Авто тээврийн салбарынхан 85 жилийн хугацаанд юу хийж бүтээснээ өнгөрсөн баасан гаригт баярын хурлаараа дүгнэн ярилцлаа. Хурлыг ЗТБХБ-ын сайд Х.Баттулга нээн "Цэргийн яамны дэргэд 1923 онд 10 гаруй автомашинтай анхны авто гарааш байгуулагдан, дараа жилээс нь аж ахуйн яам болон харилцан туслах хоршоо зэрэг байгууллагууд цөөн автомашин авч, тээвэр хийх болсноор үндэсний тээврийн байгууллагын суурийг тавьсан билээ. 1924 оны арваннэгдүгээр сард хуралдсан Монгол Улсын анхдугаар их хурлаар Тээх нэвтрүүлэх хэргийг эрхлэх тусгай газар байгуулах, уурын тэргийг бэлтгэх, засварлах, хадгалах ажлыг сайжруулах шийдвэр гарсны дагуу Засгийн газар Аж ахуйн яамнаас долоон автомашин бусад хөрөнгийг шилжүүлэн, тээх нэвтрүүлэх газрыг 1925 оны долдугаар сарын 15-нд байгуулсан нь Монгол Улсын авто  тээврийн салбарын үүсэл болсон билээ. 85 жилийнхээ ойг тэмдэглэн өнгөрүүлж буй энэ салбарт юм бүхэн амар байгаагүй ээ. Өнөөдөр Монгол Улс дотоодынхоо авто сүлжээг уртасган БНХАУ, ОХУ, Казахстан зэрэг 10 гаруй оронтой олон улсын авто тээврийн харилцааны тухай хэлэлцээр байгуулж, олон улсын конвенцид нэгдэн, олон улсын авто тээврийн холбооны гишүүнээр элссэн нь улс хоорондын тээврийг хөгжүүлэх чухал алхам болсон.

Түүнчлэн эдийн засгийн нээлттэй бодлого явуулснаар орон нутаг гэлтгүй олон улстай хийх эдийн засаг худалдаа, жуулчдын тоо өсч байгаа нь улс хооронд болон хил залгаа аймаг мужийн хооронд зам тээврийн харилцааг өргөжүүлэх шаардлага байгааг илэр-хийлж байна. Монгол Улс БНХАУ-тай хилийн 12, ОХУ-тай хилийн байнгын ба байнгын бус ажиллагаатай гарц, боомтоор авто тээврийн харилцааг зохицуулж байна" хэмээв.

Өнөөдрийн байдлаар тус салбар дотоодын нийт бүтээгдэхүүний 14 хувийг бий болгодог байна. Зөвхөн 2009 оны байдлаар автотээврийн компаниуд 2000 оныхоос тээсэн ачааны хэмжээ 7,1, ачаа эргэлт 1,3, зорчигчийн тоо 2,6, зорчигч эргэлт 4,2 дахин нэмэгдсэн байна. Нийт тээврийн дүнд автотээвэр ачаа тээвэрлэлтээр 42,7 хувийг, зорчигч тээвэрлэлтээр 98,5 хувийг тус тус эзэлж байгаа нь жилээс жилд тус салбарын гүйцэтгэсэн ажлын хэмжээ өсч байгааг харуулна гэж тээвэрчид бахархан ярьж байлаа. Түүнчлэн Авто тээврийн тухай хууль 1999 онд батлагдснаар энэ салбарт том эргэлт авчирсан гэж тэд дүгнэж байсан. Учир нь, тус хууль авто тээврийн талаарх төрийн байгууллагуудын бүрэн эрхийг зааглан тогтоосны зэрэгцээ, ачаа, зорчигч тээвэрлэлтийн зохион байгуулалт, зохицуулалт хяналтын нийтлэг журам, үндсэн зарчмыг тодорхойлж өгсөн аж. Гэхдээ өнгөрсөн хугацаанд хийж бүтээсэн ажлаар дүүрэн он жилүүд байсан ч салбарт ажиллагсдын хүний нөөцийн бодлогын асуудал, ажлын байрны баталгааг хангах, олон   цагаар   ажиллахыг хязгаарлах,   цалин   хөлс, нийгмийн асуудлыг цогцоор нь    шийдэж    өгөхийг    ч тээвэрчид удирдлагуудаасаа хүсч байсан юм. Энэ дагуу салбарынх нь сайд анхаарна хэмээгээд тээврийн салбарыг 2021     хүртэл    хөгжүүлэх  стратегийн бодлого, чиглэлийг тодорхойлон, мянганы замын сүлжээ болон замын  дэд  бүтцийг сайжруулах, дэвшилтэт техник технологй   нэвтрүүлэх зэрэг олон арга хэмжээг цаашид хамтдаа  хийнэ хэмээн тээвэрчдээ  зоригжуулсан юм.

85   жилийн   ойн   арга хэмжээ   өнгөрсөн   бямба гаригт Төв цэнгэлдэх хүрээлэнд үргэлжилж, Монгол Улс   дахь авто машины түүхийг өгүүлсэн парад, мотоциклийн  үзүүлэн тоглолт, 128 хүчит бөхийн барилдаан боллоо.

Мөн Монгол улсад дуунд зориулан босгосон хоёр дахь хөшөө тээвэрчдийн сүлд дуу  болсон "Алтан шар зам"-ынх  байлаа. Хөшөөг Автотээврийн газрын өмнөх талбайдбосгосон юм.