Хаягдал баттерей цуглуулах хайрцаг бүтээх 1.5 сая төгрөгийн шагналын сантай уралдаан сурагчдын дунд зарлалаа
2018.03.05

Хаягдал баттерей цуглуулах хайрцаг бүтээх 1.5 сая төгрөгийн шагналын сантай уралдаан сурагчдын дунд зарлалаа

БОАЖ-ын сайд Н.Цэрэнбат Ерөнхий боловсролын сургуулиудын дунд, ахлах ангийн сурагчдыг байгаль дэлхийгээ хамгаалах үйлсэд уриалан дуудаж, цаашлаад гэр бүлийнхэндээ эх дэлхийгээ хайрлах, хамгаалах үйлсийг түгээн, таниулах зорилготойгоор “Ногоон паспорт” санаачилгыг эхлүүллээ.

Энэхүү санаачилгын хүрээнд сурагчид эко клубын тоог нэмэгдүүлж,  жилд байгаль хамгаалах чиглэлээр 12 ажил хийх юм байна. Сурагч бүрт олгогдох “Ногоон паспорт” нь 12 хуудастай байх ба хийсэн ажлынхаа тоогоор хүүхдүүд хуудастаа тэмдэглэгээ хийлгэж, жилийн эцэст дүгнүүлэх аж.

Энэхүү санаачилгын хүрээнд БОАЖЯ, тус яамны харьяа Цэнгэг усны нөөц, байгаль хамгаалах төв, Нийслэлийн боловсролын газар, Нийслэлийн байгаль орчны газартай хамтран ерөнхий боловсролын сургуулиудын дунд, ахлах ангийн сурагчдын дунд  “Хаягдал зай цуглуулах хайрцагны загвар зохион бүтээх уралдаан” зарлаж байгаагаа хэвлэлийн бага хурал зарлан мэдээллээ.

Энэ талаар БОАЖЯ-ны харьяа Цэнгэг усны нөөц, байгаль хамгаалах төвийн захирал Г.Номин хэлэхдээ“Ногоон паспорт” санаачилгын хүрээнд зарлаж буй энэхүү уралдаанд Нийслэлийн Ерөнхий боловсролын дунд, ахлах ангийн сурагчид эко клубуудээрээ дамжуулан нэмэгдоролцох боломжтой.

Хүүхдүүд маань хаягдал баттерей цуглуулах хайрцаг хийснээрээ бусдадаа хогоо ангилж хаях дадал, зуршлыг бий болгох эхлэлийг тавьж байгаагаараа онцлог юм. Уралдаанд оролцох бүтээлийг 2018.03.15-ны өдрийн 17.30 цагаас өмнө БОАЖЯ-ны харьяа Цэнгэг усны нөөц, байгаль хамгаалах төвд хүлээн авч, ажлын хэсэг 1, 2 болон тусгай байрыг шалгаруулна.  I байрт орсон клуб 1 сая, II байр эзэлсэн клуб 500 мянган төгрөг, III байр эзэлсэн клуб тусгай шагнал хүртэнэ. “Ногоон паспорт” санаачилгад нэгдэж, идэвхитэй оролцсон 1 эко клубыг жилийн эцэст ижил төрлийн үйл ажиллагаа явуулдаг гадаад улсын эко клубын туршлагатай танилцуулах үйл ажиллагааг зохион байгуулахаар бэлтгэж байгаа.

Үүнээс гадна эко клубын хүүхдүүд маань “Ногоон паспорт” санаачилгын хүрээнд ямар ажил хийхээ өөрсдөө тодорхойлох бөгөөд энэ сарын 17-нд “Олон улсын хүүхдийн Найрамдал” төвд болох Эко клубуудын чуулга уулзалтаар өөрсдийн дуу хоолойг, шийдвэр гаргах түвшнийхэнд хүргэх боломж нээгдэх юм” хэмээсэн.

Энэхүү санаачилгыг БОАЖ-ын сайд Н.Цэрэнбат Засгийн газрын мөрийн хөтөлбөрийн дагуу  хүүхэд залуусын хүмүүжил, төлөвшилд эергээр нөлөөлөх бодлогын хүрээнд байгаль хамгаалах ажилд бүх нийтийн оролцоог хангах, ёс заншлаа дээдэлсэн, байгальд ээлтэй зөв дадлыг төлөвлшүүлэх ажлын хүрээнд эхлүүлж байгаа юм.

Тэрбээр байгаль орчин, аялал жуулчлалын салбарт “Хандлагаа өөрчилье” багц ажлыг эхлүүлэх бөгөөд өсвөрийн байгаль хамгаалагчдыг бэлтгэх “Ногоон паспорт” санаачилга нэгээхэн хэсэг нь юм.