Увс аймгийн Улаангом хотод хөгжимт жүжгийн “Ойрад” театр шинээр ашиглалтад орлоо. Тус үйл ажиллагааны нээлтэд УИХ-ын дарга Д.Амарбаясгалан оролцов.

Тэрбээр “Улсын төсвийн хөрөнгө оруулалтаар 5 жилийн хугацаанд бүтээн байгуулсан шинэ театр уламжлал, шинэчлэлийг хослуулсан урлаг, соёлын төв төдийгүй шинжлэх ухаан танин мэдэхүйг түгээсэн, шинэ технологи бизнес санаа ундарсан, бүтээлч үйлдвэрлэлийн цогцолбор болон өргөжинө гэдэгт итгэлтэй байна” гэсэн юм.

Ойрад театрт парламентаас хэрэгжүүлж буй бодлого шийдвэр, зорьж буй шийдэл, төлөвлөгөөний талаар иргэдтэй нээлттэй санал солилцжээ. Иргэдийн зүгээс бүсчилсэн хөгжлийн үзэл баримтлалын ерөнхий зураглал оновчтой хэдий ч бүс нутгийн иргэдийн амьдралд мэдэгдэхүйц бодитой өгөөжийг нэмэгдүүлэхэд анхаарах хэрэгтэйг уламжиллаа.

Алслагдсан аймгийн төвийн худалдаа эрхлэгчдэд нэмүү өртөг шингэсэн зардлуудаас гадна зээлийн хүү, татварын хэмжээ зэрэг нь бизнесээ өргөжүүлэхэд хамгийн том чөдөр тушаа болж байгааг ч хэлж байна.

“Иймд Баруун бүсийнхэнд төвлөрсөн зах зээлийг ойртуулж, ДНБ-ийг нэмэгдүүлж, эдийн засгийг төрөлжүүлэх зорилгоор таван аймгийн төвийг 5 боомттой авто замаар бүрэн холбох ажлыг нэн түрүүнд эхлүүлнэ. Ингэснээр мал аж ахуй, газар тариаланг хослуулан эрхэлдэг уламжлалтай Увс нутгийнхан дотоодын үйлдвэрлэлээ нэмэгдүүлж, экспортод нийлүүлэх бүрэн боломжтой” хэмээн Д.Амарбаясгалан дарга онцлов.