Бизнесменүүд хөдөө аж ахуйн үйлдвэрлэлд дэмжлэг хүслээ
Бизнесменүүд хөдөө аж ахуйн үйлдвэрлэлд дэмжлэг хүслээ.
2014.03.28

Бизнесменүүд хөдөө аж ахуйн үйлдвэрлэлд дэмжлэг хүслээ

Монголын хүнс, хөдөө аж ахуйн  үндэсний ассоциациас зохион байгуулсан “Хүнс, хөдөө аж ахуйн салбар- Иргэдийи оролцоо" сэдэвт зөвлөлгөөн өчигдөр боллоо. Тав дахь удаагийн  уг зөвлөгөөнд нийслэлийн есөн дүүрэг, 21 аймгийн төлөөлөл оролцсон юм.

Энэ салбарт үйлдвэрлэл эрхэлж байгаа жижиг, дунд бизнес эрхлэгчид өөрсдийн хүчээр өнөөг  хүрчээ. Тиймээс төрийн дэмжлэг туслалцаа тэр бүр тэдэнд хүрдэггүй учир үйлдвэрлэлээ өргөжүүлэх  боломж  бага байдаг талаар  зөвлөгөөнд оролцсон хүмүүс хэлж байлаа. Жижиг, дундынхан гэхээр л жимс ногоо дарах, цагаан идээ  боловсруулах гэж ихэнх нь хүлээж авдаг байна.

Хэдий тэдний бүтээгдэхүүн үндэсний үйлдвэрлэгчдийг бодвол нийтийг хамарч чадахгүй ч цөөхөн тооны ажлын байр бий болгох, иргэдийг эрүүл хүнсээр хангах зэрэг давуу тал олон байдаг. Жилээс жилд өргөжиж байгаа уг арга хэмжээнд хөдөөгийн жижиг, дунд үйлдвэрлэгчид идэвхтэй оролцох болсон хэмээн Нийслэлийн хүнс, хөдөө аж ахуйн ассоциацийн гүйцэтгэх захирал Х.Лхамсүрэн ярьсан юм.

Харин иргэдийн хувьд төр өрхийн үйлдвэрлэл, хоршоо, жижиг дунд үйлдвэрийн алинд нь дэмжлэг үзүүлэхээ тодорхойлох нь чухал хэмээн хэлж байсан юм.

Энэ үеэр хөдөө  орон нутгийн  иргэд газар орныхоо онцлогт тохирсон бүтээгдэхүүн авчирсан байв. Тухайлбал, Увс аймгийнхан чацаргана, арвайн гурил, жамц давс, цайны хужир зэргийг авчирсан байхад Төв аймгийн жижиг, дунд үйлдвэр эрхлэгчид артишок, улаан лооль, улаан томс, жам гүргэм тариалж бүтээгдэхүүн болгон авчирсан байв. Ингээд жижиг, дунд үйлдвэр, үйлдвэрийг хөгжүүлэхэд юу хэрэгтэй талаар тэднээс сонирхсон юм.

Увс  аймгийн  Өндөрхангай сум Д.Цэрэнбат “Би сүүлийн таван  жил эмийн  ургамлын  чиглэлээр судалгаа хийж, түүж  байна. Манай  Хан-хөхийд 320 гаруй төрлийн ургамал ургадаг. Одоогийн байдлаар 20 гаруй төрлийн өвчинд тохирох эмийн ургамлыг хатааж, хэрэглэх зааврыг нь бэлтгэн иргэдэд хүргэж байна. Хамгийн гол нь ургамлаа тарих хүлэмж,  хатаах, баглаа боодолтой  болгох зэрэг олон шат дамждаг. Эдгээр ажлыг хийхэд сум, орон нутгаас бага зэрэг дэмжлэг үзүүлэхэд бид ажиллах бүрэн боломж бий” гэсэн юм

Түүнчлэн Сэлэнгэ аймгийн Шаамар сум “Органик бал" хоршооны гишүүн  Ц. Батжаргал “ Анх 1996 оноос хойш зөгий маллаж эхэлсэн. Манай хоршоо 22 гишүүнтэй 240 бүл зөгийтэй. Анх зөгий үржүүлэхдээ 10 сая төгрөгийн зээлийг нэг хувийн хүүтэйгээр авсан. Монголд зөгийний аж ахуй хамгийн тохиромжтой. Жижиг дунд үйлдвэрийг дэмжиж байна гэдэг боловч бидэнд тэр дэмжлэг ирж байгаагүй” гэлээ.