УИХ-ын Эдийн засгийн байнгын хорооны хурлаар Төрөөс мөнгөний бодлогын талаар 2014 онд баримтлах үндсэн чиглэлийн төслийг хэлэлцлээ.

Хэлэлцүүлгийн үеэр Монголбанкны ерөнхийлөгч Н.Золжаргал 2013 онд яагаад мөнгөний тэлэх бодлого хэрэгжүүлсэн, бодлогын үр дүн ямар байгаа талаар болон 2014 онд хэрэгжүүлэх бодлогын үндсэн зорилтуудын талаар илтгэл тавьж, гишүүдийн асуултад хариулсан юм.

Түүний хэлж буйгаар ирэх онд Монголбанк инфляцийг бууруулах, макро эдийн засгийн болон санхүүгийн тогтвортой байдлыг бэхжүүлэх бодлогоо үргэлжлүүлэхийн зэрэгцээ дотоодын үйлдвэрлэлийг дэмжих замаар гадаад эдийн засгаас хамаарах хамаарлыг багасгах, эдийн засгийн дархлааг сайжруулахад бодлогоо чиглүүлэх аж.

Н.Золжаргал ерөнхийлөгчийн мэдээллийн дараа 2013 онд хэрэгжүүлсэн мөнгөний бодлогын үр дүн хийгээд ирэх онд баримтлах бодлогын талаар гишүүд юу хэлснийг хүргэж байна.

УИХ-ын гишүүн Д.Ганбат:

Төрөөс баримтлах мөнгөний бодлого ирэх оны хувьд маш чухал. Валютын ханш наймдугаар сараас хойш 200 гаруй төгрөгөөр өсчихлөө. Цаашид яах нь тодорхойгүй байна. Хөрөнгө оруулалт буурсан.

Нэг ёсондоо биднийг хүнд өдрүүд хүлээж байна. Тэгэхээр мөнгөний бодлогодоо маш нухацтай хандах ёстой. Хэрэгжүүлж эхэлсэн дундаж давхаргыг дэмжсэн 7-9 хувийн хүүтэй зээлээ тууштай явуулах хэрэгтэй.

Мөнгөний бодлогодоо маш нухацтай хандах ёстой.

Хэдэн жилийн дараа бид дундаж давхарга, ажил хийдэг хүмүүсээ дэмжсэн бодлого явуулаад тодорхой үр дүнд хүрч 24 мянган айл өрх үүний үр дүнг амссан, дахиад 40 мянган айл өрх ойрын хугацаанд хамрагдах, цаашид 600 мянган өрхийн 400 мянга нь үүнд хамрагдсан байгаасай гэж хүсч байна.

Тиймээс энэ бодлогоо дор хаяж таван жил тогтвортой явуулах хэрэгтэй. Нөгөө талаас зээлийн хүү сүүлийн үед их өндөр байна. Нэг хэсэг цөөхөн хэдэн компани биш нийтэд хүртээх бодлого барьж байсан. Үүнийг явуулах хэрэгтэй. Хамгийн бага нь 1.5 дээд тал нь 4.0 хувийн хүүтэй байна. Үүнийг инфляцитай уялдуулаад нэг хувь болгох хэрэгтэй байна.

Д.Ганбат: Биднийг хүндхэн өдрүүд хүлээж байна