2017.11.21

МАН-ын хурлын эргэн тойрон дахь УИХ-ын гишүүдийн байр суурь

МАН-ын Их хурал хоёр дахь өдрөө үргэлжилж байна. 28-р Их хурлаар намын дараагийн даргыг сонгож, дүрэм, мөрийн хөтөлбөртөө шинэчлэл хийх юм.

Намын даргад одоогоор гурван хүн өрсөлдөөд нь тодорхой байгаа. Тодруулбал, Ерөнхий сайд У.Хүрэлсүх, УИХ дахь МАН-ын бүлгийн дарга Д.Хаянхярваа МАН-ын гишүүн Н.Дэмбэрэл нар намын даргад нэр дэвшиж байна. Намын дүрмээр нэр дэвшигчдийг хэлэлцэх үед заалнаас нэр дэвшүүлэх боломжтой юм.

Хурлын хөтөлбөрийн дагуу 14:00 цаг гэхэд дараагийн дарга тодрох ёстой. МАН-ын энэ удаагийн хуралд 1309 төлөөлөгч оролцож байна.

МАН-ын 28-р Их хурал болон намын шинэ дарга тодрох асуудлаар УИХ-ын гишүүдийн байр суурийг хүргэе.

Д.Оюунхорол

УИХ-ын гишүүн Д.Оюунхорол:

Төлөөлөгчид намынхаа эв нэгдэл, үнэт зүйлийг эрхэмлэн дэдлэх чадвартай хүнийг даргаараа сонгоно гэдэгт итгэлтэй айна. Намын үнэт зүйл бол боловсон хүчний бодлого байдаг. Улс төрийн нам бэхжиж, хүчний бодлогоо шатлан дэвших зарчмаар явуулах шаардлагатай. Их хуралд хүрэлцэн ирсэн төөлөгчид ч мөн адил ийм хүлээлтэй байгаа болов уу.

Н.Учрал

УИХ-ын гишүүн Н.Учрал

Нам бол хувийн аж ахуйн нэгж биш олон нийтийн байгууллага учраас эв нэгдэл дээр суурилдаг. Өнгөрсөн хугацаанд олсон ололт, алдсан алдаагаа эргэн харсан, өнгөрсөн дээрээ суурилж, ирээдүйг харсан шийдвэр гараасай гэж хүсч байна. Өнөөдөр дүрмийн тодорхой өөрчлөлтүүдийг хийхээр хэлэлцэж байна. 1309 гишүүн бүрийн санал тусгагдсан.

Ж.Энхбаяр

УИХ-ын гишүүн Ж.Энхбаяр

Намын даргад дэвшиж байгаа хүмүүс байна. Үүнээс Засгийн эрх мэдлийг удирдаж байгаа Ерөнхий сайд У.Хүрэлсүхэд улс төрийн эрх мэдлийг өгч, хариуцлагыг нь бүрэн дүүрэн хариуцлуулах нөцлийг бүрдүүлэх ёстой гэж бодож байна. Ингэж байж Монгол Улсын хүсэн хүлээж байгаа шударга ёс бүрдэнэ. 

Өнөөдөр Оюутолгой, Тавантолгой, уул уурхайг тойрсон түмэн маргаан, хөгжлийн банк, Монголбанкыг тойрсон, хувьдаа ашигласан олон асуулыг Монгол түмэн мэдэж байгаа. Эдгээрийг шийдвэрлэх хүлээлт байгаа. Үүнийг шийдэх хамгийн боломжит зам бол У.Хүрэлсүх. Энэ Засгийн газрын тэргүүн У.Хүрэлсүхээр энэ ажлыг хийлгэх нь нийгмийн захиалга гэж ойлгож байна.



Д.Тэрбишдагва

УИХ-ын гишүүн Д.Тэрбишдагва

Нам дотор төдийгүй УИХ дээр үүсээд, яригдаад байгаа олон асуудлаа намын Их хурал дээрээ буюу халуун бүл дотроо илэн далангүй харилцан ярилцах нь тун зүйтэй. Тодруулж хэлбэл, нам дотор үүсээд буй фракцлал, хагарлын асуудлыг хэлж байгаа юм. 

Бид энэ асуудлаа намын Их хурал дээрээ ярих нь гарцаагүй үнэн. Харин үүнд анхаарах нэг чухал зүйл бол намын Их хурлынхаа наана урьдчилж бэлтгэсэн жүжиг бүү тоглоосой. Миний хувьд Ерөнхий сайд намын дарга байх асуудал зарчмын хувьд зүйтэй гэсэн бодолтой байгаа.

Гэхдээ бодит нөхцөл байдлыг харахад намын дарга нь Ерөнхий сайд байхаа больчихоод байгаа дүрэмгүй тоглолтууд сүүлийн үед болоод байна л даа. Ерөнхий сайддаа тулгуурлаж намын даргаа шийдэх үү, намын даргадаа тулгуурлаж Ерөнхий сайдаа шийдэх үү гэдгийг сайн бодох хэрэгтэй.


Ж.Эрдэнэбат

УИХ-ын гишүүн Ж.Эрдэнэбат

МАН-ын 28 дугаар Их хурлаар бид намынхаа даргыг сонгоно. Өнөөдөр бол намын даргад нэр дэвшигчид заалнаас нэрээ дэвшүүлнэ. Миний хувьд УИХ дахь МАН-ын бүлгийн дарга Д.Хаянхярвааг дэмжинэ гэсэн байр суурьтай байгаа.