2026 оныг Монгол Улсын ЗГ-аас Боловсролыг дэмжих жил болгох шийдвэр гаргасанд туйлаас баяртай байна. Учир нь улс орны хөгжлийг хөдөлгөгч хүч нь хүн. Гэтэл сүүлийн жилүүдэд хүний хөгжилд төдийлөн анхаарал хандуулаагүйн горыг бид амсаад эхэлснээ хүлээн зөвшөөрч буйн илрэл гэж бас энэхүү үйлдлээс харж болохоор байна.

Лу.Гантөмөр сайд 2012-2016 онуудад Боловсролын сайдаар ажиллаж байх хугацаандаа Цөм хөтөлбөрийг туршин, хэрэгжүүлж чамгүй үр дүнг гаргаж байсныг одоо ч багш нар маань талархан ярьцгаадаг.
Ном, Авьяас, Багш хөтөлбөрүүдийг хэрэгжүүлснээр хүүхдийн хөгжил төлөвшилд үнэтэй хувь нэмэр оруулж байсныг тухайн үед багшаар ажиллаж байсан хүний хувьд сайшаан хэлмээр байна.
Багш нар ажлын байран дээрээ хөгжиж байсан алтан үе ч гэж хэлэхэд хэтийдэхгүй л болов уу. Мөн энэ үед багш бид нөгөө алдарт ЛЕНОВО-той болсон байдаг юм. Ийм ч учраас Лу Гантөмөр сайдад салбарынхан нь талархаж явдаг даа.

2021-2024 оны хооронд Л.Энх-Амгалан сайд ажиллаж байсныг та бид сайн мэдэж байгаа. Бас санаачилгатай, манлайлалтай ажиллаж олон асуудал шийдэж өгснийг нь ч мартаагүй биз ээ. Энэ удаагийн хамтарсан Засгийн газарт манай салбарын бүтээлч сайдууд орж ажиллаж энэхүү түүхэн шийдвэрийг гаргуулсан нь ойлгомжтой харагдаж байна. Боловсролыг дэмжих жилийн хүрээнд хийх хамгийн бодит бөгөөд шийдлээ хүлээсэн ажил бол Боловсролын Ерөнхий Хуульд нэмэлт өөрчлөлт оруулах хуулийн төслийг дэмжин баталж, бодит ажил болгосноор салбарын багш, ажилтнуудын нийгмийн баталгаа хангагдаж, бусад олон жижиг асуудлууд шийдэгдэх нөхцөл бүрдэх болно.

2017 оноос эхлэн Монголын багш нарын үйлдвэрчний эвлэлийн холбоо багшийн цалинг 1000$ хүргэх шаардлагыг Засгийн газарт тавьж эхэлсэн үеэс өнөөдрийг хүртэлх хугацаанд боловсролын салбарын багш ажилтны цалин хөлс нийгмийн баталгааг хангах зайлшгүй шаардлага байгааг нийгмээрээ хүлээн зөвшөөрч эхэлж байгаа нь сайшаалтай. Боловсролын салбарт эрдэм мэдлэг, сэтгэл зүтгэлээ шингээн ажиллаж байсан хоёр сайд маань Багшийн нийгмийн баталгаа болсон цалинг 1000$ хүргэе гэдэг саналыг минь дэмжиж байгаад олон мянган багш ажилтнуудынхаа өмнөөс Баярлалаа гэж урам хайрлая. Ер нь бидний цөөхөн Монголчууд нам, улс төрөөр талцан хуваагдаж, хэрэлдэж маргалдаж, попрохоос илүүтэй Бүтэн Монгол улсаа хөгжүүлэхийн төлөө нэгдэж нийлээд, хамтраад явбал их зүйлийг бүтээж чадна. Монголын ирээдүйг хөтлөн урагшлуулах боловсролын салбараа босгохын төлөө хамтдаа хичээцгээе. Сайн багшийн гар дээр эх орны минь маргаашийн нар манддаг. Багшийн цалинг 1000 $ хүрэх цаг ойрхон байна.