Төр, хувийн хэвшлийн байгууллага, гадаад, дотоодын хөрөнгө оруулагчдын хамтын ажиллагааг хөгжүүлэх, тэдэнд барилгын салбарын бодлогыг танилцуулах зорилготой “Construction Mongolia-2013”сэдэвт хурал Төрийн ордны Их танхимд эхэлж байна.

Барилга, хот байгуулалтын яамнаас 2013 оныг “Барилга, хот байгуулалтын салбарын бодлого, эрх зүйн орчинг шинэчлэх жил” болгон зарлаж үүнтэй холбогдуулан зохион байгуулж буй энэхүү хурлаар төр, хувийн хэвшил, олон улсын банк санхүү, хамтын ажиллагааны байгууллагууд, барилгын салбарын аж ахуйн нэгжүүд, мэргэжлийн холбоод, дэлхийн нэр хүндтэй компаниудын төлөөллүүд монгол орны барилгын салбарын ирээдүйн хөгжлийн талаар ярилцаж, туршлага солилцох аж.

“Construction Mongolia-2013” олон улсын хурлын зохион байгуулагчаар Барилга, хот байгуулалтын яам, Барилгын хөгжлийн төв, хамтран зохион байгуулагчаар “Global Group” ажиллажээ.

Хурлын нээлтийн үг

Барилга, хот байгуулалтын сайд Ц.Баярсайхан

2013 оны 10 дугаар сарын 18-ны өдөр

Улаанбаатар хот

Хүндэт зочид, төлөөлөгчид өө,

Барилга хот байгуулалтын сайд Ц.Баярсайхан

“Construction Mongolia 2013” арга хэмжээнд хүрэлцэн ирсэн Та бүхний энэ өдрийн амар амгаланг айлтгаж, мэндчилэхийн ялдамд энэхүү арга хэмжээг зохион байгуулахад хамтран ажилласан байгууллагуудад Барилга, хот байгуулалтын яамны нэрийн өмнөөс болон хувиасаа чин сэтгэлийн талархал илэрхийлье.

Тус яамнаас 2013 оныг Барилга, хот байгуулалтын салбарын бодлого, эрх зүйн орчинг шинэчлэх жил болгон зарласантай холбогдуулан салбарын хөгжлийн бодлогыг төр, хувийн хэвшлийн байгууллага, гадаад, дотоодын хөрөнгө оруулагчдад танилцуулах, цаашдын хамтын ажиллагааг хөгжүүлэх зорилгоор “Construction Mongolia-2013” олон улсын хурлыг “Монголын барилгын салбарын тогтвортой хөгжлийн төлөө” уриан дор зохион байгуулж байна.

Өнөөдрийн хуралд нийслэл хот, 21 аймгийн төлөөллөөс гадна барилга, хот байгуулалтын салбарт үйл ажиллагаа явуулдаг төрийн бус байгууллагууд, гадаад, дотоодын аж ахуйн нэгж, компаниуд, их, дээд сургуулиудын төлөөлөгчид оролцож байна. Мөн манай улсад суугаа Элчин сайдын яамд, Нэгдсэн Үндэсний Байгууллага, Дэлхийн банк, Азийн Хөгжлийн банк, Япон Улсын Олон улсын хамтын ажиллагааны байгууллага зэрэг олон улсын байгууллагуудын төлөөлөгчид уригдан оролцож байгаад талархаж байна.

Та бүхэн өөрсдийн оюун ухаан, мэдлэг, туршлагаа хуваалцаж, санал бодлоо чөлөөтэй солилцон хурлын үйл ажиллагаанд идэвхитэй оролцохыг зохион байгуулагчдын зүгээс хүсч байна.

Энэхүү хуралд оролцож байгаа төр, хувийн хэвшил, олон улсын банк, санхүү, хамтын ажиллагааны байгууллагууд, барилгын салбарын аж ахуйн нэгжүүд, мэргэжлийн холбоод, дэлхийн нэр хүндтэй компаниудын төлөөлөл нэг дор хуран чуулж, манай орны барилга, хот байгуулалтын салбарын хөгжлийн ирээдүйг хөндөн ярилцаж, хурлын үйл ажиллагааг үр дүнтэй, амжилттай зохион байгуулахад өөрсдийн хувь нэмрээ оруулна гэдэгт итгэж байна.

“Construction Mongolia-2013” олон улсын хурал нээснийг мэдэгдье.

“Барилгын салбарт төрөөс авч хэрэгжүүлж буй бодлого”

Илтгэгч: Барилга, хот байгуулалтын сайд Ц.Баярсайхан

Та бүхэнд “Барилгын салбарт төрөөс авч хэрэгжүүлж буй бодлого”-ын талаар товч мэдээлэл хийе.

Барилгын салбарын үүсэл хөгжлийн эхний үе шат буюу 1926-1930 онд барилгын байгууллага үүсэн бий болж, Монголын ууган үйлдвэрийн цогцолбор Аж үйлдвэрийн комбинатын барилга дээр Зөвлөлтийн мэргэжилтнүүд монгол ажилчдыг сургахын зэрэгцээ 1931 онд Зөвлөлт Холбоот Улсад 130-аад хүнийг барилгын мэргэжлээр бэлтгэсний үр дүнд үндэсний барилгачид бий болсон.

1931-1934 онд Улаанбаатар хотод цэмбэ, шир, булигаар, гутлын үйлдвэрүүд, цахилгаан станц, тоосгоны, төмрийн завод, Хатгалын ноос угаах үйлдвэр зэрэг тэр үеийн 100 гаруй сая төгрөгийн өртөг бүхий үйлдвэр, орон сууц, сургууль, соёл үйлчилгээний иж бүрэн барилга байгууламжийг хот, хөдөөд барьж ашиглалтад оруулж, барилгын салбар улс ардын аж ахуйн салбар болж хөгжсөн.

1954 онд Улаанбаатар хотын анхны ерөнхий төлөвлөгөө батлагдан, 1957 он гэхэд барилга угсралтын ажлын хэмжээ 338 сая төгрөгт хүрч, 1960 оноос ЗХУ болон ах дүү социалист орнуудын техник, эдийн засгийн тусламж эрс нэмэгдэн их бүтээн байгуулалтын ажил өрнөж, 1965-1989 онд барилгын материал, техникийн бааз суурь бэхжиж, улс ардын аж ахуйн тэргүүлэх салбар болтлоо хөгжсөн билээ.

1960-1990-ээд он бол Монголын барилгын салбарын хөгжлийн онцгой нэгэн үе юм. Энэ үед барилгын бүх төрлийн мэргэжилтнүүдийг дотоод, гадаадын их дээд сургуулиуд, техникум, техник мэргэжлийн сургуулиудаар бэлтгэж, Улсын барилгын зураг төслийн болон эрдэм шинжилгээ, судалгааны институтууд байгуулагдан салбарын хэмжээнд шинжлэх ухааны судалгаа, шинжилгээ хийгдэж, мөрдвөл зохих барилгын норм, дүрэм, стандартуудыг батлан гаргаж байлаа.

Монгол Улс төвлөрсөн төлөвлөгөөт эдийн засгаас зах зээлийн эдийн засаг руу шилжих шилжилтийн үе болох 1991-1995 онд барилгын салбарын үйл ажиллагаа үндсэндээ зогссон бөгөөд өнгөрсөн 20 гаруй жилийн хугацаанд улс орны нийгэм, эдийн засгийн салбарын бүтэц өөрчлөгдөж, банк, санхүү, үйлдвэрлэл, үйлчилгээ, хөрөнгө оруулалтын салбарт хувийн хэвшлийн эзлэх байр суурь ихээхэн нэмэгдсэн.

Сүүлийн 10-аад жилд манай улсын хот суурин руу чиглэсэн хүн амын шилжих хөдөлгөөн эрс нэмэгдэж, хүн амын суурьшлын хэв шинжид томоохон өөрчлөлт ороод байна. Монгол Улсын нийт 2.7 сая гаруй хүн амын 78.1% нь 25 хот, 300 гаруй суурин газарт суурьшиж, үүнээс 68.6% нь Улаанбаатар хотод, 8.7% нь Дархан-Уул, Орхон аймгуудын төвд, үлдсэ‎н 22.7% нь бусад аймаг, сумын төвүүд‎эд амьдарч байна.

Манай улсын нийт 768.3 мянган өрхийн 23.8 хувь нь инженерийн дэд бүтцэд холбогдсон тохилог орон сууцанд амьдарч байна.

2012 онд 811.3 тэрбум төгрөгийн барилга угсралтын ажлыг гүйцэтгэснийг 2001 оныхтой харьцуулбал даруй 8 дахин, 2013 оны эхний 6 сарын байдлаар 355.2 тэрбум төгрөгийн барилга угсралтын ажлыг хийж гүйцэтгэсэн нь өмнөх оны мөн үеийнхээс 252.6 хувиар өссөн байна.

Барилга, хот байгуулалтын салбарын хөрөнгө оруулалт нь 2012 онд улсын төсвийн нийт хөрөнгө оруулалтын 4.8%-ийг эзэлж байсан бол 2013 онд 12 хувийг эзэлж, салбарын 2013 оны хөрөнгө оруулалтын хэмжээ өмнөх оныхоос 2.3 дахин өсч байна.

Шинэчлэлийн Засгийн газрын бүтцээр Барилга, хот байгуулалтын яам байгуулагдан газрын харилцаа, хот байгуулалт, барилга, барилгын материалын үйлдвэрлэл, орон сууц, нийтийн аж ахуйн бодлогын үр нөлөөг дээшлүүлэх замаар хүн амын эрүүл, аюулгүй, ая тухтай амьдрах нөхцлийг бүрдүүлэх эрхэм зорилготойгоор Засгийн газрын 2012-2016 оны үйл ажиллагааны хөтөлбөрийн хүрээнд дараах томоохон зорилтуудыг дэвшүүлэн ажиллаж байна.

Construction Mongolia-2013”сэдэвт хурал боллоо