Монгол Улсын Засгийн газраас "АТАР-4" тогтвортой хөгжлийн аяныг хэрэгжүүлэхээр шийдвэрлээд буй. Үүнтэй холбогдуулан Төв аймгийн Зуунмод суманд тус аяны нээлтийг зохион байгуулж, УИХ-ын гишүүн Ц.Туваан, С.Эрдэнэболд нар оролцлоо. Нээлтийн үеэр “Атар IV Тариалангийн тогтвортой хөгжлийн аян”-ы хүрээнд хэрэгжүүлэх бодлого чиглэл, газар тариалан, эрчимжсэн мал аж ахуйн салбарт хийх ажил, биржийн үйл ажиллагааны талаар танилцуулж, үрийн буудай болон сэлгэн таримлын үрийн талаар мэдээлэл өгсөн байна.

"АТАР-4" тогтвортой хөгжлийн аяны хүрээнд бүс нутгуудад ойн зориулалтын газар, үр сортын аж ахуйн нэгж байгуулах, дотооддоо улаан буудай болон төмс хүнсний ногоогоо тарьж, хэрэгцээгээ бүрэн хангах, тэжээлийн тарималыг эрс нэмэгдүүлэх, техникийн шинэчлэлүүдийг хийх, дөрвөн улирал тасралтгүй нарийн ногоогоор хангах хүлэмжийн аж ахуйг дэмжих, ашиг шимт 200 мянган толгой үхэр сүргийн бүтцийг сайжруулах зэрэг тодорхой ажлуудыг төлөвлөөд байгаа юм.

Тус аяны зорилго нь тариалангийн дэвшилтэт технологийг нэвтрүүлж, хөрс, уур амьсгалын онцлогт тохирсон шинэ болон ашигт таримлыг нутагшуулах, тэжээлийн үйлдвэрлэлийг нэмэгдүүлэх замаар газар тариалан, мал аж ахуйн төгс хослолыг бий болгож, төвийн бүсийг хөдөө аж ахуйн жишиг бүс болгон хөгжүүлэхэд чиглэж байна.
Уг аяныг хэрэгжүүлснээр хөдөө аж ахуйн салбарын боломжит нөөцийг бүрэн ашиглах, өртөг шингэсэн бүтээгдэхүүн үйлдвэрлэн өрсөлдөх чадварыг нэмэгдүүлэх, хүн амыг баталгаат хүнсээр, үйлдвэрлэлийг түүхий эдээр тогтвортой хангахад чиглэсэн бодит үр дүнд хүрч эдийн засагт тодорхой өсөлт бий болох юм.