Хөдөлмөр нийгмийн хамгааллын яам, Засгийн газрын хэрэгжүүлэгч агентлаг Гэр бүл, Хүүхэд, Залуучуудын хөгжлийн газар болон Нийслэлийн Залуучуудын хөгжлийн газраас санаачлан зохион байгуулж буй “Ирээдүйн эзэд-2018” мэргэжил сонголтын аяны нээлт Сонгинохайрхан дүүрэгт боллоо.

Арга хэмжээнд Ерөнхий боловсролын 12, 62 дугаар дунд сургуулийн 800 орчим ахлах ангийн сурагчид оролцсон бөгөөд аяны үйл ажиллагааг Сонгинохайран дүүргийн Засаг дарга Ж.Сандагсүрэн нээж, УИХ-ын гишүүн Н.Учрал ажил мэргэжлийн чиг баримжаа олгох, мэргэжлээ хэрхэн зөв сонгох талаар, хувь хүний хөгжлийн тухай, Нийслэлийн Залуучуудын хөгжлийн газрын дарга С.Сүх-Очир “Хязгаар үгүй мөрөөд” сэдвээр оролцогчдод тус тус мэдээлэл, зөвлөгөө өглөө.

Аяныг Засгийн газрын хэрэгжүүлэгч агентлаг Гэр бүл, Хүүхэд, Залуучуудын хөгжлийн газар, Нийслэлийн Залуучуудын хөгжлийн газар, Сонгинохайрхан дүүргийн Засаг даргын Тамгын газар, Боловсролын хэлтэстэй хамтран тус хэлтэс нь дүүргийн төрийн болон төрийн бус ерөнхий боловсролын 22 сургуулийн 5300 гаруй ахлах ангийн сурагчийг хамруулан энэ сарын 09-ний өдрөөс 23-ны өдрийг хүртэл зохион байгуулах бөгөөд Ерөнхий боловсролын сургуулийн ахлах ангийн сурагчдыг мэргэжлээ зөв сонгоход нь дэмжлэг үзүүлэх, мэдээллээр хангах зорилгоор мэргэжлээ зөв сонгох сургалт, лекцийг сурагчдад хүргэх бөгөөд мэргэжлийн чиг баримжаа олгох 5 төрлийн цогц тестэнд хамруулж, түүндээ тулгуурласан ганцаарчилсан болон бүлгийн зөвлөгөө өгч ажиллана.