Цөмийн энергийн газрын дэргэдэх эрдэмтдийн зөвлөл өчигдөр ээлжит хурлаа хийлээ. Тус хурлаар ураны тухай мэдээллийг олон нийтэд зөв өнцгөөс хүргэх хийгээд дэлхий дээр шар нунтагийн олборлолт ямар байдаг талаар хэлэлцсэн юм. Засгийн газрын мөрийн хөтөлбөрт ураныг шар нунтаг болгон боловсруулж экспортлохоор тусгаад байгаа.

Иймд зөв технологиор олборлохоос гадна малчдад ураны талаар танин мэдэхүйн мэдээлэл хүргэх шаардлага тулгарч буйг онцоллоо. ЦЭГ-ын Цөмийн технологийн газрын дарга М.Чадраабал “Дэлхийн нийт уран олборлолтын 45 хувийг газар доор уусгах аргаар олборлодог. Байгаль экологид хоргүй гэж үзвэл эл , аргаар олборлох нь ашигтай.

Нэг баяжуулсан уран 170 тонн нүүрстэй тэнцэх хэмжээний эрчим хүч ялгаруулдаг учраас өндөр хөгжилтэй орнууд цөмийн эрчим хүчээс татгалзаж чадахгүй байгаа юм. Манайхаас бусад оронд арван жилийн сургуульд цөмийн технологи, эрчим хүчний талаар хичээл ордог юм билээ. БНСУ-д цөмийн салбарыг сурталчилдаг бүхэл бүтэн агентлаг ажиллаж байна” гэдгийг хэлж байсан.

Түүнчлэн Монгол Улсын зөвлөх инженер Г.Жамсрандорж “Уран гэхээр манайхан аюултай хортой гэж ойлгодог. Хүйтэн дайны үед л нууж байсан болохоос Дорнодын ураны ордын ойролцоо малчид нь малаа хариулаад, цагаан зээр нь идээшлээд байж л байна. Одоогоор ураны арав орчим ордыг илрүүлчхээд байгаа. Нөөцөөр ч боломжийн байна. Тэгэхээр ашиглах цаг болсон” хэмээв.

Эрдэмтэд уран олборлох асуудлаар зөвлөлдөв