Монгол Улс болон Бүгд Найрамдах Солонгос Улс хооронд дипломат харилцаа тогтоосны 35 жилийн ойн хүрээнд Монгол Улс болон БНСУ-ын хамтын ажиллагааны олон улсын бага хурал өчигдөр /2025.04.15/ боллоо. Нээлтийн арга хэмжээнд хүндэт зочноор Монгол банкны Ерөнхийлөгч Б.Лхагвасүрэн, УИХ-ын гишүүн, Монгол Улс-БНСУ-ын Парламентын бүлгийн дарга Ж.Чинбүрэн, бүлгийн гишүүн Б.Мөнхсоёл, Г.Уянгахишиг нар оролцлоо.

Хоёр улсын эдийн засгийн хамтын ажиллагаа нь 1990 оноос хойш тасралтгүй өсөн нэмэгдэж буй бөгөөд 1990 оны байдлаар хоёр улсын гадаад худалдааны эргэлт 2,7 сая байсан бол 2024 оны эцэст 620 сая ам.доллар болж өсөн нэмэгдээд байна. Монгол Улсын хувьд БНСУ-аас суудлын машин, ачааны машин, тамхи, гоо сайхны бүтээгдэхүүн зэргийг голчлон импортолдог бол тус улсад молибден, жонш зэрэг ашигт малтмалын төрөл, ноолууран хувцасны төрлийн бүтээгдэхүүн экспортолдог.

Олон улсын хурлын үеэр оролцогчид Монгол Улсын нийгэм, эдийн засгийн өнөөгийн нөхцөл байдал, эдийн засгийн гадаад секторын тойм, хоёр улсын хоорондын худалдааны өнөөгийн нөхцөл байдал, цаашид худалдааг өргөжүүлэх боломжийн талаар хэлэлцүүллээ.
Монголбанк нь БНСУ-ын Төв банктай хамтран Мэдлэгийн түншлэлийн хүрээнд (KKP)-ийг хэрэгжүүлдэг бөгөөд хөтөлбөр нь Төв банкны ажилтнуудын чадавхыг бэхжүүлэх, санхүүгийн зах зээлийн хөгжил, мөнгө, санхүүгийн бодлого, санхүүгийн тогтвортой байдал зэрэг олон чиглэлээр шинэлэг мэдлэг туршлагыг хуваалцах боломжийг олгодог билээ.