АНУ-ын Ерөнхийлөгчөөр дахин сонгогдсон Барак Обама энэ цаг үеийн  хамгийн алдартай хүмүүсийн жагсаалтыг тэргүүлж байна. Кенийн жирийн нэгэн ямаа­чин Барак Хуссейны хүү Оба­ма эрх чөлөөний орон, хүсэл тэмүүлэл далласан Аме­ри­кийн тэргүүнээр хоёронтоо сонгогдсон нь түүхэнд тэм­дэг­лэгдэн үлдэх үйл явдал юм.

Барак Обамагийн аав Ба­рак Хуссейн Кенийн Няанза аймгийн Луо омгийнх. Тэрээр англичуудын зарц байсан нэгэн. Бусад кени эрчүү­дийн адил эцэгтэйгээ хамт ямаа ха­риулж, амьдралаа залгуул­даг байж. Барак Обамагийн түүх намт­рын гол зангилаа, хувь тавилан­гийн тайлал нь түүний эцэгтэй салшгүй хол­боо­той гэж хэлж болно. Тэ­рээр энэ тухайгаа "Ааваас минь өвлөсөн мөрөөдөл" но­мондоо дурдсан байдаг юм.

Барак Хуссейн жирийн ямаа­чин байснаа сурлага, хөдөлмөрийнхөө хүчээр АНУ-д тэтгэлэгтэйгээр сурал­цах эрх олж авсан нь амьд­ралаа шинээр нээх боломж олгосон гэдэг. Ингээд ямаа­чин залуу Америкийн Хавайд ирж суралцаж. Энэ үед тэрээр америк гэр бүлээс гаралтай цагаан арьст Стенли Анн Дунхамтай танил­цан гэр бүл болжээ.

Энэ бол 1960 он. Дараа жилийн наймдугаар сард залуу хосууд үрийн зулай үнэрлэж, нуган үрдээ Барак Обама гэх нэрийг хайрлажээ.

Барак Обама "Хэрэв аав минь хувь тавилантайгаа эвлэрч, ямаагаа хариулаад явсан бол би хорвоод мэнд­лэх байсан уу. Аав минь Хавайд ирээгүй байсан бол ээжтэй минь учрах байсан болов уу гэж би өөрөөсөө асуудаг байлаа. Энэ асуултыг өөрөөсөө асуух бүртээ аав­даа баярладаг" хэмээн ярь­сан байдаг. Гэхдээ тэрээр өөрийгөө ямаачин, малчны хүү гэдгээ хаана ч ярьж, ааваараа үргэлж бахарх­дагаа илэрхийлдэг нэгэн.

19 настай Обама эмээгийнхээ хамт. Кени

Судлаачид Барак Обама­гийн амьдралын эргүүлэгтэй мөч нь түүний эцэг эх хоёр тийш болсон үеэс Ерөнхий­лөгч болох үе гэж тайлбар­ладаг. Учир нь түүний эцэг эх салж тус тусдаа амьдрах болсон нь бяцхан хүүгийн амьдралд их нүүдэл суудлын эхлэл болжээ. Барак Хуссейн Аннаас салсныхаа дараа Америк руу Харвардад докторын зэрэг хамгаала­хаар явсан ч төд удалгүй Кени рүүгээ буцсан байдаг. Тэрээр харийн газарт мөнгө төг­рөг­гүй, нааш гэх ганц ч айлгүй учир арга буюу нутаг буцсан нь тэр.

Харин Анн Лоло Соеторо гэх индонез залуутай гэрлэж, хүү Барак Обамагаа аваад Жакарта руу нүүв. Обамаг арван нас хүрэнгүүт Анн Хавайд эцэг эх дээрээ буцаж ирсэн байдаг.

Ингээд Обама Хавайн алдарт Пунахоугийн акаде­мид элсэн орж 1979 онд онц дүнтэй төгсчээ. Түүнийг сурал­цаж байхад сургуульд нь түүнтэй нийлээд гурав­хан өнгөт арьстан байсан нь ертөнцийг таних, хүн хоорон­дын харилцаа, ялгаа зэргийг ухааруулсан гэдэг. Хэдий арьсны өнгөөр ялгагддаг ч Обама төрсөн болон хойд эцэг нар шигээ лалын шашин­тан байсангүй. Католик сур­гуульд сурч, ээжийнхээ аав ээж буюу өвөө эмээгийнхээ өгсөн хүмүүжлээр жинхэнэ америк хүмүүжил, сэтгэхүй, боловсролыг олж авсан бай­даг. Ийм жаягаар хүмүүжсэн нь түүнд нийгэмд байр сууриа хурдан олоход маш их дэмж­лэг үзүүлсэн.

Тэрээр Колум­бийн их сургуулийг улс төрийн чиглэлээр дүүргэ­чихээд Чикагод олон нийтийн байгууллагад хэсэг ажиллаад дараа нь Харвардын их сур­гуульд оржээ. Аавынх нь хүсч байсан ч төгсч чадаагүй сургуулийг Обама амжилттай дүүргээд зогсохгүй тус сур­гуулийн хуулийн сэтгүүлийн ерөнхий редактороор ажил­ла­сан нь зуу гаруй жилийн түүхтэй алдартай сэтгүүлийн анхны өнгөт арьстан ерөнхий редактор гэгдэж олны ха­раанд өртжээ. Обама аавын­хаа төгсч чадаагүй сургуу­лийг дүүргэснээр аавынхаа мөрөөдлийг биелүүлсэн гэж үздэг.

Ийнхүү улс төр, хуульзүйн ухааны чамгүй мэдлэгтэй идэрхэн залуугийн улс төрд орох замнал энэ үеэс эхэлсэн юм.

Түүнийг улс төрийн сал­барт цойлон гарч ирэхэд өр­сөл­дөгч, үл тоогчдоос эхлүү­лээд саад бэрхшээл их бай­жээ.

Гэхдээ тэр бүгд түүнийг ирлэж, зүлгэж улам өнгө оруулдаг байв. Тэрээр 2004 онд Ардчилсан намын их хурал дээр аавынхаа туулсан амьдралыг өгүүлж "Би жирийн малчнаас төрийн албан хаагч болж өөрийгөө ялан дийлсэн, тэмцэгчийн хүү" гэдгээ зарласан. Илэн да­лан­гүй яриагаар өөрийгөө танил­цуулсан нь түүнийг ард тү­мэнд нээж, нэр хүндээ өсгөхөд ихээхэн тус болсон юм.

Барак Обамагийн хувьд нээлттэй, ил тод гэдгээрээ ард түмнийхээ сэтгэлд нийц­дэг. Төрийн тэргүүнийх нь хувь амьдрал хэзээд америкчуу­дын хувьд хаалттай сэдэв байдаггүй. Ялангуяа Обама­гийнх. Тэрээр ч ийм байхдаа дуртай.