Эрүүл мэндийн сайд Н.Удвал Архангай аймагт ажиллалаа
Эрүүл мэндийн сайд Н.Удвал “Эрүүл мэндийн довтолгоо” арга хэмжээнд оролцож, хөдөө орон нутгийн эмч, эмнэлгийн ажилтнуудтай уулзан, санал хүсэлт, тулгамдаж буй асуудлыг нь сонсон Архангай аймагт хоёр өдөр ажиллалаа.
Тэрбээр эхний өдөр Хашаат, Цэнхэр сумын ЗДТГ болон хүн эмнэлгийн үйл ажиллагаатай танилцсан юм. Эрүүл мэндийн сайдыг аймгийн Засаг дарга Д.Бат-Эрдэнэ, аймгийн эрүүл мэндийн газрын дарга Р.Гандиймаа болон сумдын удирдлагууд, хэвлэл мэдээллийнхэн тослоо.
Хашаат сумын хүн эмнэлгийн хувьд ашиглалтад ороод гурван жил болж буй шинэ байртай боловч уурын зуухны асуудал хүндхэн байдаг гэнэ. Шинэ байр нь ашиглалтад ороод гуравхан сарын дараа уурын зуухных нь яндан цоорсон байна. Үүнээс хойш яндангаа гагнаж, сэлбэсээр гурван жилийг ардаа орхисон байна.
Мөн байсхийгээд л яндангаа хөөлж, цэвэрлэхгүй бол бөглөрөөд халдаггүй, уурын зуух барьсан компаниа хэд хэдэн удаа дуудаж янзлуулсан ч тусыг эс олжээ. Бохирын шугам байнга бөглөрдөг тухайгаа ч эмнэлгийнхэн ярилаа. Тус сумын хүн эмнэлгийн эрхлэгч нь сургуулиа дөнгөж төгсөж ирсэн шижигнэсэн залуу байдаг аж. Сайд дээрх тулгамдсан асуудлыг сонсож, тус дэм болохоо илэрхийллээ. Мөн тус эмнэлэгт олон жил тогоочоор ажилласан.
Т.Энхтуяа, жолооч О.Хүрэлдоржпалам нарыг “Эрүүлийг хамгаалахын тэргүүний ажилтан” цол тэмдгээр шагнаж урамшуулан, эмнэлэгт нь нярайн дулаан хөнжил бэлэглэлээ.
Цэнхэр сумын хувьд хүн эмнэлэг нь тохижилт сайтай төдийгүй эхчүүдийн амрах байр, чийрэгжүүлэх, физик эмчилгээний өрөөнүүдтэй аж. Тус эмнэлгийн тулгамдаад буй асуудал нь сургуультайгаа нэг уурын зуухтай, тэр нь халаалт муутай учраас өвчнүүдийн ая тухыг алдагдуулдаг гэнэ. Энэ жил уурын зууханд боловсролын яамнаас засвар хийх гэж байгаа бөгөөд эмнэлэг рүү явдаг хэсгийг тасдан орхигдуулаад байгаа аж.
Түүнчлэн алслагдсан хоёр ч багийн эмч унаагүй учраас дуудлагад явж чаддаггүйгээ сайддаа хэлснээр салбарын сайд нь унааны асуудлыг шийдэж өгөхөө амлалаа. Эрүүл мэндийн сайд Н.Удвал тус эмнэлэгт хүчилтөрөгч шингэрүүлэгч бэлэглэхийн зэрэгцээ эрүүл мэндийн салбарт олон жил үр бүтээлтэй ажилласан Д.Оюунаа, Ц.Наран нарыг “Эрүүлийг хамгаалахын тэргүүний ажилтан” цол тэмдгээр шагнасан.
Эрүүл мэндийн сайд Н.Удвал хоёр дахь өдрөө “Заавал хэвшүүлэх 21 дадал” эрүүл мэндийн довтолгоо арга хэмжээний нээлтэд оролцсон байна.
Энэхүү арга хэмжээнд аймгийн Засаг дарга Д.Бат-Эрдэнэ, аймгийн Эрүүл мэндийн газрын дарга Р.Гандиймаа, аймгийн нэгдсэн эмнэлгийн дарга Ариунаа болон сумдын Засаг дарга нар, сумдын сургуулийн эмч нар, иргэд хамрагдлаа.
