Даваасүрэн.Ц Сарангэрэл.Д Чинзориг.С Л.Мөнхбаатар У.Хүрэлсүх 2019.09.24 | Vip76.mn

Ерөнхий сайд Хөвсгөл аймагт ажиллаж байна

Ерөнхий сайд Хөвсгөл аймагт ажиллаж байна

Монгол Улсын Ерөнхий сайд Ухнаагийн Хүрэлсүх Хөвсгөл аймгийн иргэдтэй уулзалт хийж, Засгийн газрын бодлого, шийдвэр, үйл ажиллагааны талаар танилцуулж, иргэдийн сонирхсон асуултад хариуллаа.

Уулзалтанд эрүүл мэндийн сайд Д.Сарангэрэл, УИХ-ын гишүүн Л.Мөнхбаатар, Ц.Даваасүрэн, Л.Энх-Амгалан, ХХААХҮ-ийн сайд С.Чинзориг нар оролцлоо.

Иргэдийн зүгээс Хатгал тосгоныг сум болгох, хууль зөрчин ажиллаж байгаа уул уурхайн компаниудын үйл ажиллагааг зогсоох, цахилгааны үнийг бууруулах, шөнийн тарифыг нэвтрүүлэх, хөгжлийн бэрхшээлтэй иргэдийн ажлын байрыг нэмэгдүүлэхэд анхаарах, холбогдох хууль тогтоомжийг боловсронгуй болгох, хэрэгжилтийг сайжруулах зэрэг олон асуудлуудыг хөндөж байлаа.

Ерөнхий сайд У.Хүрэлсүх Хөвсгөл аймагт тулгамдаж байгаа асуудалд анхаарч ажиллахаа илэрхийлж, 100 ортой хүүхдийн эмнэлэг, 320 хүүхдийн авьяас сургуулийн барилгын санхүүжилтийн асуудлыг шийдвэрлэхээ мэдэгдлээ.

Засгийн газар уналтад ороод байсан эдийн засгийг сэргээн, нийгэмд шударга ёс тогтоох, хууль бус уул уурхай эрхлэхийг цэгцэлж байгааг иргэд дэмжихээ илэрхийлэв.  Эдийн засгийн өсөлтийн үр шимийг айл өрх, иргэн бүр хүргэх нь чухал байгааг мөн санууллаа.

Засгийн газар Хөвсгөл нуур орчмын бүсийг “Эко аялал жуучлалын бүс” болгон хөгжүүлэх зорилгоор :

  • -Хатгал-Жанхай-Тойлогт чиглэлд 37.9 км хатуу хучилттай авто зам
  • -Хатгал, Жанхай, Дээд модонт булан, Ардаг, Тойлог зэрэг газарт 500 автомашины найман зогсоол байгуулах
  • -Хөвсгөл нуурт усан замын тээврийн төв байгуулах зураг төсөл боловсруулах
  • -Хатуу хог хаягдлыг дарж булшлах технологи бүхий хоёр цэгийг Хатгал тосгон, Ханх суманд байгуулах
  • -Шингэн хог хаягдлыг нөөцлөх хоёр цэгийг Хатгал тосгон, Ханх суманд байгуулах
  • -Орон нутгийн шингэн, хатуу хог хаягдал зөөвөрлөх тээврийн хэрэгсэлтэй болгох
  • -Түр отоглох 22 цэг болон автомашины зогсоолд ариун цэврийн 29 байгууламж байгуулахаар болсныг Ерөнхий сайд хэлэв.  

Мөн “ Хүүхэд, хөгжлийн бэрхшээлтэй иргэн, ахмад настан, өрх толгойлсон эцэг, эх гэсэн зорилтот бүлэгт Засгийн газар халамж, дэмжлэгээ үзүүлнэ. Хөдөлмөрийн чадвартай бусад хүн ажил хийх ёстой. Ажлын байр олон ч ажил хийх сонирхолтой хүн ховордсон” гэдгийг ч тодотгов. 

Хөвсгөл аймгийн нисэх буудлыг Олон Улсын нисэх буудал болгох,  “Авъяас” сургууль, спортын сургууль, 100 хүүхдийн ортой цэцэрлэг барихад шаардагдах хөрөнгийг ирэх оны төсөвт суулгана гэв.

Хөвсгөл аймаг  2019 оныг “Хүүхэд хамгаалал, өрхийн хөгжлийг дэмжих жил” болгосон байна.