Монгол Ардын Намын бүлгийн өчигдрийн хуралдаанаар Тавантолгойн ордыг ашиглах тухай УИХ-ын 39 дүгээр тогтоолд нэмэлт, өөрчлөлт оруулах тухай асуудлыг хэлэлцсэн. Ингэхдээ "Ард иргэдэд эзэмшүүлэх 536 ширхэг хувьцаан дээр нэмж 536 ширхэг хувьцааг өгөх нь зүйтэй" гэж үзлээ. Харин Үндэсний аж ахуйн нэгж компаниудад хувьцааны тодорхой хэсгийг худалдах боломжийг олгох ёстой. Бусад асуудлыг Засгийн газар дүрэм, журмаараа зохицуулах хэрэгтэй гэсэн байр суурийг тус намын бүлэг илэрхийллээ. Ийм байдлаар тогтоол гарвал өнөөдрийн хүсэн хүлээж байгаа шаардлагад нийцнэ гэж бүлгийн гишүүд үзжээ. Уг асуудал Монгол Ардын Намаас амласан 1.5 сая төгрөгийн амлалттай холбоотой гэдгийг Монгол Ардын Намын бүлгийн дарга Ө.Энхтүвшин онцолсон. Дээрх амлалтын нэг хэсэг болох 500 мянган төгрөгийг ард иргэдэд олгоод дуусч байгаа. Харин 128 мянган төгрөгийг энэ оны эхний хагас жилд олгож дуусгах юм. Монгол Ардын Намын бүлгээс үлдсэн сая төгрөгийг ард иргэдэд яаж олгох вэ гэдэг асуудлыг мөн ярилцжээ. Ард иргэдэд 1072 ширхэг хувьцаа олгоно. Үүний нэрлэсэн үнийг тогтоосны дараа ард иргэд мөнгөө авах уу, хувьцаагаа авах уу гэсэн сонголтыг хийнэ. Хэрэв иргэн Та мөнгөө авна гэсэн тохиолдолд үндэсний компаниудад нэрлэсэн үнээр нь Таны хувьцааг борлуулсны дараа авах боломжтой болох аж. Харин хувьцаагаа авах хүсэлтэй иргэнд хувьцаа нь үлдэх аж. 2012 оны улсын төсөвт ахмадууд, 55-аас дээш насны эмэгтэй, 60-аас дээш насны эрэгтэйчүүдэд болон хөгжлийн бэрхшээлтэй 108 орчим мянган иргэнд олгох нэг сая төгрөгийн санхүүжилтийг тусгажээ. Үлдэж байгаа хүмүүсийн хувьд тодорхойгүй байгаа юм байна. Хэлэлцсэн хоёр дахь асуудал нь Орон нутгийн сонгуулийн тухай хуулийн төсөл юм. Д.Лүндээжанцан зэрэг гишүүд уг хуулийн төслийг Засгийн газарт өргөн барьжээ. Засгийн газар богино хугацаанд даруй хуулийн төсөлд саналаа өгвөл уг асуудал энэ долоо хоногт хэлэлцэгдэх боломжтой. Өнөөгийн хүчин төгөлдөр байгаа хуулиар УИХ-ын сонгууль, Орон нутгийн сонгууль хоёр нэг өдөр болохоор байгаа. Гэтэл уг асуудал дээр тодорхойгүй зүйлүүд нэлээд бий гэдгийг хоёр намын бүлгийн гишүүд хэлж байна. Жишээлбэл, УИХ-ын сонгуулийн санал авах хугацаа нь өглөөнөөс оройны 20.00 цаг хүртэл байгаа бол орон нутгийн сонгуулийнх оройны 22.00 цаг хүртэл үргэлжлэхээр байгаа. Мөн УИХ-ын сонгуулийн дүнг автомат машинаар тоолох бол, орон нутгийн сонгуулийн дүнг гараар тоолно гэх мэт зөрүүтэй, ойлгомжгүй зүйлүүд байгаа юм. Удахгүй УИХ-ын намрын чуулган завсарлана. Үүнээс өмнө дээрх асуудлыг шийдвэрлэх цаг хугацааны шаардлага бий гэдгийг бүлгийн гишүүд хэлж, саналаа нэгтгэсэн байна.
Энэ өдөр АН-ын бүлэг Орон нутгийн сонгуулийн тухай хуулийн төслийг мөн хэлэлцсэн. Ингэхдээ Орон нутгийн сонгуулийн үйл явцыг УИХ-ын сонгуультай нэгтгэх шаардлагатай хэмээн үзсэн байна. Тиймээс АН-ын бүлэг З.Энхболд гишүүнээр ахлуулсан ажлын хэсгийг гаргаж, ойрын хугацаанд хуулийн төсөл боловсруулан Засгийн газарт өргөн барих юм. УИХ-ын сонгуулийн тухай хуулиар цагаан сараар бэлэг тараах, тэмцээн уралдаан зохиох гээд мөнгөөр сонгогчдын саналыг татах үйл ажиллагааг хориглосон. Гэтэл орон нутгийн сонгуульд нэр дэвших хүнээр дамжуулан УИХ-ын сонгуульд нэр дэвшигчид сурталчилгаа хийдэг. Үүнийг орон нутгийн сонгуулийн хуулиар яаралтай хориглох хэрэгтэй гэж булгийн гишүүд санал нэгджээ. Харин Орон нутгийн сонгуулийг УИХ-ын сонгуультай нэг өдөр явуулах тухайд АН-ын бүлгийн дэд дарга Л.Гантөмөр " Нэг өдөр явуулах нь өндөр ач холбогдолтой. УИХ-ын сонгууль гэхэд намыг нь дугуйлаад, дээр нь 2-3 хүн дугуйлна. Орон нутгийн сонгууль бол аймгийн ИТХ-ын гурван хүн, сумын ИТХ-ын гурван хүн гээд зургаан удаа дугуйлна. Энэ хоёр нийлэх юм бол 10-11 удаа дугуйлна. Тэгэхээр сонгогчдод л хүндрэл гарахаас биш зохион байгуулалтад ямар ч хүндрэл гарахгүй. Тооллогыг машинаар хийнэ. Хэсэг тойргийн хороогоо ч нэг удаа зохион байгуулна гээд зардал чирэгдэл багатай болно" гэлээ.
-Нэг сая төгрөгийг 1072 ширхэгхувьцаатай дүйцүүлэн аль нэгсонголтоо хийхээр болж байна уу?
-Иргэдээр сонголт хийлгэхийн тулд саналыг нь асууна. Зарим хүмүүс нэг сая төгрөгөө авах хүсэлтэй байж болно шүү дээ.
-Нэг сая төгрөг, хувьцаа хоёр чинь тус тусдаа асуудал юм биш үү?
-Нэг зүйлийг л хоёр талаас нь яриад байгаа юм.
-Оюутнуудын тухайд яах вэ. Тэдсургалтын төлбөр хэлбэрээр мөнгөөавчихсан. Хувьцаа ногдох уу?
-170 мянга гаруй оюутнуудын тухайд ийм асуудал байгаа. Тэд сургалтын төлбөр хэлбэрээр мөнгөө авчихсан.Үүнийг Засгийн газар журам, дүрмээрээ шийднэ.
-Өндөр настан, хөгжлийнбэрхшээлтэй иргэдэд цагаан сарынөмнө нэг сая төгрөгийг нь олгох уу?
-Энэ хүмүүсийн мөнгө төсөвт туссан. Төрийн санд мөнгө нь ороод ирвэл өгөх талаас нь ажиллана.
-Хувьцааны нэрлэсэн үнийг тогтоосон уу?
-УИХ дээр хувьцааны нэрлэсэн үнийг тогтоогоогүй байна. Урьдчилсан байдлаар олон улсын санхүүгийн байгууллагууд "Тавантолгой"-д ямар хэмжээний үнэ өгснөөс нь шалтгаалж, нэг хувьцаа нь 1000 орчим төгрөг байх болов уу гэсэн яриа гарсан. Үүнийг одоогоор тогтоогоогүй. Гэхдээ нэрлэсэн үнэ гарч таарна.
