- ХИЧЭЭЛИЙН ШИНЭ ЖИЛЭЭС УРЬТАЖ СУРАХ БИЧИГ ХЭВЛЭГДЭХГҮЙ БАЙЖ МАГАДГҮЙ –

Хичээлийн шинэ жил эхлэхэд цөөхөн хоног үлдээд байна. Жил бүр хичээлийн шинэ жилтэй давхцан сургуулийн засвар дуусаагүй, сурах бичиг хэвлэгдээгүй зэрэг элдэв бэрхшээл гардаг. Энэ жил мөн л уг замыг тойрч гарсангүй. Хэвлэлийн компаниуд сурах бичгийн тендер будлиантсан хэмээн мэдэгдэл хийлээ. “Об прэсс”, “Улаанбаатар принт” зэрэг дөрвөн хэвлэлийн компани тендер шударга бус явагдсан гэж үзэж байна.

Боловсрол, соёл, шинжлэх ухааны яамнаас ерөнхий боловсролын сургуулийн дунд ангийн сурах бичиг хэвлэх тендер зургадугаар сарын 29-нд зарлажээ. Тендерийн дүнг дараа сарын 15-ны өдөр зарлах байсан ч үүнээс зургаа хоногийн өмнө Азийн хөгжлийн банкнаас тендер зарлах хугацааг хойшлуулахыг хүссэн албан бичиг ирүүлжээ. Ингээд тендерийг долдугаар сарын 22-ны өдөр нээсэн байна.

Дээрх тендерт 20 нэр төрлийн таван багц номын хэвлэх эрх байсан аж. Үүнд 18 компани, аж ахуйн нэгж үнийн саналаа илгээсэн байна. Гэтэл сурах бичгийг хэвлэхэд хамгийн бага үнийн санал илгээсэн аж ахуйн нэгжүүд байсаар байтал түүнээс өртөг өндөртэй хэвлэх компанийг сонгожээ. Үүнээс үүдэн хэвлэх компаниуд тендер будлиантай болсон хэмээн үзэж байна. Өөрөөр хэлбэл, бага үнийн санал хэлсэн компани байсаар байтал өндөр үнийн санал хэлсэн газрыг сонгож улсад хохирол учруулж болохгүй гэв.

Сурах бичгийн нэг багцад зургаан төрлийн ном багтдаг аж. Бага ангийн сурагчдын сурах бичгийн хэвлэлийн зардлыг төрөөс 100 хувь төлдөг юм байна. Харин ахлах болон дунд ангийн сурах бичгийг зардлыг 40-60 гаруй хувиар төлдөг гэнэ. Энэ жил Монгол хэлний ном 1610, Математик 1470, Хүн-Орчины 2730, Хөгжмийнх 2630, Дүрслэх урлаг, технологийнх 630 төгрөгөөр хэвлэгдэх аж. Харин энэ жилээс шинээр казах хэлний “Эх хэл” хэмээн сурах бичиг нэмэгдэж орж байгаа аж. Үнэ нь 3640 төгрөг юм байна.

“Улаанбаатар принт” компанийн маркетингийн менежер О.Галбадрах “Долдугаар сарын 9-ны өдөр Азийн хөгжлийн банкнаас тендерийг хойшлуулах болсон талаарх мэдэгдлийг Боловсрол соёл, шинжлэх ухааны яамнаас бидэнд өгсөн. Ингээд долдугаар сарын 22-ны өдөр тендерээ нээнэ гэж заасан байсан. Тендер хойшлогдох болсон 9-ны өдөр тендерийн заалтад ахин шинэ заалт орж бид түүнтэй танилцсан. Уг заалтад нийт санал болгосон үнийн дүнгийн 80 хувьтай тэнцэх ажлыг өмнө нь хөрөнгө оруулалт авалгүйгээр хийсэн байх шаардлагатай гэсэн байсан. Үүнээс үүдэн тендерт өрсөлдөж байсан 18 компани хасагдсан. Гэтэл нэг хэвлэлийн компани багцыг 300 гаруй сая төгрөгөөр хэвлэнэ гэж санал болгож байсан. Нэг багцад нь зургаан төрлийн сурах бичиг багтдаг. Үүний 80 хувийг захиалагч газраас мөнгө авалгүй хэвлэнэ гэвэл 200 гаруй сая төгрөг хэрэгтэй. Ийм хэмжээний мөнгөтэй хэвлэх үйлдвэр Монголд байхгүй. Нэг үгээр хэлбэл, салбар хариуцсан яам бидэнд биелүүлэх боломжгүй болзол тулгаж Азийн хөгжлийн банкыг тендерт ялуулсан. Гэтэл тус газар нь өндөр үнээр сурах бичиг хэвлэж байгаа” гэлээ.

Сурах бичгийн тендер будлиантсан гэв

Сурах бичгийн тендер будлиантсан гэв