УИХ-ын нэгдсэн чуулган хаасны дараа УИХ-ын байнгын хороод ээлж дараалан чуулганы хугацаанд хийсэн ажлаа тайлагнаж, хэвлэлийнхэн хурал хийдэг уламжлалтай билээ. Энэ уламжлалын дагуу энэ өнөөдөр Байгаль орчин, хүнс, хөдөө аж ахуйн байнгын хорооноос хэвлэлийн бага хурал хийснээр Байнгын хороодын ажлын тайлангийн салхийг хагаллаа. Хэвлэлийн бага хурлыг нээж тус байнгын хорооны дарга Б.Батбаяр хийсэн ажлаа тоймлон сэтгүүлчдэд мэдээллээ.

Хэвлэлийн бага хуралд Байгаль орчин, хүнс, хөдөө аж ахуйн байнгын хорооны дарга Б.Батбаяр, тус байнгын хорооны гишүүн Г.Баярсайхан, Н.Ганбямба нарын гишүүн болон албаны бусад хүмүүс оролцлоо.

Тус Байнгын хороо нь хаврын чуулганы хугацаанд Агаарын тухай хуулийн шинэчилсэн найруулга, Агаарын бохирдлын төлбөрийн тухай хуулийн төслүүд болон тэдгээртэй холбогдон өөрчлөлт орсон 8 хуулийн төсөл, “Монгол мал” үндэсний хөтөлбөр, “Ус” үндэсний хөтөлбөр батлах тухай Улсын Их Хурлын тогтоолын төслүүд зэрэг томоохон хууль, тогтоомжийн төслүүдийн хэлэлцүүлэг хийж чуулганы нэгдсэн хуралдаанаар батлуулсан байна. Түүнчлэн Агаарын бохирдлыг бууруулах талаар авах зарим арга хэмжээний тухай Улсын Их Хурлын 2007 оны 46 дугаар тогтоолын хэрэгжилт болон “Бороо гоулд” ХХК-ийн хайгуул, олборлолтын үйл ажиллагаатай танилцаж, үнэлэлт дүгнэлт өгөх,  Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг хэрэгжүүлэхтэй холбогдсон ажлыг зохион байгуулахад тус Байнгын хороо анхаарлаа хандуулан Байнгын хорооны ажлын хэсгүүдийн томилон  ажиллуулсан байна.

Байнгын хороо чуулганы хугацаанд 74.3 хувийн дундаж ирцтэйгээр 11 удаа хуралдаж давхардсан тоогоор 31 асуудал хэлэлцсэн байна. Энэ хугацаанд тус Байнгын хороонд  иргэд, байгууллагаас 245 албан бичиг, 115 өргөдөл, гомдол ирүүлснийг хүлээн авч хариуг тухай бүр бэлтгэж хүргүүлсэн байна. Эдгээр өргөдөл, гомдлын 64.5 хувь нь хувийн амьдралд мөнгө санхүүгийн болон орон сууцны туслалцаа хүссэн, 20 хувь нь сургууль, дамжаанд суралцахад төлбөр болон ажлын байраар хангахад дэмжлэг хүссэн, 10 хувь нь газрын маргаантай асуудлаар, 5.5 хувь нь тэтгэмж нэмэгдүүлэх, төсөлд хамруулах, шагнал урамшуулалд дэмжүүлэх зэрэг асуудлууд байсан аж.

Засгийн газраас санаачилж өргөн мэдүүлсэн “Ус” үндэсний хөтөлбөр батлах тухай Улсын Их Хурлын тогтоолын төслийг Улсын Их Хурлаар  хэлэлцүүлж батлуулсан талаар УИХ-ын гишүүн Г.Баярсайхан товч танилцуулга хийлээ. Уг тогтоол батлагдсанаар иргэд болон ТББ-ууд байгаль орчинд учруулсан хохирлыг нөхөн төлүүлэхээр нэхэмжлэх гаргах эрхтэй болсныг Г.Баярсайхан гишүүн онцолж байв.

Түүнчлэн Агаарын тухай хуулийн шинэчилсэн найруулгын төсөл, Агаарын бохирдлын төлбөрийн тухай хуулийн болон тэдгээртэй холбогдон өргөн баригдсан 8 хуулийн төслүүдийг Улсын Их Хурлаар хэлэлцүүлж батлуулахдаа бохирдуулагч нь төлбөр төлөх зарчмыг суулгаж өгсөн болохыг тайлбарлаж байв.

Дараа нь Улсын Их Хурлын нэр бүхий 31 гишүүний санаачилсан “Монгол мал” үндэсний хөтөлбөр батлах тухай Улсын Их Хурлын тогтоолын төслийг Улсын Их Хурлын чуулганы 2010 оны 5 дугаар сарын 20-ны өдрийн нэгдсэн  хуралдаанаар хэлэлцүүлж батлуулсан талаар Н.Ганбямба гишүүн мэдээлэл өгөв. Уг хөтөлбөрийг хэрэгжүүлснээр тухайлбал Дорнод аймагт шүлхий өвчин гарсан байлаа гэхэд бусад бүсийн мал аж ахуйн бүтээгдэхүүний борлуулалтад нөлөөлөхгүй байхаар зах зээлийн зохицуулалт хийгдэх боломжтой болсныг, түүнчлэн ХАА-н бирж, орон нутагт байгуулагдах сүүний болон махны үйлдвэрүүд малчдын амьжиргааг дээшлүүлэхэд дэмжлэг болно хэмээн эрхэм гишүүн онцлон дурдав.

Сэтгүүлчид байгаль орчныг хамгаалах, усны эх ундарга бүхий болон ойн сан бүхий газруудад ашигт малтмал олборлохгүй байхаар хуульчилсан ажлын хэрэгжилт, Таван толгойн ордын байгаль орчны үнэлгээний асуудал, "Монгол мал" хөтөлбөрөөс малчид юу хожих, байгаль орчныг хамгаалах төсвийг нэмэгдүүлэх боломж байгаа эсэх зэрэг сонирхсон асуултууддаа хариулт авлаа.