Увс аймгийн БОАЖ-ын салбарын нээлттэй өдөрлөгийн хаалтад БОАЖ-ын сайд Н.Цэрэнбат, аймгийн Засаг дарга Д.Батсайхан болон холбогдох албан тушаалтнууд оролцсон юм.

Уг үйл ажиллагаа Увс аймгийн төв талбайд болсон бөгөөд аймгийн байгаль орчин, аялал жуулчлалын салбарынхан иргэдэд мэдээлэл өгч, 7 хоногийн хугацаанд нээлттэй хаалганы өдөрлөгөөр хэрхэн ажилласнаа тайлагналаа. Увс аймгийн байгаль орчин, аялал жуулчлалын салбарынхан нээлттэй өдөрлөгөөр иргэдээс 500 гаруй санал хүсэлт хүлээн авч, бүх сумдаар байгаль хамгаалагчдаа ажиллуулж, өөрсдийн хийж байгаа ажлыг танилцуулсан байна.

Аймгийн Байгаль орчин, аялал жуулчлалын газар, Цаг уур, орчны шинжилгээний газар, Увс нуур, тэсийн голын сав газрын захиргаа, Хан хөхийн нурууны улсын тусгай хамгаалалттай газар нутгийн хамгаалалтын захиргаа, Увс нуурын ай савын улсын тусгай хамгаалалттай газар нутгийн хамгаалалтын захиргааны ажилтнууд тус бүрт танилцуулга хийсэн.

Мөн цэвэр ус үйлдвэрлэдэг “Ус эрдэнэ” ХХК, худаг гаргаж, жимсний услалтын систем хийдэг “Чандмань ус” ХК, Улаангом хотын политехникийн коллеж, “Увс байгаль” ХК, Увс аймгийн улсын тэргүүний II сургуулийн “Эх дэлхий” эко клубын сурагчид өөрсдийн бүтээлээр үзэсгэлэн гаргасан байлаа.

Тус эко клуб байгуулагдаад 1 жил болж байгаа ч өнгөрсөн хугацаанд “Гялгар уут цэцэг биш” “Хог хаягдалгүй амьдарцгаая”, “Амьтдаа хайрлая” зэрэг үйл ажиллагаануудыг сургууль дээрээ зохион байгуулж, сурагчдын дунд төрөл бүрийн уралдаан, тэмцээн зохиож иржээ. “Эх дэлхий” эко клуб одоогоор 30 сурагчтайгаар үйл ажиллагаагаа явуулж байгаа ч сургуулийнхаа нийт сурагчдыг эко сурагч болгох зорилт дэвшүүлээд байгаа аж.

Энэ үеэр БОАЖ-ын сайд Н.Цэрэнбат “Байгаль орчин, аялал жуулчлалын нээлттэй өдөрлөгийг 7 хоногийн хугацаанд хийж, иргэдийн санал, хүсэлтийг хүлээж авлаа. Иргэдийн зүгээс ирүүлсэн санал, хүсэлтийг ирэх сарын эхээр болох салбарынхаа Удирдах ажилтны зөвлөгөөний үеэр хэлэлцэж, алдаа, дутагдлаа цаашид хэрхэх талаар ярилцах юм.Хог хаягдал өнөөдөр Монгол Улсын хувьд нэн тулгамдсан асуудлын нэг болоод байгаа учир аймаг тус бүрт хог хаягдлыг дахин боловсруулах анхан шатны үйлдвэрүүдийг байгуулахаар ажиллаж байна. Мөн усны асуудал хурцаар тавигдаж байгаа энэ үед саарал ус ашигласан ААН-үүдийг дэмжих бодлого баримталж байна. Энэ жилийн хувьд Увс аймгийн ЦУОШГ-ын барилгыг шинэчлэх, Чандманийн үерийн даланг сайжруулах санхүүжилтийг улсын төсөвт тусгуулж чадсан. Нөгөөтэйгүүр, Увс аймгийг аялал жуулчлалын гол бүс болгох саналыг аймгийн Засаг даргын зүгээс тавьж, жил бүр уламжлал болгон явуулдаг ITM аялал жуулчлалын үзэсгэлэнд Увс аймгийг түнш болгох саналыг ирүүлсэн. Монгол Улс ирэх сард аялал жуулчлалын маршрутаа батлуулж, дэлхийн аялал жуулчлалын маршрутад багтаана. Тэгэхээр манайхыг зорих жуулчдын тоо нэмэгдэнэ. Та бүхэн маань бэлтгэлээ сайн базаах хэрэгтэй. Ингээд та бүхэндээ өнөөдөр тохиож буй Олон улсын ойн баярын мэнд, маргааш тохиох Дэлхийн усны өдрийн мэндийг хүргэе” хэмээлээ.

Увс аймагт эдгээр өдрүүдэд ОХУ-аас сургагч багш нар хүрэлцэн ирж “Жимс, жимсгэнийг хэрхэн өгөөжтэй тарих вэ”  хэмээх сургалт зохион байгуулж байгаа аж.