Шилдэг сумын мялаалга наадам болов
Улсын тэргүүний Эрдэнэмандал сум энэ сарын 4,5-нд мялаалга наадмаа зохион байгууллаа.
Наадмын үйл ажиллагаанд Монгол улсын Шадар сайд Д.Тэрбишдагва, аймгийн Иргэдийн хурлын дарга Ч.Мөнхбат, Засаг дарга Д.Бат-Эрдэнэ, Улаанбаатар хот дахь Эрдэнэмандал сумын нутгийн зөвлөлийн дарга П.Мөнхжаргал тэргүүтэй төрийн төлөөлөл Улаанбаатар, Эрдэнэт, Дархан хот дахь нутгийн зөвлөлийн төлөөлөл, газар газарт амьдарч буй Эрдэнэмандал сумын уугуул иргэд хүрэлцэн иржээ.
Сумын удирдлагууд буянт сүргийн эзэд болсон малчдынхаа анхдугаар зөвлөлгөөнийг зохион байгуулж, энэ үеэр аймгийн Халамж үйлчилгээний хэлтэс, Нийгмийн даатгалын хэлтэс, Хөгжлийн бодлогын хэлтэс, Хөдөө аж ахуйн газар зэрэг хэлтэс агентлагийн төлөөлөл хүрэлцэн ирж малчдад цаг үеийн мэдээлэл өгч, сонирхсон асуултуудад хариулж байлаа.
Мялаалга наадам төрийн үйлс мандан бадрахын бэлгэдэл есөн хөлт цагаан тугаа залж, төрийн дууллаа эгшиглүүлэн хүндэтгэлтэйгээр эхэлсэн.
Наадамд аймаг сумын цолтой 64 бөх барилдаж, зургаан насны морьд уралдуулан, сурын харваа, гар шагайн тэмцээнүүдийг уламжлал ёсоор зохион байгуулсан юм.
Монгол улсын Ерөнхийлөгчийн зарлигаар Алтан гадас, Хөдөлмөрийн хүндэт, Хөдөлмөрийн гавьяаны улаан тугийн одонгоор шагнагдсан хүмүүст шагнал гардуулах ажиллагаатай зэрэгцэн аймгийн Засаг дарга Д.Бат-Эрдэнэ тус сумын багийн эмч нарт мотоцикль бэлэглэв.
Тэрбээр шагнал гардуулах үеэр хэлсэн үгэндээ: Хүн, малын амьдрах таатай нөхцөл бүрдсэн энэ сайхан нутагт төрж өссөн хэн бүхэн төрлөх нутгаараа бахархаж, хүйн холбоотой явдаг.
Эртний хүн гүрний өлгий нутаг эдүгээгийн улсын шилдэг сум болсон Эрдэнэмандалынхан хөдөлмөрч, ажилсаг ард түмэн. Мал сүргээ үеийн үед өсгөн үржүүлж, нутаг орныхоо нэр алдрыг түгээн дэлгэрүүлж буй ард иргэддээ баяр хүргье гэлээ.
Дашрамд дуулгахад ирэх жил Эрдэнэмандал сум 90 жилийн ойгоо тэмдэглэх бөгөөд түүхт ойноосоо өмнө улсын төсвийн хөрөнгө оруулалтаар шинэ сургуультай болохоос гадна Эрүүл мэндийн сайд сумандаа шинэ эмнэлгийг барьж ашиглалтад оруулахаар төлөвлөж байгаа гэнэ.
Энэ суманд хүүхдийн цэцэрлэг, Засаг даргын тамгын газрын барилга, сүм хийд гээд бүгд шинээр баригдсан бөгөөд 2014 оноос Үйлдвэр технологийн паркийг улсын төсвөөр барих юм. Мөн “Идэр-Улаан” багийн төвийг шинээр байгуулах ажээ.
