Хичээлийн шинэ жил эхлэх дөхсөнтэй холбогдуулан Монгол улсын Ерөнхийлөгч Ц.Элбэгдорж БСШУ-ны сайд, дэд сайд болон тус яамны газар хэлстийн дарга нарыг өнөөдөр хүлээн авч уулзан, цаг үеийн асуудлаар ярилцлаа.


Сайд Ё.Отгонбаярын мэдээлснээр, энэ жил 40 мянган хүүхэд дунд сургууль төгсч, харин 53 мянган сурагч шинээр дунд сургуульд элсэн орж байна. Бага дунд боловсролын салбар энэ жил 97 төрлийн сурах бичиг хэрэглэх бөгөөд, одоогийн байдлаар 81 төрөл нь хэвлэгдээд байна. Улсын төсвөөр 130 сургууль цэцэрлэгийн обьект засварлахаар төлөвлөснөөс, 42 дунд сургууль, 16 дээд сургууль, 16 цэцэрлэгийн барилгын засварын ажил бүрэн дуусчээ. Төрийн өмчтэй их дээд сургуулиудын төлбөрийг нэмэхгүйн тулд, зарим хөрөнгө оруулалтыг хойшлуулж,сургалттай шууд холбоогүй зардлыг таная гэсэн бодлого барьж байна гэж БСШУ-ны сайд Ё.Отгонбаяр ярилаа.

Салбарын сайдын мэдээллийн дараа, Ерөнхийлөгч боловсролын салбарт тулгамдаад байгаа зарим тодорхой асуудлуудаар асуулт тавьж хариулт авсан. Тухайлбал их дээд сургуулийн шинэчлэл, олон улсад хүлээн зөвшөөрөгдөх үнэлгээний нэгдсэн систем, сурах бичгийн тендер, соёлын үнэт зүйлсийн бүртгэл, хадгалалт , болон “Үдийн цай” хөтөлбөрийн хэрэгжилт , сургуулийн ойролцоох хүүхдэд зориулагдах ёстой зам талбайн газрын асуудал, багш нарын нийгмийн асуудал зэргийг хөндөж ярилцлаа.

Сүүлийн үед сургуулиуд сурагчдаас хандив авдаг тухай сонсогдох болсон. Сурч байгаа сурагчидаасаа хандив авч, хандивыг дүнтэй уядаг зохисгүй үзэгдлийг арилгаж, төгсөгчидөөс хандив авдаг болох нь зөв гэдэг санааг Ерөнхийлөгч дэвшүүллээ.
Сургууль бол хүчирхийлэлгүй орчин байх ёстой гэдгийг онцгой анхааруулсан юм.

Ерөнхийлөгч Ц.Элбэгдорж мөн энэ уулзалтын үеэр оюутны сургалтын тэтгэлгийн асуудлыг шийдэх эрхзүйн үндсийг бүрдүүлэх, санхүүжилтийн механизмыг олох зорилготой ажлын хэсэг Ерөнхийлөгчийн зарлигаар томилогдон ажиллаж байгааг хэлээд, энэ ажлын хэсэгт боловсролын яамны зүгээс гаргах санал чухал нэмэртэй гэдгийг дурдлаа.

Дээд боловсол-Шинжлэх ухаан 2 нэг шугаман дээр явах учиртай гээд, дээд боловсролын салбарын шинэчлэлийг хийхэд гадаадын нэртэй их дээд сургуулиудыг төгссөн залуу боловсон хүчнээр “цус сэлбэх”-ийн чухлыг онцолсон юм.

“Дунд сургууль бол өөрөө нийгмийн нэг бүхэл бүтэн институци юм. Өнөөдөр манай улсын Ерөнхий боловсролын сургуулиуд 12 жилийн тогтолцоонд шилжиж байгаа нь боловсрол бүрэн төгс, гүйцэд болж байгаа хэрэг. Иймээс сурах бичгийн агуулгад анхаарах хэрэгтэй байна.

Боловсролоос гадна Шинжлэх ухааны цогц асуудлыг анхаарлын гадна үлдээж болохгүй. Эцэст нь салбарыг тэргүүлж байгаа та бүхний үүрэг бол боловсролтой, сайн Хүн төрүүлэх явдал” гэж Ерөнхийлөгч хэллээ