Цэцэрлэгийн хүрэлцээ муу байгаагаас 26 мянган хүүхэд сурч боловсрох эрхээ эдэлж чадахгүй байна.

Нийслэлийн хэмжээнд 99.500 цэцэрлэг үйл ажиллагаа явуулж байгаа. Энд цэцэрлэгийн насны 74 мянган хүүхэд хүмүүжиж байна. Мөн хорооны цэцэрлэгийн ачаалал нэмэгдсэнээс сурч боловсрох эрхээ эдэлж чадахгүй байгаа цөөнгүй хүүхэд байгаа. Энэ мэтээр цэцэрлэгийн хүрэлцээ муутайгаас 26 мянган цэцэрлэгийн насны хүүхэд гэртээ болон өөр байдлаар хүмүүжиж байна.

Нийслэлийн боловсролын газрын дарга Ц.Отгонбагана:

- 74 мянган хүүхдийг хамруулахдаа өнөөдрийн байгаа цэцэрлэгийн барилгын хүчин чадлыг 1.7 буюу хоёр дахин их хүүхдийг хамруулан ашиглаж байна. Цэцэрлэгийн хүртээмжийг нэмэгдүүлэх чиглэлээр төр засгаас ч мөн анхаарч байгаа. Удахгүй 89 бага сургууль, цэцэрлэгийн цогцолбор барих ажлыг эхлүүлнэ.

2013 онд улсын төсвийг батлахад сургууль цэцэрлэгийн хүрэлцээ муу байгааг харгалзан үзэж боловсролын салбарт чамгүй хөрөнгө төсөвлөсөн. Гэтэл хөрөнгө мөнгө нь шийдэгдсэн байхад энэ жил баригдах ёстой 10 гаран цэцэрлэг баригдсангүй?

- Өнөөдөр цэцэрлэг барих газар олдохгүй байгаагаас ажил их удаашралтай байна. Мөн батлагдсан нэг загварын цэцэрлэгийн барилгын зураг байхгүй байгаа. Шинэ зураг боловсруулах  ажил энэ жил удаашралтай байлаа. хэмээн хариуллаа.

Улсын хэмжээнд цэцэрлэгийн нэгдсэн стандартыг хангасан жишиг зураг бүтэн жилийн хугацаанд батлагдаагүй. Өдөрт хэдэн арваараа сүндэрлэж байгаа барилгын дунд цэцэрлэг барих газар олдоогүй гэх шалтгаанаас үүдэн хүүхдүүд цэцэрлэгт хамрагдаж чадахгүй байна. Үүний цаанаа олон арван залуу гэр бүл төрийн үйлчилгээ авч чадахгүй ажил амьдралаа зохицуулж чадахгүй хүндрэлтэй нөхцөлд аж төрж байгаа.

Цаашлаад харгалзах хүнгүй олон хүүхэд гэртээ цоожтой үлдэх, эсвэл хэдхэн насны зөрүүтэй ах эгчийнхээ хяналтад үлдэж байна. Энэ нь монголын ирээдүйн баялаг болсон бяцхан иргэдийн сурч боловсрох цаашлаад амьд явах эрхэд халдах нөхцөлийг үүсгэсээр байна.