Британийн нэгэн сайд телевизийн шууд ярилцлагаа таслаад нам унтчихжээ. Үүнээс үүдэн “Нойрноос морио...” алдсан улстөрчдийн талаарх яриа дахин сөхөгджээ. Энэ талаар “Аргументы и факты” сэтгүүлд гарсан материалыг товчлон хүргэе.

Сайдыг яаж сэрээх вэ

Их Британийн Хөдөл­мөрийн сайд Мэттью Хэнкок

Их Британийн Хөдөл­мөрийн сайд Мэттью Хэнкок тус улсын “ITV” сувгийн өглөөний шоунд оролцох ёстой байжээ. Уг шоугаар тэрбээр 16-24 насны залууст ажил хөдөлмөрийн зөвлөгөө өгөхөөр төлөвлөжээ.

Гэвч англи залуучууд сай­­­­­дын зөв­­лөгөөгүйгээр асууд­­­­лаа шийдэхээс өөр арга­гүй бо­лов. Учир нь, Хэнкок шоу­­­­наас ганцхан минут хо­цортол студид оруу­лаа­гүй байна. Тэгэхээр тус теле ком­панийн журам Хөдөл­мөрийн яамныхаас ч хатуу бололтой.

Хэнкок сайд цагтаа сэрж чадаагүйгээ хүлээжээ. Энэхүү шууд ярилцлагыг өглөөний 06:40 цагт  тө­лөв­лөсөн байсан тул унтаад хоцорсон байх магадлалтай аж. Яагаад гэвэл дэлхийн ихэнх  орнуудын ажил хэ­рэгч хүмүүст үүрийн зургаан цаг гэдэг өглөө биш, дуг нойрондоо дугжирдаг үе юм.

Үнэндээ Хөдөлмөрийн сайд руу теле компанийн зү­гээс машин илгээсэн гэдэг. Гэвч “нойрсож буй сайд”-ыг жолооч яаж сэрээж чадах билээ. Гэрт нь дайрч ороод, хувинтай хүйтэн ус өвөр рүү нь цацалтай биш.

Гэхдээ Их Британийн Хөдөлмөрийн сайд л ганцаа­­­­­­­раа нойроо дийлдэг­гүй улстөрч биш аж. Ид хур­­­­­лын үеэр “давсандаа яв­­сан” парламентын гишүүд, генералуудын зураг интернэтэд өчнөөн байдаг билээ.

Мэргэжлийнхэн зогсоогоороо унтдаг

Нойр гэдэг Гүржийн Ерөн­­хийлөгч Михаил Саа­кашвили мэтийн эрч хүчтэй улстөрчийг ч сөхрүүлдэг зүйл бололтой. 2009 онд Ми­­­шико Украины төрийн тэргүүн Виктор Ющенкотой уулзах ёстой байж.

Гэтэл Саакашвили урьд шөнө нь Украины теле шоунд оролцож, дараа нь шө­нийн клубт үүр цайтал зугаацсан тул босч чадаагүй байна.

Италийн Ерөнхий сайд асан Сильвио Берлускони

Ющенког бүтэн цаг хү­лээлгэсний эцэст хүрч ирсэн Саакашвилигийн царайг хараад сэтгүүлчид юу болс­ныг шууд ойлгожээ.

Мөн дэлхийн улстөрчдөөс хамгийн их зугаа цэнгэл хөөдөг хүнээр яах аргагүй Италийн Ерөнхий сайд асан Сильвио Берлускониг нэр­лэдэг аж. Тэрбээр Берлиний ха­ныг нураасны 20 жилийн ойн баярт оролцох үеэрээ олон орны сайд нарын өмнө унтсан юм.

Уг нь тэр хэнд ч анзаа­рагдахгүй нойроо авахыг хүссэн ч сонор соргог сэт­гүүлчид “нойрсож буй Силь­вио”-г хальснаа буул­гахаа мартсангүй. Хам­гийн  атаарх­маар нь Сильвио зог­соо­гоороо унтаж чаддаг аж.

Ельцин архинаас болж нам унтжээ

Улстөрчдийн нойртой хол­боотой Оросын хамгийн том шуугианаар яах арга­гүй Ельциний түүхийг нэр­лэж болно. ОХУ-ын Ерөн­­хийлөгч Борис Ельцин 1994 онд АНУ-д айлчлаад буцахдаа Ирландад түр зог­солт хийх ёстой байжээ. Ерөн­хийлөгчийн онгоц Шэн­нон нисэх онгоцны буу­далд газардахад Ерөнхий сайд тэргүүтэй төлөөлөгчид зочдоо угтан авахаар бэлтгэв.

ОХУ-ын Ерөн­­хийлөгч асан Борис Ельцин

Гэтэл онгоц газардаад 20 минут боллоо, байдаггүй. Удаж удаж Шадар сайд Олег Сосковец хөлгөөс цухуйж, Ерөнхийлөгчөө хэлэлцээ хийх  боломжгүй болсныг зар­­­лав. Борис Ельцин Моск­вад ирээд, уулзалтын үеэр унт­сан байсан, хэн ч өөрийг нь сэрээж зүрхлээгүй гэдгийг хүлээжээ.

Хожим нь түүний хам­гаалалтын албаны тэргүүн Александр Коржаков дур­самж номондоо “Ерөн­хий­лөгч АНУ-аас нисэхээсээ л онгоцонд архи хэтрүүлэн хэ­рэглэж, бие нь тааруу бай­сан” гэж бичжээ.

Зүүдэндээ залбирсан нь

АНУ-ын дэд Ерөнхийлөгч Жо Байдан

Дэлхийн хүчирхэг гү­рэн АНУ-ын улстөрчид ч ажил дээрээ сайн унтдаг. 2011 оны хавар тус улсын Ерөнхийлөгч Барак Обама улсынхаа төсвийн алдагдлыг бууруулах төлөвлөгөөгөө олон нийтэд танилцуулсан. Ха­рин энэ үеэр түүний баруун гар, дэд Ерөнхийлөгч Жо Байдан сандал дээрээ тухтай суугаад нойрсож байжээ. Байден энэ үеэр терроризмыг ялж, төсвийн алдагдлаа арилгасан агуу их Америк орныг зүүдэлсэн нь лавтай.

Обамаг төлөвлөгөөгөө та­­нилцуулсны дараа хэв­лэ­лүүд түүний хэлснийг бус, Байдены унтсаныг хам­гийн ихээр хөндсөн гэдэг.

Шинжээчид дэд Ерөн­хийлөгчийг нүдээ аниад, юм бодож байсан, унтсан гэж маргалдаж  байх   хоо­ронд Бүгд   найрамдах   на­мын  Майк Хаккаби хам­гийн оновчтой хувилбар дэв­шүүлсэн юм. Тэрбээр “Бай­ден энэ үеэр Обамагийн төлөвлөгөө ам­жилттай бо­лоосой гэж зал­бирч байсан” гэжээ.

Эндээс үзэхэд дэлхийн улстөрчид ажлын байрандаа унтах нь хэвийн үзэгдэл бо­лолтой. Харин бид тэдэнд сайхан нойрсохыг ерөөх л үлдлээ. Яагаад гэвэл тэд­нийг унтаж байх хооронд дэл­хий дахинд тэнэг хууль бат­лагдахгүй, утгагүй дайн зарлагдахгүй шүү дээ.