ЭМЯ -ны ТНБД Д.Очирбат
2017.11.17

ЭМЯ-нд хийсэн аудитын шалгалтаар 64,2 тэрбум төгрөгийн зөрчил илэрчээ

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

  • Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
  • Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
  • Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Эрүүл мэндийн яамны Төрийн нарийн бичгийн дарга Д.Очирбат, Эрүүл мэндийн сайдын эрхлэх асуудлын хүрээний байгууллагуудын удирдлагууд оролцлоо.

Эрүүл мэндийн сайдын эрхлэх асуудлын хүрээний байгууллагуудын 2016 оны санхүүгийн тайлангийн аудитад 111 байгууллага хамрагдсан бөгөөд үүнээс 100 нь “Зөрчилгүй”, 10 байгууллага “Хязгаарлалттай”, нэг байгууллага “Санал, дүгнэлт өгөхөөс татгалзсан” дүгнэлт авчээ.

“Хязгаарлалттай дүгнэлт авсан байгууллага:

Нийслэлийн эрүүл мэндийн газар;
Архангай, Баянхонгор, Хэнтий аймгийн нэгдсэн эмнэлэг;
Баян-Өлгий аймгийн Дэлүүн, Говь-Алай аймгийн Төгрөг, Завхан аймгийн Шилүүстэй, Өвөрхангай аймгийн Есөнзүйл, Ховд аймгийн Мөст, Булган сумын сум дундын эмнэлэг;
“Санал дүгнэлт өгөхөөс татгалзсан” дүгнэлт авсан байгууллага:

Зооноз өвчин судлалын төв;
Аудитаар нийт 64.2 тэрбум төгрөгийн алдаа, зөрчил илэрснээс 35.2 тэрбум төгрөгийн зөрчлийг аудитын явцад залруулж, 0.2 тэрбум төгрөгийн төлбөрийн акт, 1.1 тэрбум төгрөгийн албан шаардлага, 27.7 тэрбум төгрөгийн зөвлөмж өгсөн байна. Энэхүү зөвлөмжийн хэрэгжилт 69.7 хувьтай байна гэж дүгнэлээ.

Тус төсвийн ерөнхийлөн захирагчийн 2016 оны санхүүгийн тайлангийн аудитаар Төсвийн тухай хуульд заасан цаглабарт хугацааг зөрчиж тайланг ирүүлсэн, залруулаагүй зөрчил материаллаг байдлын түвшингээс давсан зэргээс үндэслэн “Хязгаарлалттай” дүгнэлт өгчээ.

Тиймээс цаашид:

-Санхүүгийн нэгтгэсэн тайланг Төсвийн тухай хуульд заасан цаглабарт хугацаанд багтааж үнэн зөв гаргах;

-Аудитаар өгсөн акт, албан шаардлага, зөвлөмжийг тайлант онд багтаан хэрэгжүүлэх;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Шилэн дансны тухай хуулийн хэрэгжилтийг бүрэн хангаж ажиллах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Эрүүл мэндийн яамны Төрийн нарийн бичгийн дарга Д.Очирбат Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, тус яамны хувьд тогтолцооны өөрчлөлт хийх шаардлага байгааг хэллээ. Мөн санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг тайлант онд багтаан бүрэн хэрэгжүүлэх талаар эрхлэх асуудлын хүрээний байгууллагын удирдлагуудад үүрэг чиглэл өглөө.