Өнөөдөр Нийгмийн бодлого, боловсрол, соёл, шинжлэх ухааны байнгын хорооны хуралдаанаар Биеийн тамир, спортын тухай хуулийн шинэчилсэн найруулгын төслийн хэлэлцэх эсэх асуудлыг хэлэлцэн шийдвэрлэлээ. 

Хэлэлцүүлгийн үеэр УИХ-ын гишүүн Б.Баттөмөр өөрийн саналыг дэвшүүлсэн юм. 

УИХ-ын гишүүн Б.Баттөмөр:

"М.Билэгт гишүүний асуусан тамирчдын шагнал, урамшуулалтай холбоотой асуудлыг хөндөж тавихыг хүслээ. Эдийн засгийн өсөлт 17 хувьд хүрч байсан цаг үед тамирчдад олгох мөнгөн урамшуулал тогтоосон байх. Харин өнөөдөр нөхцөл байдал хүндрэлтэй байгаа хэдий ч нэгэнт хүрсэн түвшингээс ухрах нь оновчтой биш. Тиймээс тамирчдад олгох шагнал, урамшууллын хувь хэмжээг тогтоохдоо сайтар бодох хэрэгтэй.

Зах зээлийн нийгмийн гол мөн чанар бол хүн эрүүл мэндээ дээд зэргээр хамгаалдаг байх ёстой. Өмнө нь элэг, бөөрний өвчлөл их байсан бол одоо жингийн илүүдэлд өртөх боллоо. Жингийн илүүдлээс болж, цусны даралт ихсэх, чихрийн шижин өвчнөөр өвчлөх гээд тоочоод байвал олон өвчний суурь тавигддаг.

Иргэд биеийн тамираар хичээллэх, бие бялдраа хөгжүүлэх нь өндөр ач холбогдолтой. Бусад улсад ерөнхий боловсролын сургалтын агуулгад бие зөв авч явах, бие бялдраа хөгжүүлэх, их дээд сургуульд бол гэр бүл төлөвлөлт, эцэг эх болохдоо бэлдэх зэрэг хөтөлбөрт туссан байдаг.

Гэтэл манайд их, дээд сургуульд дээд тоо, Ром, Германы эрх зүйн онолыг үздэг. Энэ бүхнийг оршил болгож хэлсний учир нь бид ямар нийгэм бүтээхийг зорьж байна, түүнд чиглэсэн ирээдүйг бэлдэх ёстой шүү дээ. Гэвч өнөөдөр ингэж чадахгүй байна. Тиймээс Биеийн тамир, спортын тухай хуулийн төслийн үндсэн үзэл санаа нь ирээдүйн иргэнийг бэлдэхэд чиглэсэн байх ёстой. Хүн амын эрүүл мэнд, бие бялдрын хөгжил ямар байгааг нь тухайн улсын хөгжилтэй шууд холбоотой.

Биеийн тамир, спортын тухай хуульд 2013 онд батлагдаж, өнгөрсөн хугацаанд хэд хэдэн удаа өөрчлөлт орсон байна. Тэгвэл шинэчилсэн найруулгын төслийн үзэл баримтлалыг хэлэлцүүлгийн явцад өөрчлөх шаардлага байна.

Одоо хүчин төгөлдөр мөрдөж буй хуулийн үзэл санаанаас уг хуулийн төсөл нь ямар ялгаа, онцлогтой болох тал дээр тодорхой хариулт өгч чадахгүй л байна шүү дээ. Тиймээс хуулийн төслийн үзэл баримтлал, төслийн агуулгыг сайжруулах хэрэгтэй гэж үзэж байна."