Зургаан хувийн орон сууцны зээлд хамрагдахаар Төрийн бан­кинд материалаа хүргүүлсэн иргэд хэвлэлийнхэнд хандсан. Тэд  "Жоннатан" компанитай орон сууц худалдан авах гэрээ байгуул­сан юм байна. Тус компанитай гэрээ байгуулсан 80 орчим хүний зээл батлагджээ. Харин материал нь банкинд шилжиж эдийн засагч дээр очсон 80 орчим хүний зээл гарах эсэх нь тодорхойгүй байгаа бололтой. Хэвлэлийнхэнд хандсан хүмүүсийн  нэг нь Г.Батцэнгэл. Төрийн банкинд долдугаар сард материалаа өгчээ. "Жоннатан" компанийн барьж буй  "Саруул тэнгэр-2" хотхонд 44 метр квад­ратын хоёр өрөө байр захиалж  12 сая төгрөгийн урьдчилгаа төлсөн байна.

Тэрээр "Төрийн банк "Жоннатан"-аас байр захиалсан хүн бүрд материалаа буцааж ав гэсэн шаардлага тавьж байгаа. Өмнө нь "Жоннатан"-аас олон хүнд зээл олгосон, одоо бусдад нь зээл олгомоор байна гэсэн тайлбар хэлсэн. Гэтэл энэ компанид 345 айл оруулах квотыг 100 мянган айл орон сууцны хөтөлбөрөөс өгсөн. Захиалсан байр маань 98 хувийн гүйцэтгэлтэй, 12 дугаар сараас айлуудаа оруулах гэж байна. Хэр­вээ бидний зээл энэ хугацаанд шийдэгдэхгүй бол гэрээ цуцлагдах тийшээ хандах юм шиг байна. 100 мянган айлын орон сууц хөтөл­бөрийн санхүүжилт яасныг мэдэх боломж жирийн иргэдэд алга" гэж ярьж байлаа.

Төрийн банкны зүгээс санхүүжилт зогссон учир иргэдийг материалаа эргүүлэн авахыг хүссэн аж. Тэд энэ сард багтаан зээлийн санхүүжилтийг шийдүүлэхийг УИХ, Засгийн газраас хүсэв.

Тэд хотын даргад хүсэлт хүргүүлжээ. Одоогоор хариу ирүүлээгүй байгаа гэнэ. Төрийн банкны удирдлагад ч ханджээ. Төрийн банкны хувьд санхүүжилт ороод ирвэл шийдэж болно  гэсэн хариу хэлсэн бололтой. Хэвлэлийн хурал зарласан иргэд  "Зуун мянган айлын орон сууц хөтөлбөрт  сан­хүүжилт орж ирвэл энэ хүмүүст зээлийг нь өгнө гэсэн шийдвэрийг Төрийн банк юм уу эрх бүхий газраас нь гаргаад өгвөл гэрээ байгуулсан компанитайгаа тохи­роод байр сууцандаа ороод явах боломжтой" гэж ярьж байв.

Төрийн банкны Бизнес хөгж­лийн хэлтсийн захирал А.Ганбаа­тараас энэ талаар тодруулахад "Манай банкны 109 дүгээр салбар барилгын 19 компанитай хамтран ажиллах гэрээтэй. Тэдний нэг нь "Жоннатан". Энэ компанитай орон сууц худалдан авах гэрээ байгуул­сан 80 хүн манайхаас зээл авсан. "Жоннатан" манайтай дөрвөн тэр­бум төгрөгийн батлан даалтын гэрээ байгуулсан юм.

Одоогоор 3.6 тэрбум төгрөгийн зээл буюу батлан даалтын хэмжээний 80 хувийг нь олгоод байна. Үлдсэн 400-гаад сая төгрөгийн зээлийг нь олгоно. Бат­лан даалтын хэмжээ болсон уч­раас зарим иргэдийн хувьд ийм асуудал гарч байгаа. "Жоннатан"-тай гэрээ байгуулсан олон хүний зээл гарсан учраас дахиж олгохгүй гэсэн шаардлага тавиагүй" гэж ярилаа.

Банкны зүгээс байр нь ашиг­лалтад ороогүй хүмүүсээс өөр байр барьцаал гэсэн шаардлагыг тавьж буй.  "Жоннатан" компанийн хувьд гэрээ хийсэн иргэдийнхээ өмнөөс батлан даалтын гэрээ байгуулжээ. Өөрөөр хэлбэл эдний компанитай гэрээ байгуулсан иргэд барьцааны өөр байр хайх шаардлагагүй гэсэн үг. Батлан даалтынх нь хэмжээ дууссан учраас "Жоннатан"-тай орон сууц худалдан авах гэрээ байгуулсан хүмүүсийн зээлийн асуудал шийдэгдэх боломжгүй болчихоод  байгаа аж.

Төрийн банкинд өнгөрсөн до­лоо хоногт "100 мянган айлын орон сууц" хөтөлбөрийн 10 тэрбум төг­рөгийн санхүүжилт  орж иржээ.

Үүнээс өмнө тус банк  40 тэрбум төгрөгийн зээл олгоод байсан юм. Засгийн газар "100 мянган айлын орон сууц" хөтөлбөрийг хэрэгжүүлж эхлэхдээ эхний ээлжинд 50 тэрбум төгрөгөөр санхүүжүүлнэ гэж байв. Энэ мөнгөний сүүлч нь болох 10 тэрбум төгрөгийг олгож эхлээд байгаа аж. Нийтдээ 250 гаруй хүнд зээл өгөх мөнгө л  бэлэн байгаа бололтой. Энэ мөнгийг зээлийн шаардлага хангасан хүмүүст он­доо багтан олгоно гэсэн тайлбарыг тус банкнаас өгч байна.

Засгийн газрын түвшинд одоо­гоор нэмэлт санхүүжилтийн асуу­дал яригдаагүй байна. Засгийн газар "100 мянган айлын орон сууц" хөтөлбөрийг цаашид яаж хэрэгжүүлэх тал дээр ажлын хэсэг гаргажээ. Ажлын хэсэг хөтөлбөрийг энэ хэвээр нь үргэлжлүүлэх үү, хэлбэрийг нь өөрчлөх үү гэдгээ ярилцаж байгаад шийдэх болол­той.