УИХ дахь МАН-ын бүлгийн хуралдаанд Монголбанкны ерөнхийлөгч Н.Золжаргалыг урьж, төрийн мөнгөний бодлого ямар байгаа, валютын нөөц яагаад хасах баланс руу орсон талаар тодорхой мэдээлэл авахыг хүссэн ч "өвчтэй" гэсэн шалтгаанаар ирсэнгүй.

2015 онд төрөөс баримтлах мөнгөний бодлогын баримт бичигт тусгаснаар Монгол Улсын гадаад цэвэр активын хэмжээ есөн сарын байдлаар хасах 972 тэрбум төгрөг болсон байна. 2012 онд 4402 их наяд төгрөг байсан гадаад цэвэр актив хасах дүнтэй болтлоо буурчээ. Тиймээс Монголбанкны ерөнхийлөгчийг байлцуулан дээрх мэдээллийг асууж тодруулах ёстой гэж үзэв.

Д.Оюунхорол: Иргэд рүүгээ чиглэсэн бодлогыг яаралтай хэрэгжүүлэх хэрэгтэй 

УИХ дахь МАН-ын бүлгийн хуралдаанаар ирэх оны төсвийн төслийг хэлэлцжээ. Ирэх оны төсвийн төслийг Засгийн газарт буцаан татаж дахин өргөн барьсан ч үнэхээр сул, иргэд рүүгээ чиглэсэн дорвитой дэмжлэг байхгүй төсөв болсныг бүлгийн гишүүд онцлон тэмдэглэжээ.

Улсын төсвийн зардлыг сайд тус бүр дээр 50 хувиар бууруулах ёстой. Мөн эд хогшил, тавилга хэрэгслийн зардлыг хасах, томилолт, зочны зардлыг багасгах зэргээр нийтдээ 530 тэрбум төгрөгийн зардлыг бууруулах боломжтой гэж МАН-ын бүлэг үзсэн бөгөөд энэ саналаа Төсвийн байнгын хороонд саналаа хүргүүлнэ гэв.
 

Ялангуяа цалин тэтгэврийг 30 хувиар нэмэгдүүлэх, таван төсөвтэй болсныг нэг болгох шаардлага хангагдсангүй гэж МАН-ын бүлэг үзэж байна. Мөн ДНБ-д эзлэх өрийн босгыг 90 хувьд хүргэхийг дэмжихгүй, хөрөнгө оруулалт нь царцаагдсан 328 төсөл, арга хэмжээний санхүүжилтийг шийдэх ёстой гэсэн байр суурьтай байна.

Орон нутгийн эрх мэдлийг нэмэгдүүлэх нэрээр ирэх онд хөрөнгө оруулалтыг задаргаагүй, санхүүжүүлэх эх үүсвэр нь тодорхойгүй ерөнхий дүнгээр нь төсөвт тусгажээ. Тиймээс объект нэг бүрийг мөнгө санхүүтэй нь төсөвт тусгаж баталж өгөх ёстой гэж МАН-ын бүлэг үзэж байна. Мөн УИХ-ын 34 дүгээр тогтоолоор өгөгдсөн зардлыг 20 хувиар бууруулж хэмнэлтийн горимд шилжих үүрэг ирэх оны төсвийн төсөлд огт хэрэгжсэнгүй.

Төсвийн төсөлд урсгал зардлыг 11.5 хувь буюу 807.6 тэрбум төгрөгөөр төсвөө нэмэгдүүлэхээр оруулж иржээ. Эдийн засаг хямарсан үед тансаг хэрэглээгээ аль болохоор бууруулах ёстой.

Тухайлбал, зардлыг сайд тус бүр дээр 50 хувиар бууруулах ёстой гэж үзлээ. Мөн эд хогшил, тавилга хэрэгслийн зардлыг хасах, томилолт, зочны зардлыг багасгах зэргээр нийтдээ 530 тэрбум төгрөгийн зардлыг бууруулах боломжтой гэж үзэж Төсвийн байнгын хороонд саналаа хүргүүлнэ гэж бүлгийн дэд дарга Д.Оюунхорол мэдээллээ.

Төсвийн төсөлд урсгал зардлыг 11.5 хувь буюу 807.6 тэрбум төгрөгөөр төсвөө нэмэгдүүлэхээр оруулж иржээ.

Мөн ирэх оны төсвийн төсөлд цалин, тэтгэврийг 30 хувиар нэмэгдүүлэх, Хүний хөгжил сангаас анхаарал халамж нэн тэргүүн хэрэгтэй зорилтот бүлгийнхэнд сар бүр 20 мянган төгрөг олгох шаардлагатай байгааг онцлов. Ажилгүй, орлогогүй эмзэг бүлгийнхэнд энэ мөнгө маш их хэрэгтэй нь орон нутагт ажиллах үеэр мэдрэгдэж байгааг бүлгийн дэд дарга Д.Оюунхорол хэллээ. Мөн одонтой эхчүүдэд олгодог мөнгөн тэтгэлгийг нэмэгдүүлэх, оюутнуудын тэтгэлгийн хэмжээг хөдөлмөрийн хөлсний доод хэмжээний 50 хувьтай тэнцэх буюу 96 мянган төгрөг болгож, зөрүүг төсөвт суулгах  ёстой гэв.  

ТЕГ-ын асуудлаар Тусгай хяналтын дэд хороонд хандана

ТЕГ нь ажлын бус цагаар, прокурорын байгууллагын зөвшөөрөлгүй сэтгүүлчдийг байцааж, хуулиар тусгайлан өөрт нь харьяалуулаагүй асуудлаар улстөржиж байна гэж МАН-ын бүлэг үзлээ. "Улс төрийн намын байранд ямар ч зөвшөөрөлгүй нэвтэрч, эд хогшил хураан авч, сэтгүүлчид, иргэд, жиргээчид, УИХ-ын гишүүний туслахыг дуудаж байцаасан үйлдлүүд гарлаа.

ТЕГ нь Ерөнхий сайдын хувийн мөрдөх товчоо шиг ажиллаж байна гэсэн зарим хүмүүсийн шүүмжлэлд анхаарлаа хандуулах ёстой" гэж МАН-ын бүлгийн дэд дарга Д.Оюунхорол хэллээ. Иймд ТЕГ-ыг хуулийн дагуу ажиллуулах талаар УИХ-ын дарга болон Тусгай хяналтын дэд хороонд шаардлага тавихаар болов.