Манай улс Шинжлэх ухааны ажилтны өдрийг найм дахь жилдээ тэмдэглэж байна. Шинжлэх ухааны ажилтны өдөр нь жилээс жилд цар хүрээгээ тэлэн “Монгол Улсын Шинжлэх ухаан , технологийг 2007-2020 онд хөгжүүлэх мастер төлөвлөгөө” Монгол Улсад үндэсний инновацийн тогтолцоог хөгжүүлэх хөтөлбөр /2008-2015/ түүний дэд хөтөлбөрүүдэд тусгагдсан салбаруудыг хөгжүүлэх чиг хандлага үзэл баримтлал, бодлогын зорилтыг хэрэгжүүлэхийн төлөө үйл ажиллагааг чиглүүлэн ажиллаж байна.

Өнөөдөр Улсын Драмын Эрдмийн театрт 2009 оны шилдэг бүтээл шалгаруулах ёслол боллоо. Уг арга хэмжээнд БСШУЯ сайд Ш.Отгонбаяр, ШУА-ын Ерөнхийлөгч, Академич Б.Энхтүвшин, дэд ерөнхийлөгч Т.Дорж, ШУА-ийн захирал н.Ган-Эрдэнэ нар оролцлоо. Ёслолын үйл ажиллагааг нээж БСШУЯ-ны сайд Ш.Отгонбаяр баяр хүргэж үг хэллээ. Тэрээр Монгол Улсад Шинжлэх ухааны салбар хөгжиж байгаа ч тулгамдсан асуудлууд байгааг онцоллоо.

Дэлхийн эдийн засгийн хямралтай холбогдуулж ШУ-ны салбарт бодитой өөрчлөлт гарахгүй байгаа мөн энэ салбарт өрсөлдөөнтэй ил тод зарчмыг нэвтрүүлэх, судалгаа, шинжлэх ухааны менежментийг сайн хийх хэрэгтэйг тэрээр дурдлаа. Оны шилдэг бүтээлээр МУИС-ын Эдийн засгийн сургуулийн багш Р.Энхбатын “Квазигүдгэр” ШУТИС-ын багш доктор профессор Д.Дашжамц, доктор Зулзагабаатар, Г.Намхайжанцан, З.Биндэрьяа нарын “Монголын Геотехнологийн нөхцөл” Анагаах Ухааны хүрээлэнгийн эрдэм шинжилгээний ахлах ажилтан доктор асан Д.Самбуупүрэв, Доктор Д.Авирмэд нарын “Умайн салстын эмгэг өөрчлөлт, хорт хавдар урьтал өвчний эд судлалын онош зүй”, Түүхийн хүрээлэнгийн ЭША Б.Батсүрэнгийн “Өндөр тэрэгтнүүд ба эртний түргүүд”, Ботаникийн хүрээлэнгийн ЭША С.Ургамал, Д.Нямбаяр нарын “Монголын ургамал аймаг”, Археологийн хүрээлэнгийн ЭША Ц.Төрбатын “Монгол Алтайн археологийн судалгаа”, Газарзүйн хүрээлэнгийн захирал академич Д.Доржготов, С.Шийрэв-Адьяа, Н.Орших нарын “Монгол Улсын үндэсний атлас ” гэх мэт долоон бүтээл оны шилдэг бүтээлээр тус тус шалгарлаа.

2009 оны Шинжлэх ухааны оны шилдэг бүтээлээр нэр бүхий 7 бүтээл шалгарчээ