УИХ-ын Төсвийн байнгын хорооны 2025/07/01ний өдрийн хуралдаанаар "Монгол Улсын нэгдсэн төсвийн 2025 оны төсвийн хүрээний мэдэгдэл, 2026-2027 оны төсвийн төсөөллийн тухай хуульд нэмэлт, өөрчлөлт оруулах тухай хуулийн төсөл  болон хамт өргөн мэдүүлсэн хуулийн төсөл /Засгийн газар 2025.06.25-ны өдөр өргөн мэдүүлсэн, анхны хэлэлцүүлэг/-ийг хэлэлцлээ.

Уг асуудалтай холбоотойгоор УИХ-ын гишүүн Х.Жангабыл асуулт асууж, байр суурь илэрхийллээ.

Сайд хэд хоногийн өмнө сэтгүүлчдэд яриа өгөхдөө 2 асуудлыг эрэмбэлэн ярьж байсан.

Нэгдүгээрт, ТЭЦ-3 сэргээн засварлах асуудлыг танаж болохгүй заавал төсвийг нь тавих ёстой гэж ярьсан.

Хоёрдугаарт, Газрын тосны нөөц бүрдүүлэх, нөөц бүрдүүлэхэд шаардлагатай санхүүжилтийг шийдэх асуудлыг ярьж байсан. Энэ төсвийн тодотгол дээр төсвийн санхүүжилт тавьж өгсөн үү? Тавьж өгөөгүй бол тавьж өгөх үү? ямар зарчим баримталж байна вэ? Ямар механизмаар нөөц бүрдүүлэх вэ?  

Сая Н.Учрал сайд Евроазийн хэлэлцээрт гарын үсэг зурсан. Энэ хэлэлцээрийн үр дүнд манай шатахууны гаалийн татвар 5 хувиар хямдарна. Энэ 5 хувийг та онцгой татвараар тавьж өгөөд үүнээс хэмнэсэн мөнгөөрөө нөөц бүрдүүлэх асуудлыг хийвэл яасан юм бэ гэсэн зөвлөмж хэлье.

Түүний асуултад, Сангийн сайд Б.Жавхлан хариуллаа.