“TOWER TV” студи болон NEWS агентлаг хамтран “Сэтгэлийн гүнд” ярилцлагын төслийг эхлүүлсэн билээ. Ярилцлагын хоёр дахь дугаарыг та бүхэнд хүргэж байна. Сэтгүүлч С.Энхцэцэгийн хөтөлдөг ярилцлагын булангийн энэ удаагийн зочноор УИХ-ын гишүүн асан Ж.Сүхбаатар уригдлаа.

Шинэ номын тухай

Цаг хугацаа хүнийг туршлага суулгаж, туршлага харин ур чадвар луу хөтөлдөг. Ур чадвар нь цаашлаад үнэ цэнэтэй мэргэжилтэн гэх ойлголтыг бүрдүүлж ирсэн. Салбар бүр үнэ цэнэтэй мэргэжилтнүүдийнхээ хүчээр хөгжиж ирсэн түүхтэй. “Би захиргааны эрх зүйн салбарт 23 настай байхаасаа эхлэн зүтгэсэн” гэж “Өрнөдийн орнуудын захиргааны эрх зүйн тойм” номын зохиогч Ж.Сүхбаатар өгүүлсэн юм.

Энэ ном түүний захиргааны эрх зүйн чиглэлээр бичсэн хоёр дахь бүтээл. Номын агуулга нь төрийн хийгээд нийтийн үйлчилгээний байгууллагууд хэний төлөө оршиж байгаа, иргэдэд хэрхэн үйлчилж, яаж тэдний эрх ашгийг хамгаалах тухай өгүүлэх хэдий ч хамгаас дотно анд нөхөддөө зориуллаа гэсэн өмнөтгөлтэй аж.

\

“Төр засгийн бүхий л давхаргад эмх замбараагүй байдал, авилга, эрх мэдлийн төлөөх сохор тэмцэл ноёлж буй цагт засаглалын бүтцийг шинээр эмхлэх тухай ярихад хэцүү” гэж Сүхээ үзэж байна.

“Төр өөрөө тулж түшиж байдаг түшмэлийнхээ нуруун дээр тогтдог. Тиймээс олон жил зүтгэсэн туршлагатай түшээ нар хийгээд эрч хүчтэй, чин зоригтой залуу мэргэжилтнүүддээ найдах хэрэгтэй. Тэд л жинхэнэ өөрчлөлтийг авчрах учиртай” гэсэн юм.

Түр зогсолт амьдралыг олон талаас нь харж эргэцүүлэх боломж олгодог

“Олны танил хүмүүс, эсвэл тодорхой албан тушаалтнууд, нийгмийн манлайлагчдын дунднэр хүндээ хадгалах, бусдын хүндлэл, итгэлийг дааж явахын төлөө өөртөө ч зав гаргалгүй, цаг наргүй хөдөлмөрлөх явдал түгээмэл. Нэр хүнд гэдэг юмандаа баригддаг гэхүү дээ. Нэг л мэдэхэд орчноосоо тасарч бодит байдлыг мэдрэхээ байж эхэлнэ. Үр дүн нь стресс, уналт.

Тиймээс хүн ажил амьдралынхаа тодорхой мөчлөгүүдэд түр зогсолт хийж нөхцөл байдлаа үнэлэн эргэцүүлж байх чухал гэдгийг би ухаарсан” гэж Сүхээ улс төрийн тайм аутынхаа талаар тайлбарласан юм. “Эхлээд санаагаар унасан, дараа нь гутарсан, сүүлд нь харин эргэцүүлж эхэлсэн” гээд өнгөрсөнд хийж бүтээсэн ажлуудынхаа талаар үнэлж дүгнэн, эргэцүүлэх тусам урамшиж, эцэст нь, үзгээн шүүрч номоо бичиж эхэлжээ.

Бас эв энгийн олон зүйлийн тухай бодох ч завгүй явсанаа ухаарч. “Бодит ахуйг таних ганцхан арга бий. Тэр нь өөрөө бодит ахуйн хэсэг нь болох” гэсэн юм.

“Сонгогчидтойгоо чин сэтгэлийн холбоо үүсгэхучиртай байсан. Хийсэн, хийхээр төлөвлөсөн ажлуудаа ойлгуулж, харилцан ойлголцол үүсгэж чадаагүй нь миний алдаа” гэж  тэрээр 2012 оны сонгуулийнхаа компанит ажлын үр дүнг дүгнэсэн юм.

Түр зогсолт нь зүгээр суухын нэр биш. Харин дотоод хүнтэйгээ ажиллах цагтай боллоо гэсэн үг аж. Түр зогсолтыг Сүхээ бясалгал хийж, бөхөөр хичээллэхийн хажуугаар ном уншиж, бас бичиж, хүмүүстэй уулзаж, найзуудтайгаа инээж наргин,үндсэндээ бол, тун завгүй өнгөрөөж байгаа гэнэ.

Түшмэлжинэ гэдэг нь хүний сэтгэлгээ, ажил үйл нь бүхлээрээ зөвхөн оногдсон ажил албаныхаа  чиг үүргийг гүйцэтгэхэд төвлөрч, “би” байх чанараа алдаж эхлэхийг хэлнэ. Ямар нэг машины эд эс, эрэг шураг болохтой ижил гэж Сүхээ тодорхойлов. “Мэдээж, төрд мэргэжлийн тогтвортой үйл ажиллагаа чухал. Гэвч хэт сонгодог хэлбэрт шилжин түшмэлжиж, хүнийхээ хувьд хүртэх ёстой олон мэдрэмжээс холдоод эхлэвэл бас дэмий юм билээ”гэж нэмж өгүүлсэн юм. Тэгээд л тэр гучин гурван мянга гаруй дагагчдаа хандан “Би түшмэлжиж байжээ” хэмээн жиргэсэн хэрэг.

“Би түшмэлжиж байжээ” гэх жиргээ

Үнэхээр эрхэм найзтай сэтгэлийн яриа өрнүүлэхийг юугаар ч орлуулшгүй гэж Сүхээ ярьсан. Номоо хэвлэлтээс гарахаар зориулж бичсэн дотно найз нартайгаа уулзаж ярилцах завшаан болгох бодолтой гэнэ. Бас ойрын үед жиргээний дагагчидтайгаа ч уулзалт зохион байгуулж магад. “Бусадтай уулзаж, шинэ сонин сонсч ярилцах нь хүнд цоо шинэ мэдрэмж төрүүлдэг”гэж тэрээр ярив. Өөрийнх нь хэлсэнээр тэр мундагтаа биш харин гарцаагүй байдалд орсоноос зогсолтгүй өрнөж ирсэн амьдралын хэмнэлээ өөрчлөх шаардлага гарч. Тэгээд эргэн тойрноо тайван ухаанаар ажиглан харж, өмнө нь анзаарч байгаагүй олон зүйлийн тухай эргэцүүлэх боломжтой болжээ. Амжилт гэдэг эрх мэдэл, албан тушаалын замаар зогсолтгүй ахихын нэр биш. Хангалттай мөнгө, хөрөнгө хураахынч нэр биш. Амжилт гэдэг бол чи хэн баймаар байна түүндээ хүрч чадахын нэр гэж Сүхээ хэлсэн.

@STetseg