Байгаль орчин, аялал жуулчлалын сайд  Д.Оюунхоролоос цаг үеийн асуудлаар зарим асуултад хариулт авлаа. 

-Сонгуулийн хуулийн ямар заалтыг өөрчлөхөөр болсон бэ? 

Яг ямар өөрчлөлт оруулах гэж байгаа талаар  тодорхой мэдээлэл алга. Ер нь  бол УИХ, Ерөнхийлөгч, орон нутгийн сонгууль нэг хуулиар явж байгаа нь зохимжгүй.

Тиймээс бие даасан хууль болгох нь зүйтэй гэсэн байр сууринаас асуудалд хандаж байгаа. Хуульд зарим нэг цоорхой байгаа учраас засч залруулах шаардлагатай юм.

 -Удахгүй Засгийн газрын 100 хоног болно. Сөрөг хүчний зүгээс шүүмжлэлтэй хандаж байгаа. Таны хувьд шинэ Засгийн газрын үйл ажиллагааг хэрхэн дүгнэж байна вэ? 

Монголчууд маргалдаж мэтгэлцэж нэгнийгээ шүүмжилж ярих дуртай. Өнгөрсөн дөрвөн жилд Засгийн газар ямархуу байдалтай ажиллаж  ямар эдийн засаг, боломжийг дараагийн Засгийн газарт хүлээлгэж өгсөн гэх зэргээр олон асуудлыг эргэн ярьж шүүж тунгаах ёстой.

Эдийн засгийн нөхцөл байдал хүнд, ажил хийх боломж хомс байдалтай Засгийн газрыг хүлээлгэж өгсөн гэдгийг хүн бүхэн мэдэж байгаа. Гэхдээ яамд, хүн болгон өмнөө тавьсан зорилтынхоо төлөө ажиллаж байна. Төрийн ажлын залгамж чанар үргэлжлээд явж байгаа гэж бодож байна. 

-Танай яамны хувьд энэ 100 хоногт хэр үр дүнтэй ажиллав? 

Өнгөрсөн хоёр сарын хугацаанд тодорхой ажлуудыг хийж шийдвэрлэсэн. Уур амьсгалын өөрчлөлтийн Парисын олон улсын хэлэлцээрийг УИХ-аар соёрхон батлаад НҮБ-ын индэр дээрээс Ерөнхийлөгч гардуулж өглөө.

Ингэснээр уур амьсгалын өөрчлөлтөд өртөмтгий байгаа манай улс олон улсын байгууллагуудын дэмжлэг туслалцааг авч бодитой ажил хийнэ. Монгол Улс эдийн засгийн хувьд уул уурхайн салбараас хараат олон лицензийг замбараагүй олгосон байдаг.

Үүний дүнд аж ахуйн нэгжүүд байгальд халгаатайгаар үйл ажиллагаа явуулж байна. Орхон гол зэргээр хууль дүрэм зөрчсөн аж ахуйн нэгжүүдийн үйл ажиллагааг зогсоосон. Мөрдөгдөж байгаа хуулиудаас гар аргаар алт олборлох тухай хууль хэрэгжихгүй байна. Техникийн хүчээр нинжа нар газрыг сэндийлж байна.

Нөхөн сэргээлт хийсэн газрыг ч буцаагаад сүйтгэдэг, бохирдуулдаг, гол горхийг ширгээдэг  хариуцлагагүй уул уурхай хавтгайран  үргэлжилж байна. Энэ асуудалд  өндөр шаардлага тавьж  зарим уул уурхайн лицен­зийг хураах шаард­лагыг Засгийн газрын хуралдаанд оруулахаар бэлтгэл ажил хийж байна.

Цаашид уул уурхайн компаниуд техник эдийн засгийн үндэслэл  боловсруулахгүй, байгаль орчны үнэлгээ хийхгүй бол гаргасан хөрөнгө мөнгөндөө харамсахгүйгээр ард түмний өмнө буруугаа хүлээж, лицензээ хураалгадаг байх хэрэгтэй. Байгаль орчин бол үр хойчдоо үлдээх өв учраас нийтийн эрх ашиг байх ёстой.

Туул голын бохирдол, Цэвэрлэх байгууламжийн асуудлаар ажлууд үргэлжилж байна. Хоггүй Улаанбаатар болоход бидэнд мөнгө хэрэггүй. Хүмүүсийн ухамсарыг төлөвшүүлэх кампанит ажлыг эхлүүлнэ. Хог хаягдлаа цуглуулаад тушаадаг хүмүүсийг дэмжих, эдийн засгийн хөшүүрэг болгох  механизмыг бий болгоё гэж бодож байгаа.  

-Хүүхэд харах үйлчилгээг зогсоож байгаа нь иргэдийг бухимдуулж байна. Хуулийг яагаад  хойшлуулахаар болсон юм бэ? 

Хүүхэд харах үйлчилгээний тухай хуулийг бүхэлд нь зогсоож байна гэж хэлж болохгүй. Бид нэг л зүйлийг сайн ойлгох хэрэгтэй.

Хөнжлийнхөө хэрээр хөлөө жий гэдэг дүрмээр Засгийн газар ажиллах ёстой. Төсөв хөрөнгө мөнгөгүй  мөртлөө санхүүжилт шаардсан олон хууль баталсан.

Тиймээс одоогийн төсөв эдийн засагтай уялдуулж үйл ажиллагаа явуулах зайлшгүй шаардлага, онцгой нөхцөл байдал үүссэн. Үүнд зохицуулж зарим нэг хуулиуд хойшилж, хэрэгжих боломжгүй болж байгаа.