УИХ-ын Төрийн байгуулалтын байнгын хорооны дарга А.Бакейгаас хаврын чуулганы үр дүнг хэрхэн тодорхойлж байгааг тодрууллаа.

Хаврын чуулган хэлэлцэхээр товлосон хуулиудынхаа заримыг баталж амжилгүй өндөрлөлөө. Энэ удаагийн чуулганд ямар дүн тавих вэ?

-Ер нь бол УИХ-ын хаврын чуулган өмнөө тавьсан зорилтоо биелүүлсэн. Анхны жагсаалтаар 33 асуудал төлөвлөсөн байсан. Үүний нэгийг нь татаж авсан. 32 асуудлын 3 нь өргөн мэдүүлэгдээгүй. Ингээд 29 хууль үлдэж байгаа юм. Үүний 14 хуулийг чуулганы хугацаанд бүрэн баталж гаргасан. 11 нь анхны хэлэлцүүлгийн шатанд хүртэл явсан. Баталсан болоод анхны хэлэлцүүлгээ хийсэн хуулиудаа оруулж тооцвол, хаврын чуулган 80 хувьтай ажиллажээ. Мөн жагсаалтад ороогүй маш олон чухал хуулийг баталж гаргаснаараа өмнөх чуулганы хугацаатай харьцуулахад хаврын чуулган ажил хэрэгч, нэлээд олон хууль тогтоомжийг баталж шийдвэрлэсэн чуулган боллоо.

-Өмнөх чуулгануудаар дунджаар хэдэн хууль баталж байв. Өмнөх чуулгануудтай харьцуулсан байдлаар хэлвэл?

-УИХ-аар баталж байгаа хуулиуд дээр статистик гаргах нь төвөгтэй. Нэг хуулийг дагаж мэдүүлэгдсэн хууль гэхэд зарим хууль дээр 50-60, бүр 100 хууль ч дагаж орж ирдэг. Иймээс шууд тоо хэлэхэд амаргүй. Бие даасан хууль хэдийг батлав гэвэл чухал үзүүлэлт байж болно. Энэ удаагийн чуулганаар бие даасан хууль 14-ийг баталсан гэж түрүүнд хэлсэн. Энэ нь боломжийн үзүүлэлт. Түүнчлэн зарим чухал хуулиуд хойшилсон тал бол бий.

Тухайлбал, Эрүүгийн хууль, Зөрчлийн хууль хоёрыг баталсан бол одоогийн хэрэгжиж буй Эрүүгийн хуулийн зарим заалт зөрчилд тооцогдож, өнөөдөр хоригдож байгаа иргэдийн хувьд чөлөөлөгдөж асуудал хөндөгдөх байсан. Гэхдээ эдгээр хуулийг ээлжит бусаар батлах нь зүйтэй. Дээр нь Эдийн засгийн болон Өршөөлийн хуулийг саяны хоёр хууль батлагдсан тохиолдолд батлая гэж төлөвлөж байсан ч болсонгүй. Үүний зэрэгцээ Сонгуулийн нэгдсэн хуулийг арай амжсангүй. Намрын чуулганаар Сонгуулийн нэгдсэн хууль, Улс төрийн намуудын тухай хууль, Төрийн албаны тухай хуулийг ямар ч байсан гаргах боломжтой гэж үзэж байгаа.

-Хаврын чуулганаар Тавантолгойн асуудлыг шийдэх бололцоо байсан уу? Чуулганы уур амьсгал ямар байв? Иргэдийн дунд улстөржилт их байгаагаас төрийн ажил урагшлахгүй байна хэмээн шүүмжилж байгаа шүү дээ?

-УИХ-д суудалтай бүх намууд хамтарч Засгийн газар байгуулсан хугацааны чуулган шүү дээ. Тиймээс хэл амтай багатай чуулган байсан гэж хэлж болно. Гэлээ гэхдээ бодит байдал дээр намууд бие биедээ саад хийснийг үгүйсгэхгүй. Үүнээс илүү үр дүн гарах байсныг бас үгүйсгэхгүй. Тавантолгойн төслийн хувьд эргэн харж, хуульд нийцүүлэх асуудал байсан учраас Засгийн газар татаж авсан. Ийм том төсөл дээр долоон хэмжиж, нэг огтлох гэдэг зарчмаар ажиллах нь зүйтэй юм.

-Ерөнхий сайд анх ажлаа аваад “Нэгдүгээрт эдийн засаг, хоёрдугаарт эдийн засаг, гуравдугаарт эдийн засаг” хэмээн Шийдлийн Засгийн газрын чиглэлийг тодорхойлсон. Хаврын чуулган Ерөнхий сайдыг барьж ажиллаж буй чиг шугамтай хэр нийцсэн гэж үзэж байна вэ?

-Засгийн газраас өргөн барьсан эдийн засгийн шинжтэй гол гол хуулиудыг баталсан. Төрөөс аж үйлдвэрийн талаар баримтлах бодлого, Үйлдвэрлэлийг дэмжих хууль, НӨАТ-ын шинэчилсэн найруулгыг баталсан. Энэ нь эдийн засгийн хүндрэлтэй байдлыг даван туулахад чухал алхам болно гэж үзэж байгаа. Гэхдээ би дахин хэлэхэд, үүнээс илүү үр дүнд хүрэх байсан ч УИХ-ын бүрдүүлж байгаа нам, эвслийн бүлгүүд зарим талаараа зарим хуулийг хойш татсан нь харамсалтай байна. Тухайлбал, Зөрчлийн тухай, Хяналтын тухай хууль нь бизнесийг эрүүлжүүлэхэд онцгой ач холбогдолтой хуулиуд байсан.

Хаврын чуулган 80 хувьтай ажилласан