Энэ дагуу 2009 оны 12 дугаар сарын 18-ны өдөр нөөцийн цэг, салбаруудад 164,3 сая төгрөгийн үнэ бүхий 900 тонн өвс, 383,4 тонн төгрөгийн үнэ бүхий 2900 тонн тэжээл хүргэх цуваа орон нутгийг зорилоо.

Мөн малчдад эрүүл мэнд, нийгмийн халамжийн үйлчилгээ үзүүлэх зорилгоор Говь-Алтай аймгийн Төгрөг, Жаргалан, Завхан аймгийн Шилүүстэй, Эрдэнэхайрхан, Асгат, Өвөрхангай аймгийн Уянга, Сант сумын хүн эмнэлэг, Дорнод аймгийн Чойбалсан, Говьсүмбэр аймгийн Малхын талд байрлах Аймаг дундын отрын бэлчээр ашиглалтын захиргаанд тус бүр 1, нийт 9 автомашин, Өвөрхангай аймгийн Богд суманд АД-100 дизель станц 2-ыг илгээлээ.

“Архангай, Баянхонгор, Баян-Өлгий, Говь-Алтай, Дундговь, Завхан, Өвөрхангай, Өмнөговь, Хөвсгөл аймагт малын 5 төрлийн эм, биобэлдмэлийг хүргэж байгаа нь мал сүргээ эрүүлжүүлэх, тарга тэвээргийг нь алдагдуулахгүй байхад төр, засаг анхаарч байгаагийн илрэл. Засгийн газар, Улсын Онцгой комисс, Онцгой байдлын ерөнхий газар малчдын эрх ашигт нийцсэн шийдвэрийг удаа дараа гаргаж байна. Орон нутгийн удирдлага, малчид ч цас зудын нөхцөлд дотоод нөхцөл бололцоогоо дээд зэргээр дайчлан хариуцлага, санаачлагатай байж, хамтын хүчээр бэрхшээлийг гэтлэн давах хэрэгтэй” гэж Монгол Улсын Шадар сайд М.Энхболд хэлсэн үгэндээ тэмдэглэв.

Өвс, тэжээлийг тодорхой цэг, салбаруудад шинээр буюу нэмэн байршуулж байгаатай холбогдуулан малчдын худалдан авсан өвс, тэжээлийг түргэн шуурхай хүргэх арга хэмжээ авахыг орон нутгийн удирдлагуудад Шадар сайд М.Энхболд даалгав.

2009-2010 оны мал өвөлжилтийн бэлтгэл ажлыг хангахтай холбогдуулан Засгийн газрын ажлын хэсэг аймаг, орон нутагт бэлчээрийн даац, гангийн байдлыг тогтоосон бөгөөд Засгийн газрын тогтоол гарсан. Энэ дагуу Говь-Алтай, Дундговь, Өмнөговь, Увс аймгийн 7 суманд түр цэг шинээр байгуулж 1440 тонн өвс, 890 тонн тэжээл нэмж байршуулсан байна.

Мөн Монгол Улсын Ерөнхий сайд С.Батболд Төв, Дундговь аймагт ажиллан цагийн нөхцөл байдалтай танилцаж өвөлжилт хүндэрч байгаа аймгуудад Засгийн газрын ажлын хэсэг ажилласан. Үүний дараа орон нутгийн удирдлага, иргэд, малчдаас гарсан санал, хүсэлтийг нэгтгэн Засгийн газрын хуралдаанаар хэлэлцэн авч хэрэгжүүлэх арга хэмжээний талаар тодорхой шийдвэр гаргасан юм.

Өнгөрсөн 2008-2009 онд өвөлжилт хүндэрсэн аймгуудад Засгийн газрын тогтоол, Улсын Онцгой комиссын шийдвэрээр 916,95 сая төгрөгийн үнэ бүхий 8912,8 тонн өвс, 886,1 сая төгрөгийн 8211,4 тонн тэжээлийг улсын нөөцөөс олгосон юм.

Өвөлжилт хүндэрсэн аймгуудад тусламж хүргэх цуваа хөдөллөө