УИХ-ын дарга Д.Амарбаясгалан Завхан аймгийн Тэс, Баянхайрхан суманд ажиллалаа.

Баруун бүсийн хөгжлийн тулгуур бодлогыг тодорхойлох, аймаг сумдад шаардлагатай хөрөнгө оруулалтуудыг эрэмбэлж иргэдийн санал хүсэлтийг сонсох зорилгоор Увс, Ховд, Говь-Алтай аймгийн 30 гаруй суманд ажилласны дараа Завхан аймгийн Тэс, Баянхайрхан сумын иргэдтэй уулзав. 

Энэ жилийн улсын төсвөөс 17,5 тэрбум төгрөгийн хөрөнгө оруулалтаар Завхан аймгийн Түдэвтэй сумын уулзвараас Арцсуурь боомт хүртэлх чиглэлийн 159 км авто замын бүтээн байгуулалтын ажлыг эхлүүлэхээр болсон. Худалдаа, үйлдвэрлэл, тээвэр, аялал жуулчлал гэхчилэн өсөн нэмэгдэх өгөөж бүхий энэ чиглэлийн маршрут Тэс, Баянхайрхайн  зэрэг сумдын нутгийг дайран өнгөрөх бөгөөд сумын төвийн 1.5 хүртэлх км авто замыг төсвийн хөрөнгө оруулалтаар барихаар тусгажээ. 

Маршрут, чиглэлээс тогтохоос эхлээд олон жил хүлээгдсэн уг бүтээн байгуулалт ийнхүү эхэлж буйд Тэс, Баянхайрханчууд баяртай байгаагаа илэрхийллээ. Өргөн хэрэглээний бараа бүтээгдэхүүний үнийн өсөлт, согтууруулах ундааны хэрэглээ, бэлчээрийн доройтол, боловсон хүчний хомсдол зэрэг асуудлыг иргэд хөндөж байна. Хоорондоо ойр, хүн ам сийрэг эдгээр сумдын малчид нэгдэн, хоршоо байгуулж, өрхийн үйлдвэрлэлээ өргөжүүлэн, зэргэлдээ сумдынхаа зах зээлд нийлүүлэх зэрэг газарзүйн байршлаа ашиглан орлогоо нэмэгдүүлэх бодит боломж байгааг ярилцлаа. 

Нийт 8 сумтай хил залгаа орших Баянхайрханчууд энэ зах зээлээ ашиглаж, өвс тэжээлийн тариалалтаа эрчимжүүлснээр бүсийнхээ төв болох ч боломжтой харагдлаа хэмээн УИХ-ын дарга Д.Амарбаясгалан байр сууриа илэрхийлэв.