“Эрдэнэс-Тавантолгой” ХК-ийн Ногоон говь хөтөлбөр амжилттай хэрэгжсээр байна
"Эрдэнэс-Тавантолгой” ХК уурхайн нөлөөллийн бүсийг ойжуулах, ногооруулах, экологийн тэнцвэрт байдлыг хадгалах, орон нутгийн иргэдийн амьдрах нөхцөлийг сайжруулж, тоосжилтыг багасгах ажлуудыг 2011 оноос тууштай хэрэгжүүлэн ажиллаж байна.
Өнөөдрийн байдлаар компанийн Байгаль орчин, усны бодлогын хэлтсийн ажилтнуудын туршилтын талбай, уурхайн нөлөөллийн бүс, Цанхи хотхонд улиас, шар хуайс, бургас, хайлаас, буйлс, сухай, монос 30 орчим төрлийн 38,000 мод суулган, тарьж ургуулан арчилахын зэрэгцээ туршилтын талбайдаа хүлэмжийн аж ахуй эрхэлж байна.
Ирэх жилээс уг хүлэмждээ нарийн ногоо тариалж, уурхайчдынхаа хүнсний хэрэглээнд нийлүүлж, цаашид хүлэмжийн тоог нэмэгдүүлэх зорилготой юм.
"Эрдэнэс-Тавантолгой” ХК-ийн байгаль орчин, усны бодлогын хэлтсийн мэргэжилтэн А.Аззаяа " Говийг ойжуулахад цаг хугацаа, хөдөлмөр, шинжлэх ухааны үндэслэл хэрэгтэй. Иймээс бид ХААИС-ийн багш нартай хамтраж ажиллаж байна. Бид говьд тэсвэртэй, мод бутыг нутагшуулж, өсгөж үржүүлэхээс гадна хамгаалах, үрийн сан бүрдүүлэх зорилготой” гэж ярилаа.
