Хүнс, хөдөө аж ахуйн, хөнгөн үйлдвэрийн сайд Ж.Энхбаяр тэргүүтэй яамны удирдлагууд Дархан-Уул аймгийн Хонгор суманд үйл ажиллагаа явуулж байгаа Малын удмын сангийн үндэсний төвийн цогцолборт өчигдөр /2025.05.06/ ажиллалаа.

Тус цогцолборт Малын удмын сангийн үндэсний төв, Хөдөө аж ахуйн “Халх гол” үндэсний бүтээн байгуулалтын бүсийн захиргаа, Төвийн бүсийн хүнс, хөнгөн үйлдвэрлэл технологийн цогцолбор, Аймаг дундын отрын бэлчээр ашиглалтын захиргаа гэсэн Хүнс, хөдөө аж ахуй, хөнгөн үйлдвэрийн яамны харьяа байгууллагууд нэг дор үйл ажиллагаа байгаа юм.

Энэ үеэр харьяа байгууллагуудын удирдлагууд 2025 онд хэрэгжүүлэх ажлын талаар мэдээлэл өгсөн бөгөөд тулгамдаж буй асуудлаа яамны удирдлагуудад танилцууллаа.

Байгууллагуудын мэдээлэлтэй холбогдуулан салбарын сайд дараах чиглэлд анхаарч ажиллах чиглэл өгөв.

Үүнд:

Мах сүүний үхрийг төрөлжүүлэн хөгжүүлэх, үржил селекцийн ажлыг бүртгэл мэдээлэлд суурилан шинжлэх ухааны үндэслэлтэй зохион байгуулах, малын бүртгэл мэдээллийн ажил үйлчилгээг эрчимжүүлэх;
Малын удмын сангийн үндэсний төвийн харьяа орон нутаг дахь цөм сүргийн аж ахуй нэгжийн асуудлыг шийдвэрлэх саналаа боловсруулах;
2025 онд зохион байгуулахаар төлөвлөсөн зохиомол хээлтүүлгийн ажил үйлчилгээг үр дүнтэй зохион байгуулах;
Өндөр ашиг шимт малаас дотоод үр үйлдвэрлэлийн ажлыг эрчимжүүлэх;
Хүний нөөцийг чадавхжуулах;
Шинэ хөдөө болон төсөл хөтөлбөрийн хүрээнд түрээсээр олгогдсон малын эргэн төлөлтийн гэрээг цэгцлэх зэрэг асуудлыг үүрэг болгов.

2025 онд төлөвлөсөн зохиомол хээлтүүлгийн ажил үйлчилгээг үр дүнтэй зохион байгуулах чиглэл өглөө