж байгаа нь муухай харагддаг. Угтаа өмнөх ажлаа дориухан сайн хийвэл залуусын яриад байдаг эх орноо хөгжүүлэхэд бага ч болов тустай санагдана. Судалгаагаар ажлын цагийн багагүй хэсэг нь буюу 20-40 хувь нь олон нийтийн харилцааны сайтуудад сэтгэгдэл үлдээх, найзынхаа зургуудыг үзэх зэрэгт зарцуулагддаг гэсэн тоо бий.
Харин сонгуультай холбоотойгоор уг тоон үзүүлэлт манайд нэлээд нэмэгдэж байгаа бололтой шүү. Бас нэр дэвшигчийг дээрх сайтуудаар дамжуулан интернэт идэвхтэй хэрэглэдэг хүмүүст сурталчлах гэсэн биш тэр чигээр нь сөрөг сэтгэгдлүүдээр булуулчих юм. Сонгууль болдгоороо болоод л өнгөрнө. Харин залуус маань улс төрөөр хэт хийрхэж элдэв янз болохоо бага ч атугай хязгаарлавал зүгээрсэн дээ. Амьдрал үргэлжилдгээрээ үргэлжлэхээс хойш. Харин сонгуулиа бол өгөх хэрэгтэй шүү.
Экспертүүдийн сэтгэгдэл
Одоогоор сэтгэгдэл нэмэгдээгүй байна. 
